អ៊ីស្រាអែល ប្រកាសគម្រោងសាងសង់លំនៅឋានក្នុងដែនដីប៉ាឡេស្ទីន
រដ្ឋាភិបាលអ៊ីស្រាអែលថ្មី ដឹកនាំដោយលោកនាយករដ្ឋមន្ត្រី Naftali Bennett បានប្រកាសបើកគម្រោងសាងសង់លំនៅឋានជាងមួយពាន់ខ្នង ក្នុងតំបន់ស៊ីហ្សកដានី ដែលជាដែនដីប៉ាឡេស្ទីន ក្រោមអាណានិគមអ៊ីស្រាអែល។ សេចក្តីប្រកាសរបស់រដ្ឋាភិបាលអ៊ីស្រាអែល បានរងការរិះគន់យ៉ាងខ្លាំងនិងភ្លាមមួយរំពេចពីអាជ្ញាធរប៉ាឡេស្ទីន និងអាចធ្វើឱ្យរដ្ឋបាលអាមេរិករបស់លោកចូបៃដិន ខឹងសម្បារផង។
ចុះផ្សាយនៅថ្ងៃ៖
ស្តាប់ - ០២:០៩
ជាសរុបលំនៅឋានថ្មីចំនួន ១៣៣៥ខ្នង នឹងត្រូវសាងសង់ នៅក្នុងក្រុងចំនួន៧ ផ្សេងៗគ្នា នៃតំបន់ក្រោមអាណានិគមកិច្ចស៊ីហ្សកដានី ដែលជាដែនដីរបស់ប៉ាឡេស្ទីន និងដែលមានប្រជាពលរដ្ឋប៉ាឡេស្ទីនរស់នៅជាង២លាន៨សែននាក់។ ក្នុងក្រុង Ariel ដែលជាក្រុងក្រោមអាណានិគមធំជាងគេ រដ្ឋាភិបាលអ៊ីស្រាអែលគ្រោងសង់លំនៅឋានដល់ទៅ ៧២៩ខ្នង។
ក្រសួងសំណង់អ៊ីស្រាអែលបានប្រកាសចេតនាចង់បង្កើនទ្វេដងវត្តមានពលរដ្ឋអ៊ីស្រាអែល នៅតំបន់ជ្រលងភ្នំJourdain ដោយដាក់លក់អចលនទ្រព្យ ចំនួន១៥០០លំនៅឋាន នៅតំបន់នេះ ឱ្យបានយ៉ាងយូរនៅឆ្នាំ២០២៦។ “បង្កើនវត្តមានអ៊ីស្រាអែលទៅកាន់តំបន់អាណានិគម ជាទស្សនវិស័យរបស់អ៊ីស្រាអែល”។ នេះបើតាមសេចក្តីថ្លែងការណ៍របស់រដ្ឋមន្ត្រីក្រសួងសំណង់ Zeev Elkin។
មិនតែប៉ុណ្ណោះ នៅថ្ងៃពុធទី ២៧តុលា គណៈកម្មការនៃក្រសួងការពារជាតិត្រូវផ្តល់សេចក្តី សម្រេចចុងក្រោយ អនុញ្ញាតឱ្យសាងសង់លំនៅឋានលើសពី៣០០០ខ្នង នៅតំបន់ស៊ីហ្សកដានី។
ប៉ុន្តែទន្ទឹមនឹងសេចក្តីប្រកាសនេះ ដោយមិនពាក់ព័ន្ធនឹងផែនការសន្តិភាព នៅពីរបីថ្ងៃខាងមុខទៀត គណៈកម្មការអ៊ីស្រាអែលដដែល នឹងអនុម័តជាលើកទីមួយ ការសាងសង់លំនៅឋាន១៣០០ខ្នង សម្រាប់ពលរដ្ឋប៉ាឡេស្ទីន នៅតំបន់C។ តំបន់ដែលអ៊ីស្រាអែលត្រួតត្រានិងគ្រប់គ្រងទាំងផ្នែករដ្ឋបាលនិងសន្តិសុខ ស្របតាមកិច្ចព្រមព្រៀងអូស្លូ។
គម្រោងសាងសង់លំនៅឋាននេះអាចនឹងធ្វើ ក្រុមឆ្វេងនិយមក្នុងជួររដ្ឋាភិបាលអ៊ីស្រាអែលចម្រុះផ្ទាល់ និងជាពិសេសរដ្ឋបាលអាមេរិក មិនពេញចិត្តផង ឬ ខឹងសម្បារផង។
ចំណែកខាងប៉ាឡេស្ទីនវិញ ដោយគ្មានបង្អង់ អាជ្ញាធរបានចេញសេចក្តីថ្លែងការណ៍ថា សហគមន៍អន្តរជាតិត្រូវតែឱ្យអ៊ីស្រាអែលសងនូវទង្វើឈ្លានពានលើប្រជាពលរដ្ឋប៉ាឡេស្ទីនក្នុងដែនដីប៉ាឡេស្ទីន។ ជាការរំលោភច្បាប់អន្តរជាតិ ! នេះជាការបរិហាររបស់ប្រទេសហ្សកដានី ដោយបន្ថែមថា នយោបាយធ្វើអាណានិគមកិច្ចអ៊ីស្រាអែលលើតំបន់ស៊ីហ្សកដានី ជាទង្វើខុសច្បាប់និងបំផ្លាញផែនសន្តិភាពអ៊ីស្រាអែល-ប៉ាឡេស្ទីន។
តាមច្បាប់អន្តរជាតិ អ៊ីស្រាអែលគ្មានសិទ្ធិធ្វើអាណានិគមលើតំបន់ស៊ីហ្សកដានីនិងក្រុងហ្សេរុយសាឡិមខាងកើតទេ ប៉ុន្តែតាំងពីឆ្នាំ ១៩៦៧មក រដ្ឋាភិបាលអ៊ីស្រាអែលបន្តសាងសង់លំនៅឋានលើតំបន់អាណានិគមកិច្ច និងបង្កើនសកម្មភាពកាន់តែខ្លាំង ក្រោមអាណត្តិរបស់លោកនេតាន់យ៉ាហ៊ូ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ