រដ្ឋមន្ត្រីការបរទេសលីបង់ សុំលាចុះពីតំណែង ព្រោះខ្វែងគំនិតគ្នាចំពោះកំណែទម្រង់ជាតិ
នៅតំបន់ដើមបូព៌ាពីថ្ងៃចន្ទ ប្រមុខការទូតលីបង់ លោក ណាស៊ីវ ហ៊ីទី (Nassif Hitti) ដែលទើបតែកាន់តំណែងបានជាងកន្លះឆ្នាំ បានសម្រេចសុំលាចុះពីមុខតំណែង។ លោករដ្ឋមន្ត្រីការបរទេសលីបង់ អះអាងថា ការលាឈប់នេះ ពីព្រោះតែលោកពុំអាចបំពេញមុខងារឱ្យបានល្អសម្រាប់ប្រទេសជាតិ នៅក្នុងកាលៈទេសៈមួយដ៏លំបាកតឹងតែងបំផុត ហើយថ្នាក់ដឹកនាំនយោបាយ មានច្រើននិន្នាការ មានគំនិតមិនចុះសម្រុងគ្នា ហើយ គ្មានឆន្ទៈកែទម្រង់ស៊ីជម្រៅ ទៅតាមការចង់បានរបស់ប្រជាពលរដ្ឋនិងសហគមន៍អន្តរជាតិ។
ចុះផ្សាយនៅថ្ងៃ៖
ស្តាប់ - ០២:០៩
ការលាឈប់ពីតំណែងរបស់រដ្ឋមន្ត្រីការបរទេសរូបនេះ បង្ហាញពីភាពធ្លាក់ដុបដាបកាន់តែខ្លាំងរបស់ លីបង់។ ប្រទេសនេះ ជួបបញ្ហាសេដ្ឋកិច្ចនិងនយោបាយ ច្រើនឆ្នាំមកហើយ ដោះស្រាយមិនចេញ។ ពលរដ្ឋចុះផ្លូវតវ៉ា ចោទរដ្ឋថាពុករលួយ។ វិបត្តិសេដ្ឋកិច្ចរ៉ាំរៃ ហើយត្រូវជួបវិបត្តិកូវីដ១៩ ដែលធ្វើឱ្យសេដ្ឋកិច្ចជាតិកាន់តែទ្រុឌទ្រោម។ ទំនិញឡើងថ្លៃ លុយកាក់ចុះថោក ជាន់លើវិបត្តិអត់ការងារកើនកាន់ខ្ពស់។ ពលរដ្ឋលីបង់៣៥ភាគរយគ្មានការងារធ្វើ ហើយប្រជាជនជាងពាក់កណ្តាល រស់នៅក្នុងភាពក្រីក្រ។ ដង្ហើមសេដ្ឋកិច្ចរបស់ លីបង់ ត្រូវការកែទម្រង់ ជាចាំបាច់។ តាំងតែពីឧសភាមក លីបង់ បានទទូចសុំជំនួយនិងសុំខ្ចីលុយ១០ពាន់លានដុល្លារ ពីអង្គការរូបិយវត្ថុអន្តរជាតិ ដើម្បីស្តារសេដ្ឋកិច្ច។
ការសុំដកខ្លួនរបស់ប្រមុខការទូត ដែលជាតំណាងឱ្យបុគ្គលចង់កែទម្រង់ នយោបាយនិងសេដ្ឋកិច្ច រូបនេះ គឺត្រូវគេឃើញថា ធ្វើឡើងក្រោយពីដំណើរទស្សនកិច្ច ថ្ងៃទី២៣កក្កដា របស់រដ្ឋមន្ត្រីការបរទេសបារាំង ទៅលីបង់។ បារាំង ដែលអះអាងថាចង់ជួយលីបង់ គឺចង់ឃើញ លីបង់ កែទម្រង់សេដ្ឋកិច្ច ពិសេសផ្នែកដែលពាក់ព័ន្ធនឹងសហគ្រាស ក្រុមហ៊ុនឯកជន និងការជួយទ្រទ្រង់ដល់សហគ្រាសធនតូចនិងធម្យម។ ក៏ប៉ុន្តែ បារាំងហាក់កាត់សម្គាល់ថា ថ្នាក់ដឹកនាំនយោបាយលីបង់ ហាក់គ្មានយន្តការកែទម្រង់ស៊ីជម្រៅសោះ ត្រង់វិស័យនេះ។
រដ្ឋមន្ត្រីការទូតលីបង់ដែលសុំលាឈប់ ដឹងយ៉ាងច្បាស់ពីចំណុចនេះ។ លោក ណាស៊ីវ ហ៊ីទី សរសេរក្នុងសេចក្តីថ្លែងការណ៍សុំលាឈប់ពីតំណែង ថា ពីមុនមក លោកសម្រេចចិត្តជួររដ្ឋាភិបាលព្រោះចង់បម្រើជាតិ តែពេលនេះ ជាតិមានមនុស្សដឹកនាំច្រើនគ្នាពេក មានផលប្រយោជន៍បក្សពួកខ្វែងគ្នាពេក ធ្វើឱ្យរូបលោកមិនអាចធ្វើការបានល្អ តាមការចង់បាននោះ ហេតុនេះលោកសុំដើរចេញហើយ។
ដោយឡែក ចំពោះនយោបាយការបរទេសវិញ អ្នកវិភាគនយោបាយលីបង់ បញ្ជាក់ដែរថា លោករដ្ឋមន្ត្រី ហាក់មានគោលជំហរខ្វែងគ្នានឹងនាយករដ្ឋមន្ត្រីលីបង់ Hassan Diab ចំពោះបន្ទាត់នយោបាយអន្តរជាតិ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ