កូវីដ១៩៖ ឆ្លងរាលដាលលឿនពេក អ៊ីស្រាអែលបិទខ្ទប់ប្រទេសទាំងស្រុង សាជាថ្មី ៣សប្តាហ៍
នៅអ៊ីស្រាអែល ការឆ្លងរាលដាល មេរោគកូរ៉ូណាវីរុសថ្មី មានសន្ទុះខ្លាំងបំផុត ប៉ុន្មានសប្តាហ៍ចុងក្រោយនេះ។ បើប្រៀបធៀបទៅនឹងចំនួនប្រជាជនប្រមាណតែ៩លាននាក់ អ៊ីស្រាអែល ជាប្រទេសដែលមានអ្នកឆ្លងកូវីដ១៩ ច្រើនជាងគេលំដាប់ទី២ ពោលគឺប្រមាណជាង ១៥៥០០០នាក់។ ដោយសារតែពិធីបុណ្យចូលឆ្នាំ និងបុណ្យផ្សេងៗនៃប្រពៃណីសាសនាជ្វីហ្វ កាន់តែខិតជិតមកដល់ ដែលជាឱកាស ដែលប្រជាជនអ៊ីស្រាអែល ត្រូវជួបជុំគ្នាច្រើន រដ្ឋាភិបាលអ៊ីស្រាអែល បានសម្រេចនៅថ្ងៃទី១៤កញ្ញានេះ បិទខ្ទប់ប្រទេសទាំងស្រុងឡើងវិញ ក្នុងរយៈពេល៣សប្តាហ៍។
ចុះផ្សាយនៅថ្ងៃ៖
មានប្រជាជន៩លាននាក់ អ៊ីស្រាអែល មានអ្នកផ្ទុកកូវីដ១៩ ចំនួន ១៥៥៦០៤នាក់ ដែលក្នុងនេះ មានស្លាប់១១១៩នាក់ គិតត្រឹមថ្ងៃទី១៤កញ្ញា។ នេះគឺជាកម្រិតឆ្លងរាលដាល ខ្ពស់បំផុតលំដាប់ទី២ បើប្រៀបធៀបទៅនឹងប្រទេសដ៏ទៃ ទូទាំងពិភពលោក។
គិតពីចុងខែសីហាមក ដែលសាលារៀនបានបើកទ្វារឡើងវិញនៅអ៊ីស្រាអែល ហើយកម្មវិធីបុណ្យ ឬមង្គលការ បានប្រារព្ធធ្វើយ៉ាងព្រោងព្រាត វាបានធ្វើឲ្យសន្ទុះនៃការឆ្លងរាលដាក នូវកូវីដ១៩ បានផ្ទុះឡើងខ្លាំងណាស់។ ប្រឈមនឹងបញ្ហានេះ កាលពីសប្តាហ៍មុន អាជ្ញាធរអ៊ីស្រាអែល បានព្យាយាម ចេញវិធានការ ហាមឃាត់ការធ្វើដំណើរ នៅតាមទីក្រុងនិងឃុំជាង៤០ ទូទាំងប្រទេស។ ក៏ប៉ុន្តែ នៅតែមិនអាចទប់ការឆ្លងរាលដាលកូវីដ១៩ បានដដែល។
ប៉ុន្មានថ្ងៃមកហើយ ដែលនៅក្នុងរដ្ឋាភិបាល មានការជជែកដេញដោល ប្រកែកគ្នា ដោយមួយក្រុមទាមទារឲ្យបិទខ្ទប់ប្រទេសទាំងស្រុងឡើងវិញ ឲ្យតឹងរឹងបំផុត ដើម្បីទប់ស្កាត់ការឆ្លងរាលដាល និងមួយក្រុមទៀត បានលើកឡើងថា ត្រូវបិទដោយផ្នែក និងតាមទីតាំង ដើម្បីកុំឲ្យសេដ្ឋកិច្ចត្រូវរាំងស្ទះ។ ទីបំផុត លោកណេតាន់យ៉ាហ៊ូ បានសម្រេចជ្រើសយកវិធានការខ្លាំង គឺបិទខ្ទប់ទាំងស្រុងឡើងវិញ រយៈពេល៣សប្តាហ៍។
ការបិទខ្ទប់ នឹងចូលជាធរមានទូទាំងប្រទេស ចាប់ពីថ្ងៃទីសុក្រទី ១៩កញ្ញា រហូតដល់ថ្ងៃទី៩ ខែតុលា។ ក្នុងអំឡុងពេលនេះ គឺស្ថិតចំពេលនៃបុណ្យប្រពៃណីសាសនាជ្វីហ្វ ដូចជាបុណ្យ Rosh Hashana ដែលជាបុណ្យចូលឆ្នាំថ្មីជ្វីហ្វ បន្ទាប់មកបុណ្យបួស Yom Kippour និងបុណ្យ Soukkot។ ក្នុងអំឡុងពេល៣សប្តាហ៍នេះ ការជួបជុំមិនថាក្នុងរង្វង់គ្រួសារ ឬការសូត្រធម៌នៅតាមវិហារ Synagogues មិនអាចអោយលើសពី១០នាក់បានទេ បើសិនជាកន្លែងបិទជិត និង២០នាក់ នៅកន្លែងហាលវាលបើកចំហរ។
លោកណេតាន់យ៉ាហ៊ូ នាយករដ្ឋមន្ត្រីអ៊ីស្រាអែល បានបញ្ជាក់ថា ឆ្នាំនេះមិនអាចដូចឆ្នាំមុនៗឡើយ ហើយប្រជាជនត្រូវតែខិតខំអត់ធ្មត់ ព្រោះកម្មវត្ថុរបស់រដ្ឋាភិបាល គឺដើម្បីតែការពារសុខភាពរបស់ប្រជាជនតែប៉ុណ្ណោះ។ ដោយឡែក នៅមុនការប្រកាសបិទខ្ទប់ប្រទេសទាំងស្រុងឡើងវិញនេះ លោក Yaacov Litzman ប្រធានបក្សអ៊ុលត្រាអកតូដុកជ្វីហ្វ ដែលជាដៃគូ ក្នុងរដ្ឋាភិបាលលោកណេតាន់យ៉ាហ៊ូ បានសម្រេចដើរចេញពីរដ្ឋាភិបាល ដើម្បីបញ្ជាក់ពីការជំទាស់ ក្នុងបិទខ្ទប់ប្រទេសទាំងស្រុងនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ