លោក នេត្រ ភក្ត្រា៖ រដ្ឋាភិបាលលើកទឹកចិត្តក្រុមហ៊ុនកែច្នៃសំរាម មកវិនិយោគ ដោយជួយបន្ធូរបន្ថយពន្ធផ្សេងៗ
ចុះផ្សាយនៅថ្ងៃ៖
ស្តាប់ - ១១:២២
នៅខេត្តព្រះសីហនុ មានទីលានចាក់សំរាម ដែលសាងសង់ឡើងស្របតាម«បទដ្ឋានបច្ចេកទេសត្រឹមត្រូវ»និងជាទីលានចាក់សំរាមទី១ នៅកម្ពុជា ដែលអាចផ្ទុកកាកសំណល់យ៉ាងច្រើន។ ក្រសួងបរិស្ថានឲ្យដឹងថា នៅពេលខាងមុខទៀត គឺខេត្តចំនួន៦ ដែលនឹងមានទីលានចាក់សំរាមស្របតាម«បទដ្ឋានបច្ចេកទេសត្រឹមត្រូវ»យ៉ាងដូច្នេះ។ទោះយ៉ាងណាក្តី ប្រសិនបើថ្លែងពីការកែច្នៃសំរាមវិញ គឺមានក្រុមហ៊ុនសហគ្រាសតិចតួចនៅឡើយ។ អ្នកនាំពាក្យក្រសួងបរិស្ថាន លោក នេត្រ ភក្ត្រា ថ្លែងប្រាប់វិទ្យុបារាំងថ្ងៃនេះថា រដ្ឋាភិបាល សូមលើកទឹកចិត្តក្រុមហ៊ុនសហគ្រាស ឲ្យមករស៊ីខាងកែច្នៃសំរាម ក្នុងនោះ រដ្ឋនឹងជួយសម្រួលនិងបន្ធូរបន្ថយពន្ធផ្សេងៗ តួយ៉ាង ជួយបន្ថយតម្លៃភ្លើងក្នុងដំណើរការចម្រាញ់កាកសំណល់ ជាដើម។
