ក្រុមប្រទេសនាំប្រេងចេញបើកកិច្ចប្រជុំដើម្បីកំណត់ពីបរិមាណប្រេងដែលត្រូវបូម
នៅថ្ងៃចន្ទ ទី៤ មករា ក្រុមប្រទេសនាំប្រេងចេញ និងក្រុមប្រទេសដៃគូដែលហៅកាត់ Opep+ បានរួមប្រជុំគ្នាតាមវីដេអូ។ កម្មវត្ថុនៃកិច្ចប្រជុំ គឺដើម្បីកំណត់ពីបរិមាណប្រេងដែលត្រូវបូមសម្រាប់ផ្គត់ផ្គង់ដល់តម្រូវការពិភពលោកនាពេលខាងមុខ។ គួរបញ្ជាក់ថានារយៈពេលប៉ុន្មានឆ្នាំកន្លងទៅ តម្រូវការ និងតម្លៃប្រេងនៅលើទីផ្សារអន្តរជាតិបានធ្លាក់ចុះគួរឲ្យកត់សម្គាល់។ ក្នុងឆ្នាំ ២០២០ ដែលទើបបិទបញ្ចប់ថ្មីៗនេះ វិស័យប្រេងក៏ជាវិស័យមួយដែលបាន និងកំពុងបន្តរងគ្រោះដោយវិបត្តិកូវីដ១៩ ដែរ។
ចុះផ្សាយនៅថ្ងៃ៖
ស្តាប់ - ០២:២៦
ខណៈដែលពិភពលោកកំពុងបន្តញាំញីដោយជំងឺកូវីដ១៩ និងចំពេលដែលស្ថានភាពសេដ្ឋកិច្ចក្នុងលោកកំពុងបន្តស្រពិចស្រពិល ក្រុមប្រទេសនាំប្រេងចេញ និងក្រុមប្រទេសដៃគូដែលហៅកាត់ Opep+ ក៏ពិបាកនឹងកំណត់ឲ្យបានច្បាស់ពីបរិមាណប្រេងដែលត្រូវបូមលក់ដែរ។ អ៊ីចឹងហើយបានជាចាប់ពីពេលនេះតទៅ និងដើម្បីរក្សាតម្លៃប្រេងកុំឲ្យធ្លាក់ថ្លៃថែមទៀត Opep+ គ្រោងប្រជុំជារៀងរាល់ខែដើម្បីពិនិត្យមើលពីបរិមាណតម្រូវការ និងបរិមាណផ្គត់ផ្គង់ជាក់ស្តែង។
នៅក្នុងកិច្ចប្រជុំនៃគណៈកម្មាធិការ Opep+ នាថ្ងៃអាទិត្យ ទី៣ មករា លោកម៉ូហាម៉េដ បារគីនដូដែលជាអគ្គនាយកអង្គការនៃក្រុមប្រទេសនាំប្រេងចេញហៅកាត់ Opep បានរម្លឹកថា នៅក្នុងកិច្ចប្រជុំចុងក្រោយរបស់ Opep+ ពីថ្ងៃទី៣០ វិច្ឆិកាដល់ថ្ងៃទី៣ ធ្នូ ឆ្នាំ ២០២០ Opep+ បានបើកផ្លូវឲ្យមានការត្រឡប់វិញបន្តិចម្តងៗនូវការផ្គត់ផ្គង់ប្រេងលើទីផ្សារចំនួន ២លានបារីលក្នុងមួយថ្ងៃនាប៉ុន្មានខែខាងមុខ។ តែទន្ទឹមគ្នានេះ ក្រុមប្រទេសសមាជិក Opep+ ក៏បានបញ្ជាក់ពីការត្រៀមខ្លួនដើម្បីកែប្រែលើតួលេខនេះដោយផ្អែកលើលក្ខខណ្ឌ និងការវិវឌ្ឍន៍ជាក់ស្តែងរបស់ទីផ្សារ។
ជាមួយនឹងយុទ្ធសាស្រ្តនេះ Opep+ បានសម្រេចបូមប្រេងចំនួន ៥០០ ០០០បារីលក្នុងមួយថ្ងៃសម្រាប់ខែមករានេះ និងបានសន្យារួមប្រជុំគ្នានៅរៀងរាល់ដើមខែដើម្បីកំណត់ពីបរិមាណប្រេងដែលត្រូវបូមសម្រាប់ខែបន្ទាប់។ ជាក់ស្តែងនៅក្នុងកិច្ចប្រជុំតាមវីដេអូនាថ្ងៃចន្ទ ទី៤ មករានេះ គឺដើម្បីកំណត់ពីបរិមាណប្រេងដែលត្រូវបូមសម្រាប់ខែកុម្ភៈខាងមុខ។ តើសម្រាប់ឆ្នាំ ២០២១ តម្រូវការប្រេងក្នុងលោកអាចមានច្រើនជាងឆ្នាំ ២០២០ ឬ?។ នៅក្នុងរបាយការណ៍ប្រចាំខែចុងក្រោយរបស់ខ្លួន អង្គការនៃក្រុមប្រទេសនាំប្រេងចេញហៅកាត់ Opep មានការប្រយ័ត្នប្រយែងដោយព្យាករណ៍ពីតម្រូវការធ្លាក់ចុះជាងតម្រូវការកើនឡើង។
នៅក្នុងរបាយការណ៍ដដែល អង្គការ Opep បានលើកឡើងពីភាពមិនប្រាកដប្រជាដែលទាក់ទងនឹងការវិវឌ្ឍន៍របស់ជំងឺកូវីដ១៩ និងការផ្គត់ផ្គង់វ៉ាក់សាំង។ ទន្ទឹមគ្នានេះ របាយការណ៍ក៏បានបញ្ជាក់ពីផលប៉ះពាល់ដែលកើតចេញពីឥទ្ធិពលរបស់កូវីដ១៩ ទៅលើឥរិយាបថរបស់អ្នកប្រើប្រាស់ ពិសេសនៅក្នុងវិស័យដឹកជញ្ជូន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ