លោកអ៊ូ ច័ន្ទរ័ត្ន៖គណបក្សថ្មីកែទម្រង់កម្ពុជានឹងផ្អាកសកម្មភាពភ្លាម បើសិនអតីតគណបក្សសង្រ្គោះជាតិរស់ឡើងវិញ
ចុះផ្សាយនៅថ្ងៃ៖
ស្តាប់ - ១២:៤៣
គណបក្សថ្មីកែទម្រង់កម្ពុជាបានចុះបញ្ជីជាផ្លូវការហើយនៅក្រសួងមហាផ្ទៃនៅព្រឹកថ្ងៃចន្ទនេះ។ លោកអ៊ូ ច័ន្ទរ័ត្ន អតីតអ្នកតំណាងរាស្រ្តនៃអតីតគណបក្សសង្គ្រោះជាតិ និង ជាស្ថានិកគណបក្សនយោបាយថ្មីនេះ បានអះអាងប្រាប់វិទ្យុបារាំងអន្តរជាតិជាថ្មីថា គណបក្សកែទម្រង់កម្ពុជាមិនប្រជែងជាមួយអតីតបក្សប្រឆាំងឡើយ។ មិនតែប៉ុណ្ណោះ លោកថែមទាំងគូសបញ្ជាក់ថា គណបក្សនេះនៅតែរក្សាជំហរទទួលយកលោកកឹម សុខា ឬលោកសម រង្ស៊ី មកដឹកនាំគណបក្ស ប្រសិនបើពួកគេទទួលបានសិទ្ធិធ្វើនយោបាយឡើងវិញ ហើយចង់មកដឹកនាំនោះ។ ផ្ទុយទៅវិញ បើសិនជាអតីតគណបក្សសង្រ្គោះជាតិអាចរស់ឡើងវិញនៅថ្ងៃណាមួយនោះ គឺគណបក្សកែទម្រង់កម្ពុជា នឹងផ្អាកសកម្មភាពនយោបាយរបស់ខ្លួនភា្លម។