មនុស្សស្និទ្ធនឹងលោក កែម ឡី៖ លោកបណ្ឌិតធ្លាប់ប្រាប់កុំឲ្យរត់ចោលប្រទេស ទោះក្នុងកាលៈទេសៈអ្វីក៏ដោយ
ចុះផ្សាយនៅថ្ងៃ៖
ស្តាប់ - ១១:៣៧
ថ្ងៃទី១០ខែកក្កដាឆ្នាំ២០២១នេះគឺជាខួបគម្រប់៥ឆ្នាំនៃការបាញ់សម្លាប់អ្នកវិភាគសង្គមលោកបណ្ឌិត កែម ឡី នៅកណ្ដាលទីក្រុងភ្នំពេញ។ នៅក្នុងរយៈពេល៥ឆ្នាំកន្លងមកនេះ អ្នកនិយមស្ដាប់បទវិភាគរបស់លោក លែងបានឮសំឡេងរបស់លោក កែម ឡី តាមបណ្ដាញផ្សព្វផ្សាយផ្សេងៗទៀតហើយ។ ទោះលែងបានស្ដាប់ពាក្យពេចន៍ថ្មីៗក៏ពិតមែន តែពាក្យបណ្ដាំចាស់ៗ ត្រូវបានគាស់រំលើងមកវិញជាថ្មីដូចជាពាក្យថា៖ «ខ្ញុំមិនដែលគិតថាខ្លួនឯងនៅមានជីវិតទេ ក្រោយវិភាគម្ដងៗ»។ នាឱកាសខួប៥ឆ្នាំនៃមរណភាពលោក កែម ឡី អេង គីមហុង បានជជែកជាមួយមនុស្សមួយចំនួនដែលមានទំនាក់ទំនងស្និទ្ធនឹងលោក កែម ឡី។ អ្នកទាំងនោះបានរំឭកពីបណ្ដាំរបស់លោក កែម ឡី ដែលប្រាប់ពួកគេកុំឲ្យរត់ចោលប្រទេស ទោះជាស្រុកទេស កើតមានរឿងអ្វីក៏ដោយ។
ថ្ងៃនេះ៥ឆ្នាំមុនគេនៅតែចង់ចាំមិនភ្លេចរូបភាព លោកបណ្ឌិត កែម ឡី បានដេកស្លាប់នៅក្នុងថ្លុកឈាមក្រហមឆ្អៅនៅកណ្ដាលហាងលក់ទំនិញក្រោមស្នាដៃបាញ់ប្រហាររបស់ឃាតករ។ កាលណោះភ្លាមៗក្រោយទទួលបានដំណឹងអំពីការស្លាប់របស់លោក កែម ឡី មហាជនក្មេង ចាស់ ប្រុស ស្រី ជាច្រើនរយនាក់ដែលនិយមស្ដាប់បទវិភាគរបស់លោកបានសម្រុកនាំគ្នាទៅដល់កន្លែងកើតហេតុជាមួយនឹងសម្រែកសោកសង្រេងលាយឡំដោយទឹកភ្នែកទាមទារយុត្តិធម៌ជូនលោក កែម ឡី។ «កែម ឡី ស្លាប់ព្រោះជាតិខ្មែរទេ! គាត់ជាបញ្ញាវ័ន្តមួយរូបចេះដឹងណាស់ ហេតុអ្វីបានជាមកសម្លាប់គាត់? គាត់ធ្វើគ្រប់យ៉ាងដើម្បីតែខ្មែរទេ ម៉េចបានមកសម្លាប់គាត់………? នៅក្នុងទិដ្ឋភាពនេះកាលពី៥ឆ្នាំមុនស្ថិតនៅបរិវេណការ៉ាស់សាំងកាលតិចស្តុបបូកគោ មហាជននិងកម្លាំងសមត្ថកិច្ចកំពុងបញ្ជ្រៀតគ្នាយ៉ាងណែនណាន់តាន់តាប់ ដោយអ្នកខ្លះស្រែកស្ម័គ្រចិត្តសែងសពលោកកែម ឡី ដើម្បីឆ្ពោះទៅកន្លែងតម្កល់នៅវត្តចាស់ខណ្ឌជ្រោយចង្វារ ខណៈសពបានបិទភ្នែកជិតនិងបានរេទៅរេមកតាមកម្លាំងរុញច្រាន។
ក្នុងពេលអតីតកាលលោកបណ្ឌិត កែម ឡី ធ្លាប់និយាយថា សេចក្ដីស្លាប់មិនមែនជារឿងគួរឲ្យខ្លាចសម្រាប់លោកទេ។«វិភាគម្ដងៗយើងមិនដែលគិតថា យើងត្រូវមានជីវិតទេព្រោះយើងស្ថិតនៅក្នុងប្រទេសមួយដែលមានខ្លាច្រើន ពស់វែកច្រើន ឆ្លាមច្រើន ប៉ុន្តែបើយើងនាំគ្នាខ្លាចយើងអត់មានលទ្ធភាពផ្ដល់គំរូដល់យុវជននិងកែប្រែប្រទេសយើងទេ អ៊ីចឹងហើយបានជាខ្ញុំហ៊ាននិយាយបែបនេះ។»
យុវជនពីរនាក់ដែលជាបងប្អូនភ្លោះប្រុសឈ្មោះជុំ ហួត ជុំ ហួរ និងជាមនុស្សស្និទ្ធនឹងលោក កែម ឡី បានលើកឡើងថា ថ្ងៃទី១០កក្កដាឆ្នាំ២០១៦ ថ្ងៃដែលឃាតករបាញ់សម្លាប់លោក កែម ឡី គឺជាថ្ងៃតែមួយដែលពួកគេត្រៀមជួបលោក កែម ឡី ពិភាក្សាលើការងារមួយចំនួន។ «តែមុនថ្ងៃជំនួបមកដល់ពូ( កែម ឡី) ប្រាប់ខ្ញុំឲ្យពួកខ្ញុំប្រយ័ត្នខ្លួនព្រោះគាត់មានអារម្មណ៍[អត់ល្អ]នៅក្នុងចិត្តទេ ។ ហើយខ្ញុំប្រាប់គាត់ថា បើពូមិនស្រណុកក្នុងចិត្ត យើងអាចដូរទីតាំងជួបគ្នាបាន គាត់ថាមិនអីទេ។ ខ្ញុំក៏តាមគាត់រៀបចំខ្លូនចេញទៅជួបគាត់នៅថ្ងៃអាទិត្យ ដល់ជិះបានពាក់កណ្ដាលផ្លូវក៏មានគេតេប្រាប់មិនដឹងថា ជានរណាប្រាប់ថា មិនបាច់មកទេ កែម ឡី ត្រូវបានគេបាញ់សម្លាប់ហើយ អ៊ីចឹងខ្ញុំក៏សន្និដ្ឋានថា បែបមានគេលួចតាមដានការឆ្លងឆ្លើយគ្នារវាងខ្ញុំនិងពូ។ តាមគម្រោងពូជួបពួកខ្ញុំពីរនាក់បងប្អូនហើយត្រៀមជួបជាមួយលោកបណ្ឌិត មាស នី ផងដែរ។»
ទំនាក់ទំនងស្គាល់រាប់អានលោក កែម ឡី មិនមែនជារឿងចៃដន្យសម្រាប់បងប្អូនភ្លោះទាំងពីរទេ។ ស្គាល់ដំបូងតាមរយៈការតាមដានស្ដាប់បទវិភាគរបស់លោកបណ្ឌិតនៅតាមស្ថានីយវិទ្យុនានា បន្ទាប់មកក៏ជួបផ្ទាល់នៅក្នុងព្រឹត្តការណ៍តវ៉ាទាមទារឲ្យរដ្ឋាភិបាលរៀបចំការបោះឆ្នោតឡើងវិញនៅក្នុងឆ្នាំ២០១៣។ ភាពស្និទ្ធស្នាល និងផ្ដើមធ្វើការរួមគ្នាក៏បានកើតមានឡើង នៅក្នុងជំនួបលើកទី២នៅពេលដែល ជុំ ហួត ជុំ ហួរ ចុះទៅតំបន់អារ៉ែងជួបប្រសព្វជាមួយលោក កែម ឡី។«ក្រោយចេញពីតំបន់អារ៉ែងគាត់(កែម ឡី) បានណាត់ជួបពួកខ្ញុំ ដើម្បីរិះរកវិធីសាស្ត្រឬយុទ្ធសាស្ត្រធ្វើយ៉ាងណាទប់ស្កាត់ កុំឲ្យក្រុមហ៊ុនស៊ីណូហាយត្រូ សាងសង់ទំនប់វារីអគ្គិសនីនៅតំបន់អារ៉ែង។ ហើយតាំងពីពេលហ្នុងមកពួកខ្ញុំនិងពូមានទំនាក់ទំនងជាមួយគ្នាជារឿយៗរហូតគាត់ឲ្យខ្ញុំកាន់គម្រោងមួយទាក់ទងទំនប់វារីអគ្គិសនីដនសាហុង អ៊ីចឹងខ្ញុំនិងពូមានទំនាក់ទំនងជាមួយគ្នារហូតមកដល់ថ្ងៃដែលគេបាញ់សម្លាប់គាត់។»
នៅអំឡុងពេលបំពេញការងាររួមគ្នាបងប្អូនភ្លោះទាំងពីរនាក់ឲ្យដឹងថា លោក កែម ឡី តែងតែប្រាប់បញ្ហាដែលគាត់ជួបប្រទះទៅកាន់ពួកគេជាពិសេសការគំរាមកំហែងនិងការចរចា។ «ជារឿយៗគាត់តែងជជែកជាមួយពួកខ្ញុំនៅពេលដែលគាត់ទទួលបានសារអ្វីមួយ ហើយមូលហេតុដែលគាត់ជជែកជាមួយពួកខ្ញុំដោយសារយើងធ្វើការក្នុងគម្រោងជាមួយគ្នាតែងតែមានការទាក់ទងគ្នាជាប់ជានិច្ច។»
៥ឆ្នាំក្រោយមរណភាពលោក កែម ឡី អ្វីដែលបងប្អូនប្រុសទាំងពីរចង់ចាំមិនភ្លេចនូវបណ្ដាំលោកបណ្ឌិតគឺកុំរត់ចោលប្រទេសជាតិទោះស្ថិតនៅក្នុងកាលៈទេសៈណាក៏ដោយ។«ពេលនៅរស់គាត់តែងតែប្រាប់ ពួកខ្ញុំជានិច្ចថា ទុកប្រយោជន៍ប្រទេសជាតិជាធំ កុំប៉ះពាល់ប្រជាពលរដ្ឋ។ ក្នុងនាមជាកូនខ្មែរលំបាកប៉ុណ្ណាកុំទៅណាចោលប្រទេសជាតិយើង។»
បច្ចុប្បន្នបងប្អូនប្រុសទាំងពីរបន្តអនុវត្តការទូន្មានប្រៀនប្រដៅរបស់លោក កែម ឡី និងឈានជើងចូលប្រឡូកក្នុងជីវិតនយោបាយដែលខ្លួនស្រឡាញ់និងធ្លាប់មានការជម្រុញពីលោក កែម ឡី។
ចំណែកលោក វ៉ន ពៅ ប្រធានសមាគមសេដ្ឋកិច្ចក្រៅប្រព័ន្ធបានប្រាប់ថា លោកបានជួបលោក កែម ឡី ពីរខែមុនឃាតករបាញ់សម្លាប់ នៅក្នុងទិវាពលកម្មអន្តរជាតិ១ឧសភានៅស្តាតអូឡាំពិក។«កាលណោះលោក កែម ឡី ធ្លាប់សន្យានឹងជួយសមាគមសេដ្ឋកិច្ចក្រៅប្រព័ន្ធរបស់ខ្ញុំតទៅទៀត នៅពេលដែលគាត់ចប់យុទ្ធនាការ១០០រាត្រី។»បើតាមលោក វ៉ន ពៅ លោក កែម ឡី បានចង់ក្រងយុទ្ធសាស្ត្រជាច្រើនក្នុងការជួយកម្មករសេដ្ឋកិច្ចក្រៅប្រព័ន្ធទទួលបានយុត្តិធម៌សង្គមស្មើគ្នា។
សម្រាប់លោក វ៉ន ពៅ អនុស្សាវរីយ៍ដែលចង់ចាំមិនភ្លេចគឺលោក កែម ឡី បានយួរបាយមួយស្រាក់ទៅសួរសុខទុក្ខដល់ពន្ធធនាគារព្រៃស។«ខ្ញុំចាំមិនភ្លេចទេស្នាមញញឹមយួរបាយមួយស្រាក់របស់លោកបណ្ឌិតកែម ឡី ពេលនោះគាត់និយាយថា គាត់បែបមានវាសនាត្រឹមតែជាប់ពន្ធនាគារទេមើលទៅ។ ហើយនៅពេលដឹងថា គេបាញ់សម្លាប់គាត់ខ្ញុំមានការឈឺចាប់ដូចយកកាំបិតមកចាក់បេះដួងអ៊ីចឹង!អ្វីដែលចង់ចាំមិនភ្លេចនោះគឺជូនទឹកភ្នែករួចបន្តដំណើរទៅមុនទៀត។»
ក្រៅពី«ជូតទឹកភ្នែករួចបន្តដំណើរទៅមុខទៀត»ពាក្យពេចន៍ច្រើនទៀតរបស់លោក កែម ឡី ត្រូវបានកត់ចំណាំចាំទុកដូចជាពាក្យ«និយាយការពិតកុំនិយាយការពារ»។ ត្រង់ចំណុចនេះ លោកបណ្ឌិតបានអំពាវនាវឲ្យយុវជនមានសេចក្ដីក្លាហានក្នុងការនិយាយការពិត តែការពិតនោះត្រូវមានភស្តុតាង និងលក្ខណៈវិទ្យាសាស្ត្រប្រកបដោយសីលធម៌ខ្ពស់ឲ្យបានច្រើនជាងអធិប្បាតាមអារម្មណ៍៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ