ប្រមុខការទូតបារាំង អាល្លឺម៉ង់ អង់គ្លេស អាេមរិក នឹងជជែកគ្នាពីរឿងកិច្ចព្រមព្រៀងនុយក្លេអ៊ែរអ៊ីរ៉ង់
រដ្ឋមន្ត្រីការបរទេសបារាំង អាល្លឺម៉ង់ អង់គ្លេស និងជួបប្រជុំជាមួយលោក អង់តូនី ប្ល៊ីងកិន រដ្ឋមន្ត្រីការបរទេសថ្មី របស់សហរដ្ឋអាមេរិក នៅថ្ងៃព្រហស្បតិ៍ទី១៨កុម្ភៈ ដើម្បីនិយាយគ្នាអំពីការផ្តល់ជីវិតថ្មី ដល់កិច្ចព្រមព្រៀងនុយក្លេអ៊ែរអ៊ីរ៉ង់។ ចំណែកអគ្គនាយកនៃទីភ្នាក់ងារថាមពលនុយក្លេអ៊ែរអន្តរជាតិវិញ នឹងទៅដល់ក្រុងតេអេរ៉ង់ នៅថ្ងៃសៅរ៍ចុងសប្តាហ៍នេះ។
ចុះផ្សាយនៅថ្ងៃ៖
ស្តាប់ - ០២:២៣
តើកិច្ចព្រមព្រៀងនុយក្លេអ៊ែរអ៊ីរ៉ង់ អាចនឹងមានសង្ឃឹមថាអាចមានជីវិតរស់ឡើងវិញទេ ជាមួយនឹងការមកដល់ របស់លោករដ្ឋបាលអាមេរិកថ្មី ដឹកនាំដោយលោកចូ បៃដិន?
ប្រមុខការទូតប្រទេសអឺរ៉ុប បារាំង អង់គ្លេស និងអាល្លឺម៉ង់ កំពុងខំប្រឹងប្រែងយ៉ាងសស្រាក់សស្រាំង ដើម្បីស្រោចស្រង់កិច្ចព្រមព្រៀងនេះ តាមរយៈការរៀបចំឲ្យមានការសន្ទនាគ្នា ជាមួយនឹងរដ្ឋាភិបាលអាមេរិក។ យោងតាមអ្នកនាំពាក្យក្រសួងការបរទេសបារាំង លោក Jean-Yves Le Drian រដ្ឋមន្ត្រីការបរទេសបារាំង នឹងអញ្ជើញ លោក Heiko Maas រដ្ឋមន្ត្រីការបរទេសអាល្លឺម៉ង់ និងលោក Dominic Raab រដ្ឋមន្ត្រីការបរទេសអង់គ្លេស ឲ្យមកប្រជុំនៅប៉ារីស នៅថ្ងៃព្រហស្បតិ៍ទី១៨កុម្ភៈ។ ចំណែកលោក អង់តូនី ប្ល៊ីងកិន ប្រមុខការបរទេសអាេមរិក នឹងចូលរួមកិច្ចប្រជុំនេះ ពីចំងាយតាមប្រព័ន្ធវីដេអូខុសហ្វឺរិនស៍។
ដោយឡែក កាលពីថ្ងៃអង្គារដើមសប្តាហ៍នេះ ទីភ្នាក់ងារថាមពលនុយក្លេអ៊ែរអន្តរជាតិ AIEA បានអះអាងថា អ៊ីរ៉ង់មានចេតនា ហាមឃាត់ការចុះទៅត្រួតពិនិត្យ នៅទីតាំងថាមពលនុយក្លេអ៊ែរមួយចំនួន ចាប់ពីថ្ងៃទី២៣កុម្ភៈទៅ។ ក្រោយដំណឹងនេះ លោក Rafael Grossi ប្រធាន AIEA បានស្នើសុំទៅភាគីអ៊ីរ៉ង់ ថាលោកនឹងទៅដល់ក្រុងតេអេរ៉ង់ នៅថ្ងៃសៅរ៍ ទី២០កុម្ភៈ ដើម្បីពិក្សាគ្នាអំពីបញ្ហាទាំងនេះ។ លោក ហាសាន រ៉ូហានី ប្រធានាធិបតីអ៊ីរ៉ង់ បានឆ្លើយតបវិញថា អ៊ីរ៉ង់សូមស្វាគមន៍ ហើយត្រៀមខ្លួនចរចា ជាមួយលោកប្រធាន AIEA ជានិច្ច។
គួរបញ្ជាក់ថា រដ្ឋាភិបាលថ្មីរបស់លោកចូ បៃដិន បានបង្ហាញជំហរថា ចង់ត្រលប់មកចូលរួមក្នុងកិច្ចព្រមព្រៀងនុយក្លេអ៊ែរអ៊ីរ៉ង់វិញ ក៏ប៉ុន្តែ តោងត្រូវអ៊ីរ៉ង់ គោរពលក្ខខណ្ឌទាំងអស់ឡើងវិញ ដែលមានចែងក្នុងកិច្ចព្រមព្រៀងនេះ។ ក៏ប៉ុន្តែ ភាគីអ៊ីរ៉ង់ បានឆ្លើយតបថា អ៊ីរ៉ង់ធ្លាប់បានគោរពលក្ខខណ្ឌទាំងអស់ តែផ្ទុយទៅវិញ អាមេរិកទេដែលមិនគោរព ហើយបានដកខ្លួនចេញពីកិច្ចព្រមព្រៀង និងបានដាក់ទណ្ឌកម្មសេដ្ឋកិច្ចលើអ៊ីរ៉ង់។ ដូច្នេះ បើចង់ឲ្យអ៊ីរ៉ង់ត្រលប់មកគោរពកិច្ចព្រមព្រៀងនេះវិញ គឺអាមេរិក ត្រូវតែលុបទណ្ឌកម្មសេដ្ឋកិច្ច ដែលបានដាក់មកល់អ៊ីរ៉ង់ទាំងអស់ ជាមុនសិន។ បន្ថែមពីនេះទៀត អ៊ីរ៉ង់ បានបដិសេធ មិនពង្រីកវិសាលភាព នៃខ្លឹមសារកិច្ចព្រមព្រៀងដើម ឲ្យក្តោបទាំងសំណុំរឿងមីស៊ីលបាលីស្ទីក ដូចអ្វីដែលរដ្ឋាភិបាលអាមេរិក ចង់បាននោះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ