ក្រោយខកខានដោយសារវិបត្តិកូវីដ ក្រុមសៀកហ្វារត្រលប់មកសំដែងនៅប្រទេសបារាំង
ចុះផ្សាយនៅថ្ងៃ៖
ស្តាប់ - ១០:២៧
បន្ទាប់ពីខកខានមិនបានសម្តែង ទៅតាមគម្រោង កាលពីឆ្នាំ២០២០ ដោយសារវិធានការបិទខ្ទប់ប្រទេសបារាំងដោយទាន់ហន់ ក្នុងកាលៈទេសៈកូវីដ សិល្បករខ្មែរ ១៣នាក់ របស់ក្រុមហ៊ុនហ្វារThe CambodianCircus ក្នុងខេត្តសៀមរាប ត្រូវចេញទៅសំដែងម្តងទៀត នៅខែ វិច្ឆិកា និងថ្ងៃទី ១៦ខែធ្នូនេះ នៅប្រទេសបារាំង។ ផ្ទុយស្រឡះពីឆ្នាំមុន ដែលការសំដែងត្រូវលុបចោលទៅវិញ ដោយសារជំងឺកូវីដឆ្លងរាតត្បាតខ្លាំង អ្នករៀបចំកម្មវិធីសំដែងនៅប្រទេសបារាំង លោក ហ្សាវីយ៉េ ហ្គោបាំង Xavier Gobin ជឿជាក់មុតមាំថា កម្មវិធីសំដែងលើកនេះ នឹងប្រព្រឹត្តទៅតាមការគ្រោងទុក។ ជឿជាក់ព្រោះថា មានមនុស្សជាច្រើននៅប្រទេសបារាំង ដែលបានទទួលចាក់វ៉ាក់សាំង ដើម្បីអាចចូលមើលកុនល្ខោន ការសំដែងទស្សនីយភាព ដោយសេរី ដូចមុនសម័យកូវីដ។
នៅប្រទេសបារាំង ការសំដែងជាផ្លូវការរបស់សិល្បករសៀកខ្មែរ ក្រុមហ៊ុនហ្វារThe cambodian Circus នឹងចាប់ផ្តើមនៅពាក់កណ្តាលខែ វិច្ឆិកា រហូតដល់ថ្ងៃទី ១៦ធ្នូចុងឆ្នាំនេះ។ ប៉ុន្តែ នៅលើទំព័រហ្វេសប៊ុក និងវិបសៃតិ៍របស់ក្រុមហ៊ុនហ្វារ បានប្រកាសផ្សព្វផ្សាយដំណឹងស្តីពីការសំដែងសៀកនៅទឹកដីបារាំង តាំងពីដើមខែកញ្ញា។ លោក Xavier Gobin ធ្លាប់ធ្វើការជាមួយសិល្បករសៀកហ្វារ ជាច្រើនឆ្នាំ ជាម្ចាស់ក្រុមហ៊ុនHors Jeu នៅប្រទេសបារាំង ដែលទទួលចាត់ចែង ការសំដែងរបស់ក្រុមសិល្បករសៀកខ្មែរលើកនេះ។
តាមលោក Xavier Gobinកម្មវិធីសំដែងលើកនេះ អាចរៀបចំទៅបាន ដោយមកពីមានជាប់កិច្ចសន្យាកាលពីឆ្នាំមុន។ គួររំលឹកថា បន្ទាប់ពី បានធ្វើដំណើរមកដល់បារាំង នៅអំឡុងខែតុលា ហាត់សមបាន២សប្តាហ៍ និងរៀបតែចេញសំដែងលើឆាកទៅហើយ រដ្ឋាភិបាលបារាំងបានប្រកាសបិទខ្ទប់ប្រទេសជាលើកទី២ ដើម្បីទប់ស្កាត់ការឆ្លងរាលដាលជំងឺកូវីដ។ ជាលទ្ធផល រោងល្ខោន ឆាកសំដែងនានា ត្រូវបិទទ្វារ មិនអាចទទួលសិល្បករខ្មែរ។ តាមការពន្យល់របស់លោក Xavier Gobin ទោះគ្មានការសំដែង រោងល្ខោនមិនបានលុបចោលទាំងស្រុង នោះទេ គឺគ្រាន់តែលើកពេលតែប៉ុណ្ណោះ។ គេអាចនិយាយបានថា ការសំដែងលើកនេះ គឺធ្វើទៅតាមកិច្ចសន្យា ចុះ កាលពីឆ្នាំមុន។
លោក Xavier Gobinមិនត្រឹមតែមិនបារម្ភ ផ្ទុយទៅវិញ សប្បាយចិត្តជាប់ ព្រោះថា រោងល្ខោនភាគច្រើនបានប្រាប់តែដំណឹងល្អស្តីពីចំនួនសំបុត្រដែលគេចាប់លក់រួចហើយ ដូចជានៅវិបសៃតិ៍ Cinema Théatre de choisy le roi ជាយក្រុងប៉ារីសជាដើម។
មានមនុស្សទិញសំបុត្របណ្តើរៗ ប៉ុន្តែ លោក Xavier Gobinចង់ឲ្យប្រជាជនខ្មែរនៅបារាំង ចូលមើលការសំដែងរបស់សិល្បករខ្មែរឲ្យបានច្រើនផងដែរ។ ហេតុអ្វីបានជាគេត្រូវចំណាយថវិកា ចំណាយពេលវេលាទៅមើលការសំដែងរបស់សិល្បករហ្វារ។ ស្តាប់លោក Xavier Gobin ដែលពិព័រណ៌នាជាភាសាខ្មែរ ប្រជាជនខ្មែរ ដែលរស់នៅប្រទេសបារាំង ប្រាកដជានឹកចង់ទៅមើលឲ្យឃើញ នឹងភ្នែកម្តង។
សាច់រឿង និងការសំដែងបែបបង្កើតថ្មី អាចល្អទាក់ទាញ ប៉ុន្តែ បើសិនគេដឹងពីប្រវត្តិ និងរចនាសម្ព័ន្ធ សមាជិក ក្នុងក្រុមហ្វារ នោះគេរឹតតែច្បាស់ក្នុងចិត្តថា ការសំដែងសៀករបស់ក្រុមសិល្បករខ្មែរ ហ្វារ The Cambodian Circus រឹតតែពិសេស។
លោក Xavier Gobin សង្ឃឹមថា នឹងទទួលបានប្រាក់ចំណូលពីការលក់សំបុត្រដើម្បី ជួយលើកទឹកចិត្តការងាររបស់សិល្បករដែលអាក់ខានមិនបានសំដែងជាងមួយឆ្នាំមកហើយ នៅសៀមរាប ដោយសារតែវិបត្តិកូវីដ។ គ្មានការសំដែង សិល្បករ និងក្រុមគ្រួសាររបស់ពួកគេ កំពុង ជួបការលំបាកផ្នែកថវិកា សម្រាប់ទ្រទ្រង់ជីវិត។
ការលក់សំបុត្រមាននៅតាមវិបសៃតិ៍របស់រោងល្ខោននីមួយៗ៖
NIORT – Moulin du Roc: 24 – 25 Nov 2021
CHOISY LE ROI – Théâtre Paul Eluard: 28 Nov 2021
MULHOUSE – La Filature: 30 Nov – 4 Dec 2021
CHAMBERY – Théâtre Malraux: 7 – 11 Dec 2021
VANNES – Scenes du Golfe: 14 Dec 2021
ARCACHON – L’Olympia: 17 Dec 2021
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ