ក្រុមប្រទេសផលិតប្រេង ព្រមបង្កើនបរិមាណបូមប្រេង តែដោយសន្សឹមបំផុត
ក្រុមប្រទេសនាំចេញប្រេង ចំនួន២៣ប្រទេស ដែលហៅកាត់ថា OPEP+ បានព្រមព្រៀងគ្នានៅល្ងាចថ្ងៃអង្គារម្សិលមិញ បង្កើនបរិមាណផលិតប្រេង បន្តិច ចាប់ពីខែកុម្ភៈ២០២២ទៅ ដើម្បីឆ្លើយតបទៅនឹងសេចក្តីត្រូវការរបស់ទីផ្សារអន្តរជាតិ ដែលហាក់ដូចជារងឥទ្ធិពលតិចតួចណាស់ពីអូមីក្រុង។ សេចក្តីសម្រេចបែបនេះ មិនបានធ្វើឱ្យតម្លៃប្រេងនៅលើទីផ្សារធ្លាក់ចុះទេ។
ចុះផ្សាយនៅថ្ងៃ៖
ដោយគ្មានការភ្ញាក់ផ្អើល សមាជិកអង្គការប្រទេសនាំចេញប្រេងចំនួន ១៣ និងសម្ព័ន្ធមិត្ត១០ប្រទេសផ្សេងទៀត ដែលហៅថា Opep+ បានព្រមព្រៀងគ្នានៅថ្ងៃអង្គារទី ៤មករា២០២២ បង្កើនការផលិតកម្មបូមប្រេងឱ្យឡើងដល់ ៤សែនធុងបារីល ក្នុងមួយថ្ងៃ នៅខែកុម្ភៈ ដើម្បីឆ្លើយតបទៅនឹងសេចក្តីត្រូវការរបស់ទីផ្សារអន្តរជាតិ។ បើតាមឧបនាយករដ្ឋមន្ត្រីរុស្ស៊ីទទួលបន្ទុកកិច្ចការថាមពល ដោយសារតែ ទីផ្សារមិនសូវរំជើបរំជួលនឹងអូមីក្រុង ទើបក្រុមOpep+ ចាំបាច់ត្រូវបំពេញកាតព្វកិច្ចបង្កើនផលិតផលប្រេង។
ប៉ុន្តែជាការបង្កើនដ៏តិចតួច និងដោយសន្សឹមបំផុត។ ពោលគឺក្រុមOpep+ នៅតែបន្តប្រើយុទ្ធសាស្ត្រប្រុងប្រយ័ត្នខ្លាំង នៅចំពោះការរើបឡើងវិញនៃសេដ្ឋកិច្ចក្រោយវិបត្តិកូវីដ១៩ ដូចដែលពួកគេបានប្រកាន់យកតាំងពីខែឧសភាឆ្នាំ២០២១មក។
ដូច្នេះតម្លៃប្រេងនៅលើទីផ្សារច្បាស់ជាមិនអាចចុះថ្លៃបានទេ។ អ្នកវិភាគជាច្រើន ប្រមើលឃើញថាទោះមានឬ គ្មាន អូមីក្រុង ក៏ដោយ ក៏នៅឆ្នាំ២០២២ តម្លៃប្រេងឆៅនៅតែខ្ពស់ត្រដែតដដែល។
កំណត់កម្មវត្ថុបង្កើនការបូមប្រេងទាបពេក សមាជិកខ្លះគ្មានលទ្ធភាពបង្កើនផលិតផលរបស់ខ្លួនបានគេ នៅពេលអនុវត្តដោយជាក់ស្តែង។ ជាមួយនឹងសេចក្តីសម្រេចបង្កើនការបូមប្រេង ដោយសន្សឹមៗត្រឹម៤សែនធុងមួយថ្ងៃ ជារៀងរាល់មួយខែម្តង នៅខែកុម្ភៈខាងមុខ បរិមាណបូមប្រេងប្រចាំថ្ងៃនឹងឡើងដល់ ១,៧លានធុងក្នុងមួយថ្ងៃ ដែលស្មើនឹង៨៥%នៃសកម្មភាពផលិតប្រេងកាលពីមុនវិបត្តិ (២លានធុងក្នុងមួយថ្ងៃ) តែប៉ុណ្ណោះ។ តែសេដ្ឋកិច្ចចាប់មានទស្សនៈវិស័យវិជ្ជមានផង ផលវិបាកបង្កឡើងដោយអូមីក្រុងមានតិចតួចទៀត។ ភាពមិនច្បាស់លាស់ដ៏ធំមួយទៀត សម្រាប់ឆ្នាំ២០២២ គឺវិបត្តិអ៊ីរ៉ង់។ អ៊ីរ៉ង់ជាប្រទេសនាំចេញប្រេងដ៏ធំ កំពុងជាប់ទណ្ឌកម្មអាមេរិក។ បើការចរចាដែលកំពុងចាប់ផ្តើមជាថ្មី ត្រូវបរាជ័យ នោះអ៊ីរ៉ង់នឹងត្រូវរងទណ្ឌកម្មថ្មីបន្ថែមទៀតផង ភាពតានតឹងក្នុងតំបន់ដើមបូព៌ានិងឈូងសមុទ្ទពែក្ស ក៏កើនឡើងផង នោះតម្លៃប្រេងត្រូវតែឡើងដោយចៀសមិនរួចឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ