កូរ៉េខាងជើងអះអាងពីសមត្ថភាពផលិតក្បាលគ្រាប់នុយក្លេអ៊ែរដែលអាចបំពាក់លើមីស៊ីល
ប្រមុខដឹកនាំកូរ៉េខាងជើង លោក គីម ជុងអ៊ុន បានអះអាងថា ក្រុមអ្នកវិទ្យាសាស្រ្តកូរ៉េខាងជើងបានទទួលជោគជ័យក្នុងការផលិតក្បាលគ្រាប់នុយក្លេអ៊ែរដែលមានទំហំតូចល្មមអាចនឹងបំពាក់លើមីស៊ីលបាលីស្ទិកបានហើយ នៅពេលនេះ។ ក៏ប៉ុន្តែ ក្រុមអ្នកជំនាញខាងនុយក្លេអ៊ែរហាក់ដូចជានៅតែមានមន្ទិលសង្ស័យច្រើននៅឡើយ លើការអះអាងនេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០០
នេះមិនមែនជាលើកទីមួយទេ ដែលកូរ៉េខាងជើងអះអាងអំពីភាពជឿនលឿន ក្នុងការផលិតក្បាលគ្រាប់នុយក្លេអ៊ែរ ដែលអាចប្រើប្រាស់វាយប្រហារលើគូសត្រូវរបស់ខ្លួនបាន។ ក៏ប៉ុន្តែ នេះគឺជាលើកទីមួយ ដែលមេដឹកនាំកូរ៉េខាងជើងប្រកាសច្បាស់ៗ អំពីសមត្ថភាពផលិតក្បាលគ្រាប់នុយក្លេអ៊ែរ ដែលមានទំហំតូចល្មមអាចបំពាក់លើមីស៊ីលបាលីស្ទិកបាន។
បណ្តាញព័ត៌មានរដ្ឋរបស់កូរ៉េខាងជើងក៏បានចុះផ្សាយផងដែរនូវរូបថតរបស់លោកគីម ជុងអ៊ុន ដែលកំពុងឈរក្បែរវត្ថុរាងស្វ៊ែរមួយ ដែលគេអះអាងថា ជាប្រភេទក្បាលគ្រាប់នុយក្លេអ៊ែរទំនើបថ្មី ដែលកូរ៉េខាងជើងទើបនឹងផលិតបាន។ លោកគីម ជុងអ៊ុន ក៏បានអះអាងផងដែរថា ក្បាលគ្រាប់នុយក្លេអ៊ែរថ្មីនេះ គឺជាក្បាលគ្រាប់ទែរម៉ូនុយក្លេអ៊ែរ (Thermonuclear) ឬគ្រាប់បែកអ៊ីដ្រូសែន ដែលជាប្រភេទអាវុធនុយក្លេអ៊ែរដ៏ទំនើប និងមានកម្លាំងផ្ទុះខ្លាំងជាងគ្រាប់បែកនុយក្លេអ៊ែរធម្មតា។
អ្នកជំនាញអន្តរជាតិខាងអាវុធនុយក្លេអ៊ែរវិញបានលើកឡើងថា វត្ថុរាងស្វ៊ែរដែលបង្ហាញនៅក្នុងរូបថតចុះផ្សាយដោយសារព័ត៌មានកូរ៉េខាងជើង គឺពិតជាមានរូបរាងដូចក្បាលគ្រាប់នុយក្លេអ៊ែរសម្រាប់ប្រើបំពាក់លើមីស៊ីលបាលីស្ទិកបានមែន ក៏ប៉ុន្តែ ទោះជាយ៉ាងណា បើគ្រាន់តែសំអាងលើរូបថតមួយសន្លឹកនេះ គេមិនអាចធ្វើការវិនិច្ឆ័យថា តើនេះជាក្បាលគ្រាប់នុយក្លេអ៊ែរពិតប្រាកដមែនដែរឬក៏យ៉ាងនោះទេ។
គួរបញ្ជាក់ថា រហូតមកទល់នឹងពេលនេះ អ្នកជំនាញស្ទើរតែគ្រប់រូបសុទ្ធតែទទួលស្គាល់ថា កូរ៉េខាងជើងពិតជាមានសមត្ថភាពក្នុងការផលិតក្បាលគ្រាប់នុយក្លេអ៊ែរបានមែន ក៏ប៉ុន្តែ ក្បាលគ្រាប់ដែលផលិតបាននេះមានទំហំធំ ដែលមិនអាចបំពាក់លើមីស៊ីល ដើម្បីធ្វើការវាយប្រហារទៅលើគូសត្រូវបាននោះទេ។
បើទោះបីជាមានការអះអាងជាច្រើនលើកពីសំណាក់មេដឹកនាំកូរ៉េខាងជើង អំពីសមត្ថភាពផលិតក្បាលគ្រាប់នុយក្លេអ៊ែរទំហំតូច ក៏ប៉ុន្តែ គេនៅតែមានមន្ទិលសង្ស័យ ដោយសារតែគេសង្កេតឃើញថា នៅរាល់ពេលដែលកូរ៉េខាងជើងធ្វើការសាកល្បងអាវុធនុយក្លេអ៊ែររបស់ខ្លួន រួមទាំងការសាកល្បងថ្មីចុងក្រោយ កាលពីខែមករាកន្លងទៅនេះ សុទ្ធតែត្រូវបានធ្វើឡើង ក្នុងរូបភាពជាការចុចបំផ្ទុះគ្រាប់បែកនុយក្លេអ៊ែរនៅក្រោមដីទាំងអស់ ដោយ មិនឃើញមានការសាកល្បងដោយបំពាក់ក្បាលគ្រាប់នុយក្លេអែរលើមីស៊ីលនោះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ