នៅពេលប៉ូលិសអ៊ីស្រាអែលប្រើកម្មវិធី Pegasusដើម្បីលួចស្តាប់ពលរដ្ឋរបស់ខ្លួន
រឿងអាស្រូវប្រើប្រាស់កម្មវិធីPegasusដែលផលិតឡើងដោយក្រុមហ៊ុនបច្ចេកវិទ្យាអ៊ីស្រាអែលដើម្បីលួចស្តាប់ ឈ្លបយកការណ៍សម្ងាត់ បានបែកខ្ចរខ្ចាយសាជាថ្មី ដោយលើកនេះ កើតមានផ្ទាល់នៅទឹកដីអ៊ីស្រាអែល។ នៅថ្ងៃចន្ទ ទី ៧កុម្ភៈ នាយករដ្ឋមន្រ្តីអ៊ីស្រាអែលលោកណាតាលី បេននែតបានសន្យាចាត់វិធានការ នៅក្រោយកាសែតក្នុងស្រុកចុះផ្សាយថា ប៉ូលិសអ៊ីស្រាអែល បានប្រើកម្មវិធីPegasus ដើម្បីលួចស្តាប់ ឈ្លបយកការណ៍សម្ងាត់ពីជនជាតិអ៊ីស្រាអែល។
ចុះផ្សាយនៅថ្ងៃ៖
កាំបិតចងដងឯង។ កម្មវិធីPegasus ដែលផលិតឡើងដោយក្រុមហ៊ុនបច្ចេកវិទ្យាអ៊ីស្រាអែល NSO Groupរួមជាមួយក្រសួងការពារជាតិអ៊ីស្រាអែល មិនត្រឹមតែត្រូវគេប្រើសម្រាប់លួចស្តាប់ យកការណ៍សម្ងាត់មេដឹកនាំបរទេស អ្នកកាសែត នៅទឹកដីបរទេសតែប៉ុណ្ណោះទេ ប៉ុន្តែ Pegasus ត្រូវបានគេប្រើផងដែរសម្រាប់លួចស្តាប់ ឈ្លបយកការណ៍ជនជាតិអ៊ីស្រាអែល នៅទឹកដីអ៊ីស្រាអែល។
តាមកាសែតសេដ្ឋកិច្ចអ៊ីស្រាអែលCalcalist ចុះផ្សាយកាលពីថ្ងៃចន្ទថា ប៉ូលិសអ៊ីស្រាអែលបានប្រើកម្មវិធី Pegasus ដោយគ្មានការសុំអនុញ្ញាតពីតុលាការ ដើម្បីលួចស្តាប់ ឥស្សរជន អ្នកកាសែត និងសកម្មជនការពារសិទ្ធិមនុស្ស នៅប្រទេសអ៊ីស្រាអែល។ នៅខែមករា កន្លងទៅ កាសែតCalcalist ដដែលបានចុះផ្សាយថា ប៉ូលិសអ៊ីស្រាអែលបានទទួលស្គាល់ថា ខ្លួនបានប្រើបច្ចេកវិទ្យា ដើម្បីស៊ើបការណ៍សម្ងាត់ ដោយខុសច្បាប់ ប៉ុន្តែ មិនបានបញ្ជាក់ឈ្មោះកម្មវិធីPegasus។ តាមការចុះផ្សាយរបស់កាសែតក្នុងស្រុកអ៊ីស្រាអែល ឥស្សរជនដែលត្រូវបានប៉ូលិសប្រើកម្មវិធីPegasus ចូលលួចស្តាប់តាមដាន មានកូនប្រុសរបស់អតីតនាយករដ្ឋមន្រ្តីអ៊ីស្រាអែល ទីប្រឹក្សាព័ត៌មានរបស់លោក អ្នកកាសែត និងចៅហ្វាយក្រុងជាច្រើនរូបផ្សេងទៀត។
នៅក្នុងសេចក្តីប្រកាសព័ត៌មាន នៅថ្ងៃចន្ទ នាយករដ្ឋមន្រ្តីអ៊ីស្រាអែលលោកណាតាលី បេននែតបានអះអាងថា បើសិនការចុះផ្សាយរបស់កាសែតជាការពិត នោះ រដ្ឋាភិបាលនឹងមិនបណ្តោយឲ្យកន្លងផុតទៅដោយងាយស្រួលនោះទេ។
សម្រាប់នាយករដ្ឋមន្រ្តីអ៊ីស្រាអែល កម្មវិធី Pegasus និងកម្មវិធីជាច្រើនផ្សេងទៀត ជាឧបករណ៍ដ៏សំខាន់ចាំបាច់ សម្រាប់ប្រើក្នុងការប្រយុទ្ធប្រឆាំងនឹងអំពើភេរវកម្ម និងបណ្តាញឧក្រិដ្ឋជនធំៗ ពោលគឺគ្មានគោលដៅ ប្រើសម្រាប់យុទ្ធនាការប្រឆាំងជនជាតិអ៊ីស្រាអែល ឬអ្នកទទួលខុសត្រូវនោះទេ។ ប្រតិកម្មទៅនឹងព័ត៌មានលេចធ្លាយស្តីពីការប្រើប្រាស់កម្មវិធី Pegasus ទៅលើប្រជាជនអ៊ីស្រាអែល រដ្ឋមន្រ្តីក្រសួងសន្តិសុខសាធារណៈបានអំពាវនាវឲ្យគេបង្កើតគណៈកម្មការស៊ើបអង្កេតរដ្ឋាភិបាល ដើម្បី បំបែកសំណុំរឿងអាស្រូវមួយនេះ។
ក្រុមហ៊ុនNSO Groupeដែលជាអ្នកផលិតកម្មវិធីPegasus មិនបានបដិសេធ ហើយក៏មិនបានទទួលស្គាល់ពីរឿងលក់កម្មវិធី Pegasus ទៅឲ្យប៉ូលិសអ៊ីស្រាអែល។ ក្រុមហ៊ុនគ្រាន់តែអះអាងថា ខ្លួនគ្មានជាប់ពាក់ព័ន្ធ និងដឹងរឿងអ្វីទៀតឡើយ នៅក្រោយការចុះកិច្ចសន្យាលក់កម្មវិធីPegasus ទៅឲ្យរដ្ឋាភិបាលបរទេស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ