អង្គការសិទ្ធិមនុស្ស៖សកម្មជនបរិស្ថានគួរតែត្រូវបានលើកទឹកចិត្ត ជៀសជាងការចាប់កាត់ទោសដាក់គុក
ចុះផ្សាយនៅថ្ងៃ៖
ស្តាប់ - ០៩:៥៣
ម្សិលមិញ សាលាដំបូងរាជធានីភ្នំពេញបានកាត់ទោសកម្មជនបរិស្ថាន និងសង្គមចំនួន១០នាក់ ឱ្យជាប់ពន្ធនាគារចំនួន ២០ខែ និងពិន័យជាប្រាក់ម្នាក់ៗចំនួន ២លានរៀលពីបទញុះញង់។ ប៉ុន្តែ ពួកគេត្រូវតម្រូវឱ្យអនុវត្តទោសជាប់ពន្ធនាគារម្នាក់ៗពី១៤ទៅ១៥ខែ ដោយទោសនៅសល់ផ្សេងទៀតត្រូវបានព្យួរ។ ត្បិតថាបែបនេះមែន ប៉ុន្តែអង្គការការពារសិទ្ធិមនុស្សនៅកម្ពុជា បានលើកឡើងថា វាជារឿងអយុត្តិធម៌សម្រាប់ពួកគេ និងថា ជារូបភាពគំរាមកំហែងលើសកម្មជនដទៃទៀត។ ជាមួយគ្នានេះ អង្គការការពារសិទ្ធិមនុស្សចង់ឱ្យអាជ្ញាធរកម្ពុជាលើកទឹកចិត្ត និងគាំពារពួកគេថែមទៀត។ ប៉ុន្តែ មន្រ្តីខាងយុត្តិធម៌ និងសិទ្ធិមនុស្សកម្ពុជាអះអាងថា ការលើកទឹកចិត្តណាមួយមិនអាចធ្វើបានទេសម្រាប់អ្នកដែលប្រព្រឹត្តខុស។