និន្នាការប្រើប្រាស់ផលិតផលថែរក្សាសុខភាពនិងសម្រស់តាមគ្នាកំពុងពេញនិយមនៅកម្ពុជា
ចុះផ្សាយនៅថ្ងៃ៖
ស្តាប់ - ០៨:៤១
បច្ចេកវិទ្យាកាន់តែទំនើប សន្ទុះនៃការប្រើប្រាស់ផលិតផលថែរក្សាសុខភាពនិងសម្រស់តាមការឃោសនាកំពុងមានការពេញនិយមពីសំណាក់ពលរដ្ឋខ្មែរភាគច្រើន។ នេះជាការសង្កេតរបស់អ្នកជំនាញផ្នែកសុខភាពសាធារណៈ។ ទន្ទឹមគ្នានេះ អ្នកធ្លាប់រងគ្រោះពីការប្រើប្រាស់ផលិតផលថែរក្សាសុខភាព និងសម្រស់ តាមការអូសទាញស្នើឲ្យពលរដ្ឋទូទៅ ជាពិសេសយុវវ័យគិតបន្តិចសិន មុននឹងសម្រេចចិត្តប្រើប្រាស់អ្វីមួយ និងជាពិសេស បើមិនចង់ឲ្យការសម្រេចចិត្តខុសមួយថ្ងៃ ក្លាយជាវិប្បដិសារីពេញមួយជីវិត។
«អូហ៌! សាកលេបថ្នាំនឹងទៅល្អ ថ្នាំហ្នឹងអ្នកទឹកនោមផ្អែមក៏លេបត្រូវដែរ... ប្រើផលិតផលម៉ាកអីបានមុខស្អាតអ៊ីចឹង?» ទាំងអស់នេះ គេតែងឮចេញពីមាត់មនុស្សគ្រប់រូប មិនថា ក្មេងចាស់ប្រុសស្រីនោះទេ នៅក្នុងជីវភាពរស់នៅសព្វថ្ងៃនេះ។
ការគិតគូរពីសុខភាព និងសម្រស់មិនមែនជាកំហុសដែលត្រូវស្ដីបន្ទោសនោះទេ ប៉ុន្តែការស្ដីបន្ទោសនឹងកើតមានឡើង នៅពេលគ្រប់គ្នាប្រើប្រាស់ផលិតផលថែរក្សាសុខភាព និងសម្រស់តាមឃោសនាដោយខ្វះការប្រឹក្សាពីអ្នកជំនាញ។ «ពីដំបូងខ្ញុំសាកប្រើផលិតផលថែរក្សាសម្ភស្សដោយសារខ្ញុំចង់ស្អាត ហើយកាលពីជំនាន់ហ្នុង ខ្ញុំទើបតែមានអាយុ២១ទៅ២២ទេ គឺខ្ញុំឃើញគេស្អាត ខ្ញុំចង់ស្អាតដូចគេ ហើយការប្រើប្រាស់ផលិតហ្នឹងទៀតសោត ខ្ញុំអត់ដឹងថាជាផលិតផលអ្វីឡើយ។ ទីបំផុតអ្វីដែលយើងធ្វើតាមគេហ្នឹង មុខខ្ញុំវាមិនស្អាតឡើយ ដោយសារខ្ញុំចង់ស្អាតលឿន រួមផ្សំនឹងការជំរុញពីមិត្តភក្តិទៀត។» នេះជាស្ថានភាពពិតរបស់លោកពិសិដ្ឋ បន្ទាប់ពីលោកធ្លាក់ខ្លួនជាជនរងគ្រោះដោយសារអារម្មណ៍ចង់ស្អាតមួយពេល។
មានបញ្ហាលើផ្ទៃមុខបន្ទាប់ពីប្រើប្រាស់ផលិតតាមការជំរុញពីមិត្តភក្ដិ លោកពិសិដ្ឋ ជាឈ្មោះសន្មត់ បានបន្តថា នៅពេលប្រើប្រាស់ផលិតផលថែរក្សាសម្ភស្សលើកទី១មិនសមបំណង លោកក៏បន្តប្រើប្រាស់ផលិតផលថ្មីដើម្បីព្យាបាលស្លាកស្នាមចាស់«បន្ទាប់ពីមុខឡើងកន្ទួល ហើយមានមុនទៀតនោះ ជំរុញឲ្យខ្ញុំបន្តស្វែងរកផលិតផលផ្សេងៗទៀតដើម្បីកែខៃ ប៉ុន្តែនៅតែអត់អាចជួយអីបាន។ សាច់មុខក៏កាន់តែស្ដើងដោយសារខ្ញុំប្រើប្រាស់ផលិតផលប្រភេទ [កាត់] ខ្លាំងពេក។ ខ្ញុំក៏មិនបញ្ឈប់ត្រឹមនេះដែរ ដោយបន្តប្រើនេះប្រើនោះតាមតែគេប្រាប់ ព្រោះឃើញគេប្រើទៅត្រូវ គិតថា ខ្លួនឯងអាចនឹងត្រូវដូចគេ។»
ជាមនុស្សបានសម្ដី លោកពិសិដ្ឋបន្តថា រាល់ផលិតផលថែរក្សាសម្រស់បុគ្គល (ក) ប្រើត្រូវមិនប្រាកដថា (ខ) ប្រើត្រូវនោះទេព្រោះស្ថានភាពសុខភាពមនុស្សម្នាក់ៗខុសគ្នា។ បើសិនជាយើងចង់ប្រើឱសថឬអាហារបំប៉នសុខភាពសម្រាប់សុខភាព រាងកាយ ស្បែក និងសម្រស់ យើងទៅពិនិត្យសុខភាពសិនថា អាចទទួលទានផលិតផលទាំងអស់ហ្នឹងបានដែរអត់? ពិសេសផលិតផលថែទាំស្បែក! ខ្ញុំឃើញគេនិយមប្រើផលិតផលលក់តាមអនឡាញ ខ្ញុំអត់វាយប្រហារថា រាល់ផលិតផលលក់តាមអនឡាញមិនល្អទេ ប៉ុន្តែផលិតផលខ្លះវារើសស្បែកមុខណាស់ មិនមែនផលិតផលតែមួយមុខហ្នឹងត្រូវគ្រប់ស្បែកមុខទេ។ អ៊ីចឹងបើមិនចង់ជួបរឿងស្ដាយក្រោយដូចខ្ញុំ មុនប្រើសុំទៅពិនិត្យស្បែកមុខសិនដើម្បីចង់ដឹងថា ស្បែកមុខយើងហ្នឹងត្រូវនឹងផលិតផលអ្វី ប្រតិកម្មនឹងផលិតផលអ្វី? ទោះជាផលប៉ះពាល់ពេលនេះមិនទាន់ស្ដែងចេញក៏ដោយ តែវានឹងបង្ហាញក្នុងពេលអនាគត។»
បន្ទាប់ពីជួបបទពិសោធជូរចត់ដែលបណ្ដាលមកពីការប្រើប្រាស់ផលិតផលតាមការឃោសនាមិនសមបំណងរួចមក លោកពិសិដ្ឋក៏ងាកមកស្វែងរកសេវាព្យាបាលសម្រស់តាមបែបវេជ្ជសាស្ត្រវិញម្ដង។ «ដំណាក់កាលចុងក្រោយនេះ ខ្ញុំទៅទទួលការព្យាបាលនៅពេទ្យសើស្បែក ហើយបច្ចុប្បន្នមុខខ្ញុំក៏ល្អប្រសើរឡើងវិញ៧០ភាគរយ។ ខ្ញុំបញ្ជាក់ម្ដងទៀត បើសិនជាចង់ស្អាតសុំយុវវ័យក្មេងចាស់ប្រុសស្រី ទៅរកអ្នកជំនាញ ព្រោះស្បែកមុខមនុស្សខុសៗគ្នា។» បើតាមលោកពិសិដ្ឋ លោកចំណាយលុយខ្ទង់ពាន់ដុល្លារ ទម្រាំស្បែកមុខឲ្យវិលមកភាពដូចដើមវិញ។
ចំណែកអ្នកស្រីណារី ដែលមានរាងស្គមខ្ពស់ស្ដើង សម្បុរខ្មៅស្រអែម ដែលកំពុងប្រើប្រាស់ថ្នាំថែរក្សាសម្រស់ ជាប្រភេទថ្នាំបំប៉នស្បែកឲ្យដឹងថា បច្ចុប្បន្នផលប៉ះពាល់នៅចំពោះមុខ អ្នកស្រីមិនទាន់ជួបប្រទះនៅឡើយទេ ប៉ុន្តែភាពជាក់ស្ដែងសម្បុរស្បែក អ្នកស្រីមានការផ្លាស់ប្ដូរពីស្រអាប់មកភ្លឺ។ «បន្ទាប់ពីលេបថ្នាំបំប៉នស្បែកជិតមួយឆ្នាំមកនេះ ខ្ញុំមិនទាន់មានអាការៈអ្វី ប្រែប្រួលនៅឡើយទេ ប៉ុន្តែពេលអនាគត រងការរំខានបែបណានោះ ខ្ញុំក៏មិនដឹងដែរ ព្រោះខ្ញុំតែងតែឮគេថា ពេលខាងមុខខ្ញុំអាចប្រឈមជាមួយនឹងបញ្ហាក្រលៀន តម្រងនោមជាដើម បន្ទាប់ពីលេបថ្នាំថែរក្សាសម្រស់។»
តិចឬច្រើន អ្នកស្រីណារី នៅមានក្ដីបារម្ភខ្លាចជួបបញ្ហាក្រលៀននៅពេលអនាគតដែរ បន្ទាប់ពីប្រើប្រាស់ថ្នាំរក្សាសម្រស់ និងផ្ដល់សំណើមដល់ស្បែករយៈពេល៤ឆ្នាំមកនេះ។ ប៉ុន្តែយ៉ាងណាក៏ដោយ ស្រីវ័យជាង៣០ឆ្នាំរូបនេះជឿជាក់លើផលិតផលដែលខ្លួនកំពុងប្រើ ព្រោះជាផលិតផលពីប្រទេសកាណាដា។ «អ្វីដែលខ្ញុំជឿជាក់លើផលិតផលកំពុងប្រើប្រាស់[ហ្នឹង] នៅស្រុកគេដាក់លក់នៅក្នុងម៉ាត ហើយមានការទទួលស្គាល់ពីក្រសួងសុខាភិបាលស្រុកគេ អ៊ីចឹងហើយបានខ្ញុំជឿជាក់ថាពេលប្រើទៅមិនប៉ះពាល់ដល់សុខភាពរបស់ខ្ញុំ។»
នៅចំពោះមុខភាពសម្បូរបែបនៃផលិតផលថែរក្សាសម្រស់និងសុខភាព មិនថាការចរាចរលើទីផ្សារឬអនឡាញនោះទេ អ្នកស្រីណារី លើកទឹកចិត្តដល់អ្នកប្រើប្រាស់ទូទៅ ថ្លឹងថ្លែងឲ្យល្អិតល្អន់មុនសម្រេចចិត្តប្រើ។ «ជីវិតយើងម្នាក់ៗមានតម្លៃណាស់ ទោះជារូបរាងយើងមិនស្អាត សម្បុរស្បែកយើងវាមិនល្អ តែវាមានន័យដែលយើងអាចរស់នៅលើភពផែនដីនេះបាន មើលទេសភាពស្រស់បំព្រង និងបៃតងតាមរដូវកាលរបស់វា។ ដូច្នេះ កុំប្រថុយគ្រោះថ្នាក់ប្រើប្រាស់ផលិតផលដែលគ្មានប្រភពច្បាស់លាស់ ដោយគ្រាន់តែឮការឃោសនាទិញ១ថែម៣។»
ជុំវិញបញ្ហានេះ អ្នកឯកទេសផ្នែកសុខភាពបានបង្ហាញក្ដីបារម្ភរួមគ្នាពីការចរាចរផលិតផលថែទាំសុខភាពយ៉ាងអនាធិបតេយ្យនៅកម្ពុជា ដូចជាប្រភេទអាហារបំប៉ន សារ៉ាយបំប៉ន កាហ្វេបំប៉នសុខភាពជាដើម។ «ប្រជាពលរដ្ឋត្រូវយល់ថា ពាក្យអាហារបំប៉ន អាហារសុខភាពជាដើមហ្នឹង មិនមែនជាថ្នាំសម្រាប់ព្យាបាលជំងឺទេ។ កុំភ្លេចថា អាហារបំប៉នទាំងអស់នេះ មានខ្លះស្របច្បាប់ ខ្លះមិនស្របច្បាប់ឬមិនមានការទទួលស្គាល់ពីក្រសួង ហើយប្រើប្រាស់ទៅបង្កផលប៉ះពាល់ដល់សុខភាពទៅវិញ។ ម្យ៉ាងទៀតអាហារបំប៉នខ្លះ ទោះជាមានការទទួលស្គាល់គុណភាពពីក្រសួងសុខាភិបាលក៏ដោយ តែមុនសម្រេចចិត្តប្រើប្រាស់ គួរណាមកជួបពិភាក្សាជាមួយគ្រូពេទ្យសិន។ វាមិនមែនគ្រាន់តែឃើញគេប្រើត្រូវយើងប្រើតាមគេទេ។» នេះជាការផ្ដាំផ្ញើរបស់លោកវេជ្ជបណ្ឌិត វី ឌុច្ជដា ដែលបានបញ្ចប់ការសិក្សានៅសាកលវិទ្យាល័យវិទ្យាសាស្រ្តសុខាភិបាល និងបានបញ្ចប់សិក្សានៅប្រទេសបារាំង ឯកទេសជំងឺទឹកនោមផ្អែម និង ក្រពេញ។
លោកវេជ្ជបណ្ឌិតបន្តថា ករណីខ្លះក្រុមហ៊ុនដែលទទួលបានសិទ្ធិអនុញ្ញាតពីក្រសួងសុខាភិបាលឲ្យចរាចរផលិតផលរបស់ខ្លួនលើទីផ្សារ បានបំពានលើខ្លឹមសារដែលបានកំណត់រួមគ្នា។ «ក្រសួងគេផ្ដល់អាជ្ញាប័ណ្ណឲ្យលក់មែន តែវាស្ថិតនៅក្នុងកម្រិតមួយប៉ុណ្ណា? មិនមែនកម្រិតព្យាបាលជំងឺទេ តែដល់ស្ដាប់ការផ្សព្វផ្សាយឬការនិយាយតៗគ្នាធ្វើឲ្យប្រជាជនយល់ច្រឡំថា អាហារបំប៉នប្រភេទណាមួយនោះ ព្យាបាលជំងឺរបស់គាត់ជា។»
លោកវេជ្ជបណ្ឌិត នុត សម្បត្តិ ប្រធានវិទ្យាស្ថានវេជ្ជសាស្ត្រ ជីវសាស្ត្រ និងកសិកម្ម នៃរាជបណ្ឌិតសភាកម្ពុជាមើលឃើញថា មួយផ្នែកដែលជំរុញពលរដ្ឋខ្មែរភាគច្រើននិយមប្រើប្រាស់ផលិតផលថែរក្សាសុខភាពនិងសម្រស់តាមគ្នា គឺដោយសារការផ្សព្វផ្សាយមានលក្ខណៈទូលំទូលាយ។ «ដោយសារបច្ចេកវិទ្យាមានការរីកចម្រើន ធ្វើឲ្យការលក់ផលិតផលតាមអនឡាញ ប្រព្រឹត្តទៅយ៉ាងរលូន ដោយផលិតផលទាំងអស់នោះ គ្មានការត្រួតពិនិត្យលក្ខណៈបច្ចេកទេសឲ្យបានត្រឹមត្រូវទេ។ ជាក់ស្ដែងអ្នកលាយឡេលក់ ហើយក្រៅពីឡេ អាហារបំប៉នសុខភាពដែលមានការធានានាំចូលពីប្រទេសនេះប្រទេសនោះ ខ្ញុំឆែកតាមអ្នកលក់ប្រាប់អត់ឃើញមានសោះ។ ដូច្នេះ នេះជាការភូតកុហក។»
អ្នកជំនាញសុខភាពកាន់តែព្រួយបារម្ភ នៅពេលដែលពលរដ្ឋខ្មែរមួយចំនួន សម្រេចប្រើប្រាស់ផលិតផលថែរក្សាសម្រស់ និងសុខភាពដោយគ្រាន់តែមើលលើរូបភាពខាងក្រៅរបស់អ្នកលក់ តាមរយៈសម្រស់ សម្ភារៈ ធនធាន អំពើមនុស្សធម៌ និងភាពល្បីល្បាញរបស់បុគ្គលនោះជាដើម។
ជុំវិញបញ្ហានេះ គេតែងឃើញកិច្ចអន្តរាគមន៍ពីក្រសួងសុខាភិបាលជាហូរហែរដែរ។ ជាក់ស្ដែងថ្មីៗនេះកាលពីថ្ងៃទី១៥ខែកុម្ភៈ ក្រសួងសុខាភិបាល បានចេញសេចក្ដីប្រកាសព័ត៌មានឲ្យផ្អាកចរាចរឱសថបុរាណឈ្មោះ GINENG KIANPI PIL ព្រោះវាជាផលិតផលក្លែងក្លាយដែលអាចប៉ះពាល់ដល់សុខភាពធ្ងន់ធ្ងរ ឬឈានដល់ការបាត់បង់ជីវិត។ ក្នុងករណីដែលឱសថស្ថាន ឬអ្នកលក់អនឡាញបន្តលក់ ពួកគេនឹងប្រឈមការដាក់ពន្ធនាគារពី៥ទៅ១០ឆ្នាំ និងពិន័យជាប្រាក់២០ ០០០ ០០០រៀលដល់៥០ ០០០ ០០០រៀល តាមច្បាប់ស្ដីពីការគ្រប់គ្រងឱសថ។ នៅក្នុងខែកុម្ភៈដដែល ក្រសួងសុខាភិបាលក៏បានជូនដំណឹងស្ដីពីការហាមឃាត់ការផ្សព្វផ្សាយលក់ឱសថCURMIN 500 Box\1 Bottle\100 Capsules ព្រោះគ្មានលេខបញ្ចីកាពីក្រសួងសុខាភិបាល និងមិនអាចធានាបាននូវគុណភាព និងសុវត្ថិភាពឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ