អ៊ីស្រាអែលបើកសម្ពោធស្ថានទូតលើកដំបូងបង្អស់របស់ខ្លួននៅអេមីរ៉ាតអារ៉ាប់រួម
៩ខែក្រោយចុះកិច្ចព្រមព្រៀង ចងស្ពានមេត្រីជាប្រវត្តិសាស្រ្តជាមួយអេមីរ៉ាតអារ៉ាប់រួម អ៊ីស្រាអែលបានសម្ពោធបើកស្ថានទូតលើកដំបូងបង្អស់របស់ខ្លួន នៅប្រទេសអារ៉ាប់ ក្នុងឈូងសមុទ្រពែរ្ស៍មួយនេះ។ ស្ថានទូតអ៊ីស្រាអែលនៅទីក្រុងអាប៊ូដាប៊ី ត្រូវបើកសម្ពោធជាផ្លូវការ ដោយរដ្ឋមន្រ្តីការបរទេសអ៊ីស្រាអែល លោកយាអ៊ៀ ឡាពីដ ដែលបានធ្វើដំណើរទស្សនកិច្ចជាផ្លូវការ ទៅអេមីរ៉ាតអារ៉ាប់រួម កាលពីថ្ងៃអង្គារទី ២៩ មិថុនា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៤០
ចាប់តាំងពីមានកិច្ចព្រមព្រៀង ភ្ជាប់ទំនាក់ទំនងប្រក្រតីរវាងអ៊ីស្រាអែល និងអេមីរ៉ាតអារ៉ាប់រួម ក្រោមការផ្ចុងផ្តើមរបស់អាមេរិក កាលពីខែកញ្ញា ឆ្នាំមុន លោកយាអៀរ ឡាពីដជារដ្ឋមន្រ្តីជាន់ខ្ពស់អ៊ីស្រាអែលលើកដំបូងគេ ដែលធ្វើដំណើរទស្សនកិច្ចនៅប្រទេសអេមីរ៉ាតអារ៉ាប់រួម។
នៅថ្ងៃអង្គារ រដ្ឋមន្រ្តីការបរទេសអ៊ីស្រាអែល លោកយាអៀរ ឡាពីដបានជួបពិភាក្សាជាមួយសមភាគីអេមីរ៉ាតអារ៉ាប់រួម បន្ទាប់ពីបានកាត់ខ្សែបូ បើកសម្ពោធសា្ថនទូតលើកដំបូងបង្អស់របស់អ៊ីស្រាអែលនៅទីក្រុងអាប៊ូដាប៊ី។
បើកសម្ពោធស្ថានទូតអ៊ីស្រាអែលនៅអេមីរ៉ាតអារ៉ាប់រួម ជាផ្នែកមួយនៃការចងស្ពានមេត្រី ភ្ជាប់ការទូត រវាងប្រទេសទាំងពីរ បន្ទាប់ពីកិច្ចព្រមព្រៀងជាច្រើន ដែលមានតាំងពីការភ្ជាប់ជើងហោះហើរ វិស័យទេសចរណ៍ និងកិច្ចព្រមព្រៀងដោះដូរពាណិជ្ជកម្ម។ កាលពីខែ មីនាកន្លងទៅ អេមីរ៉ាតអារ៉ាប់រួមបានប្រកាសបង្កើតមូលនិធិវិនិយោគតម្លៃ ៣០ពាន់លានដុល្លារសម្រាប់វិស័យជាយុទ្ធសាស្រ្តក្នុងទឹកដីអ៊ីស្រាអែល។
នៅក្នុងពិធីសម្ពោធបើកស្ថានទូតអ៊ីស្រាអែល នៅទីក្រុងអាប៊ូដាប៊ី រដ្ឋមន្រ្តីការបរទេសអ៊ីស្រាអែលបានថ្លែងថា អ៊ីស្រាអែល និងអេមីរ៉ាតអារ៉ាប់រួម ត្រូវចងភ្ជាប់ទំនាក់ទំនងគ្នា និងធ្វើឲ្យសេដ្ឋកិច្ចរបស់ប្រទេសទាំងពីររីកចម្រើនឡើង។ “អ៊ីស្រាអែល ចង់បានសន្តិភាពជាមួយ ប្រទេសជិតខាងទាំងអស់។ អ៊ីស្រាអែលមិនទៅណាទេ។ ដើមបូព៌ាជាផ្ទះរបស់អ៊ីស្រាអែល។ យើងនឹងនៅទីនេះ មិនទៅណាទេ។ យើងអំពាវនាវឲ្យប្រទេសដទៃក្នុងតំបន់ ទទួលស្គាល់រឿងនេះ"។ នេះជាប្រសាសន៍របស់រដ្ឋមន្រ្តីការបរទេសអ៊ីស្រាអែល លោកយាអៀរ ឡាពីដ។
តាំងពីរដ្ឋជ្វីហ្វ អ៊ីស្រាអែល បានចាប់កំណើតក្នុងថ្ងៃទី១៥ ឧសភា ឆ្នាំ ១៩៤៨ មានប្រទេសអារ៉ាប់មិនច្រើនទេ ដែលបានទទួលស្គាល់រដ្ឋអ៊ីស្រាអែល។ បន្ទាប់ពី អេហ្ស៊ីប និងហ្សកដានីដែលបានចុះកិច្ចព្រមព្រៀងសន្តិភាពជាមួយអ៊ីស្រាអែល អេមីរ៉ាតអារ៉ាប់រួម និងប្រទេសអារ៉ាប់៣ទៀត ទើបបានចុះកិច្ចព្រមព្រៀង ភ្ជាប់ទំនាក់ទំនងធម្មតាជាមួយអ៊ីស្រាអែល។
ការភ្ជាប់ទំនាក់ទំនងប្រក្រតី ដែលមានន័យស្មើទទួលរដ្ឋអ៊ីស្រាអែល ត្រូវបានប្រជាជនប៉ាឡេស្ទីនចាត់ទុកជាទង្វើក្បត់ និងខុសផ្ទុយស្រឡះពីគោលនយោបាយរបស់សម្ព័ន្ធអារ៉ាប់ដែលថា នឹងគ្មានទេ ទំនាក់ទំនងធម្មតាជាមួយអ៊ីស្រាអែល បើសិន អ៊ីស្រាអែលមិនទាន់ចុះកិច្ចព្រមព្រៀងសន្តិភាពជាមួយប្រជាជនប៉ាឡេស្ទីន។
ដំណើរការចរចាស្វែងរកសន្តិភាពអ៊ីស្រាអែល ប៉ាឡេស្ទីនបានជាប់គាំង គ្មានច្រកចេញសោះឡើយ។ អ៊ីស្រាអែលកំពុងត្រូវបណ្តាសាពីប្រជាជនប៉ាឡេស្ទីន និងការរិះគន់ ពីសហគមន៍អន្តរជាតិ ក្នុងរឿងដែលអ៊ីស្រាអែលចូលឈ្លានពាន ពង្រីកដែនអាណានិគមកិច្ចខុសច្បាប់ទៅក្នុងដែនដីរបស់ប្រជាជនប៉ាឡេស្ទីន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ