លោកអាបេចង់ជួបប្រជុំជាមួយលោកគីម ជុងអ៊ុន ដើម្បីដោះស្រាយបញ្ហាមិនទុកចិត្តគ្នា
នាយករដ្ឋមន្ត្រីជប៉ុនលោកស្ហីនហ្សូ អាបេ បាននិយាយនៅថ្ងៃចន្ទ ទី ២៨ មករា នេះថា ជប៉ុន ប្រាកដនឹងអាចបំបែកនូវរាល់បញ្ហាមិនទុកចិត្តគ្នា ជាមួយនឹងប្រទេសកូរ៉ខាងជើងបាន ប្រសិនណាបើ លោកអាចជួបចរចាទល់មុខគ្នា ជាមួយនឹងលោកគីម ជុងអ៊ុន។ បន្ថែមលើនេះ លោកអាបេ ក៏សង្ឃឹមយ៉ាងមុតមាំដែរថា ការជួបពិភាក្សាទ្វេភាគីរវាងលោក និងមេដឹកនាំកូរ៉េខាងជើងគឺលោកគីម ជុងអ៊ុន ក៏អាចនឹងស្តារទំនាក់ទំនងរវាងប្រទេសទាំងពីរ ដែលធ្លាប់តែមានឈ្មោះក្នុងប្រវត្តិសាស្ត្រថាជាសត្រូវនឹងគ្នានោះ។
ចុះផ្សាយនៅថ្ងៃ៖ កែប្រែថ្ងៃទី៖
“ខ្ញុំនឹងខិតខំប្រឹងប្រែង ឲ្យអស់ពីចិត្តពីថ្លើម ហើយមិនធ្វើឲ្យបាត់បង់នូវរាល់ឳកាស ក្នុងការដោះស្រាយឲ្យបាននូវភាពមិនទុកចិត្តគ្នាទៅវិញទៅមករវាងប្រទេសជប៉ុន និងកូរ៉េខាងជើងឡើយ។ រូបខ្ញុំផ្ទាល់ នឹងជួបទល់មុខគ្នាជាមួយលោកប្រធានគីម ជុងអ៊ុន …ដើម្បីដោះស្រាយបញ្ហាអាវុធនុយក្លេអ៊ែរ និងមីស៊ីល របស់កូរ៉េខាងជើង ព្រមទាំងការចាប់ពង្រត់ពលរដ្ឋជប៉ុននៅក្នុងទឹកដីកូរ៉េខាងជើង”។ នេះ គឺជាការថ្លែងរបស់លោកស្ហីន ហ្សូអាបេ ធ្វើឡើងក្នុងពេលបើកកិច្ចប្រជុំសភាជាតិ។
ទោះបីជាលោកអាបេ បានលើកឡើងអំពីគម្រោងជួបជាមួយ ប្រមុខដឹកនាំកូរ៉េខាងជើងយ៉ាងណាក្តី ក៏ប៉ុន្តែលោកមិនបានបញ្ជាក់ប្រាប់អំពីកាលបរិច្ឆេទ នៃកិច្ចប្រជុំក៏កម្រនេះនៅឡើយទេ។ តែទោះជាបែបនេះក្តី គេមើលឃើញថា លោកអាបេ បានលើកឡើងពីផែនការ ជួបពិភាក្សានេះ គឺក្រោយពីមានលេចឮដំណឹង អំពីជំនួបលើកទី២ រវាងប្រធានាធិបតីអាមេរិក គឺលោកដូណាល់ ត្រាំ និងលោកគីម ជុងអ៊ុ ដែលគ្រោងនឹងប្រព្រឹត្តនៅចុងខែកុម្ភៈ ឆ្នាំ២០១៩ នេះ។
សូមជ្រាបថា ការលើកឡើងរបស់លោកនាយករដ្ឋមន្ត្រីជប៉ុន ពីចេតនាចង់ផ្សះផ្សារទំនាក់ទំនងជាមួយកូរ៉េខាងជើង នាខណៈនេះ គឺខុសគ្នាផ្ទុយស្រលះ ពីឆន្ទៈរបស់លោកកាលពីឆ្នាំកន្លងទៅ។ កាលពីឆ្នាំ ២០១៨ លោកអាបេ បានថ្លែងដោយសម្តីមុតមុត ក្នុងរដ្ឋសភា អំពីវិធានការក្តៅ ដើម្បីពត់កូរ៉េខាងជើងឲ្យផ្លាស់ប្តូរគោលនយោបាយដឹកនាំ និងថាកម្មវិធីផលិតអាវុធនុយក្លេអ៊ែរ និងមីស៊ីល របស់កូរ៉េខាងជើង គឺជាការគំរាមកំហែងដ៏សែនគ្រោះថ្នាក់បំផុត។
សូមជ្រាបថា ទោះបីជា លោកអាបេ បានបង្ហាញពីចេតនាល្អ ទៅរករបបដឹកនាំកូរ៉េខាងជើងយ៉ាងណាក្តី តែរហូតមកដល់ពេលនេះ គេនៅមិនទាន់ឃើញលោកគីម ជុងអ៊ុន បញ្ចេញប្រតិកម្ម ថាចង់ជួបលោកអាបេវិញឬក៏អត់នោះទេ។
ដោយឡែក រឿងដ៏គួរឲ្យកត់សម្គាល់នោះ គឺថា គេតែងតែឃើញបណ្តាញសារព័ត៌មានរដ្ឋរបស់កូរ៉េខាងជើងផ្សព្វផ្សាយយ៉ាងសកម្មអំពីទង្វើរបស់ជប៉ុនក្នុងសម័យសង្គ្រាម និងការបង្កើនថវិកាលើវិស័យការពារជាតិរបស់រដ្ឋាភិបាលជប៉ុននាពេលសព្វថ្ងៃនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ