នរណាចង់ល្បងចូលរួម ក្នុងកម្មវិធី Dry January មិនទទួលទានជាតិសុរាសោះ ពេញមួយខែមករា ?
ចុះផ្សាយនៅថ្ងៃ៖
ស្តាប់ - ០៨:១៥
ខែមករាគ្មានជាតិសុរាសោះ ជាប្រតិបត្តិការលើកទីបីហើយ នៅប្រទេសបារាំង។ ប្រតិបត្តិការតាមគំរូប្រទេសអង់គ្លេស និងក្រុមប្រទេសនៅភាគខាងជើង មានគោលការណ៍សំខាន់ និងសាមញ្ញបំផុតគឺ មិនទទួលទានជាតិអាល់កុល (ស្រា ប៊ីយែរ ...)។ តើលោកអ្នកចង់សាកល្បងចូលរួមក្នុងកម្មវិធីនេះទេ ?
កាលពីឆ្នាំ២០២១ មានប្រជាពលរដ្ឋបារាំង១១% បានចូលរួមក្នុងកម្មវិធី មករាស្ងួត មួយខែគ្មានជាតិសុរាសោះ។ នៅឆ្នាំ២០២២នេះ ម្ចាស់កម្មវិធីសង្ឃឹមថានឹងមានអ្នកចូលរួមកាន់តែច្រើនជាងឆ្នាំមុន ព្រោះអាជ្ញាធរក្រុងធំៗ ព្រមទាំងក្រុមហ៊ុនសហគ្រាស ក៏បានសហការរៀបចំ កម្មវិធី មួយខែមករាគ្មានសុរា តែម្តង។ ចុះអ្នក តើលោកអ្នកត្រៀមលក្ខណៈ នឹងយកឈ្នះចិត្តខ្លួនឯង មិនទទួលទានជាតិស្រវឹងពេញមួយខែនឹងគេដែរឬទេ ?
មិនទទួលទានជាតិស្រវឹងអាល់កុលសោះ មួយខែ នោះអ្នកនឹងបានទទូលគុណប្រយោជន៍ ចំពោះសុខភាព ជាច្រើន និងដែលមើលឃើញភ្លាមៗ ៖
មិនផឹកសុរា អ្នកនឹងស្រកគីឡូ
មិនផឹកសុរា អ្នកនឹងសំរាន្តលក់ស្រួល និងមានថាមពលក្នុងខ្លួន
មិនផឹកសុរា ស្បែកអ្នកនឹងស្អាតជាងមុន
មិនផឹកសុរា ថ្លើមនឹងបានសម្រាក ហើយបំពេញតួនាទីរបស់ខ្លួនឡើងវិញ
មិនផឹកសុរា កង្វល់នឹងធ្លាក់ចុះ អារម្មណ៍នឹងលែងឡើងចុះ ងាយផ្ចង់អារម្មណ៍
នេះជាលទ្ធផលវិជ្ជមាន ស្តីពីការផ្អាកមិនទទួលទានសុរា ដែលអ្នកស្រាវជ្រាវបានសិក្សានៅក្នុងប្រទេសអង់គ្លេស អស់រយៈពេលជាច្រើនឆ្នាំ ព្រោះអង់គ្លេសបានផ្តួចផ្តើមគំនិតបង្កើតខែ មករាស្ងួតគ្មានសុរា តាំងពីឆ្នាំ២០១៣មក។ បើតាមការវាយតម្លៃរបស់ក្រុមអ្នកស្រាវជ្រាវអង់គ្លេសដដែល ផលល្អអាចមានច្រើន និងអាចយូរខ្លាំង ឬយូរល្មម ទៅតាមសមត្ថភាពនៃការតប និងការជំនះចិត្តរបស់អ្នក។ អ្នកវិទ្យាសាស្ត្របានសង្កេតឃើញមានផលល្អ រយៈពេលមធ្យមនិងយូរអង្វែងមួយទៀតគឺ ក្រោយពីផ្អាកសុរាអស់មួយខែ ទម្លាប់ទទួលទានសុរានឹងថយចុះបានមួយថ្ងៃក្នុងមួយសប្តាហ៍ ហើយនៅរាល់មានឱកាសជួបជុំគ្នា ការទទួលទានសុរាក៏តិចជាងមុន ចំនួនមួយកែវ។
បានដឹងអំពីផលល្អនៃការសម្រាកមិនទទួលទានសុរាមួយរយៈពេលមួយខែនេះហើយ តើលោកអ្នកចង់សាកល្បងទេ ? បើចង់ យើងសូមផ្តល់នូវសេចក្តីណែនាំ៥ចំណុច ដើម្បីសម្រេច Challenge របស់លោកអ្នក។
ទីមួយ បង្កើតក្រុម ៖
ធ្វើអ្វីជាក្រុមជាកត្តាដ៏សំខាន់នៃភាពជោគជ័យ។ ធ្វើតែម្នាក់ឯង លោកអ្នកក៏អាចទទួលជោគជ័យដែរ តែបើធ្វើជាក្រុម ជោគជ័យនឹងមានជាប្រាកដ។ ដូចពាក្យចាស់បុរាណខ្មែរតែងពោល ចង្កឹះមួយបាច់កាច់មិនបាក់ទេ។ លោកអ្នកធ្លាប់ប្រកួតប្រជែកផឹកជល់កែវជាមួយមិត្តភឿនមែនទេ ? ពេលនេះ សូមបបួលមិត្តភក្តិ មិត្តរួមការងារ ប្រណាំងប្រជែង មិនទទួលទានស្រា ប៊ីយ៉ែរ រយៈពេល៣១ថ្ងៃជាប់គ្នា ម្តងលមើល៎ តើនរណាខ្លាំងជាង និងអាចសម្រេចតាមពាក្យប្តេជ្ញាបានខ្លះ ? កំណត់កម្មវត្ថុនិងប្តេជ្ញាជាមួយគ្នាហើយ សូមបន្តណាត់ជួបគ្នា ទទួលទានអាហារនិងភេសជ្ជៈ គ្មានអាល់កុល។ នេះជាឱកាសនៃការប្តូរទម្លាប់ហើយ !
២- ពិចារណាអំពីបរិមាណអាល់កុលដែលអ្នកទទួលទាន
តើលោកអ្នកទទួលទានគ្រឿងស្រវឹងក្នុងបរិមាណប៉ុនណា ? តិច ទេ ប៉ុន្តែលោកអ្នកមិនចេះបដិសេធនៅ ពេលមិត្តភ័ក្តិបបួលជល់កែវឬ ? ឬក៏ត្រឹមមួយកែវម្តងម្កាល ? ឬក៏ច្រើន និងអាចច្រើនជ្រុលផង? សូមចំណាយពេលនាខែមករា Dry January នេះ ស្រាវជ្រាវ និងពង្រីកការយល់ដឹងអំពីជាតិអាល់កុល។ បើអ្នកបានយល់ដឹងអំពី ឥទ្ធិពលអាក្រក់របស់អាល់កុល អ្នកច្បាស់ជាចាប់ផ្តើមពិចារណាអំពីការទទួលទានសុរាហើយ។
៣- រៀបចំនិងត្រៀមលក្ខណៈជាមុន
ឧបមាថាអ្នកបានតាំងចិត្តមិនទទួលទានសុរាសោះក្នុងមួយខែមករានេះ មុននឹងចាប់ផ្តើមអ្នកត្រូវគិតទុកឱ្យហើយ និង ត្រៀមលក្ខណៈជាមុនថា បើមិនទៅ ផឹកស្រា តើត្រូវធ្វើអ្វី បើមានអារម្មណ៍ថាចង់ តើបានអ្វីមកជំនួស និងទប់ទល់?
មានមធ្យោបាយច្រើនណាស់ សម្រាប់មកជំនួសការអង្គុយផឹកស្រា។ សូមប្តូរទៅជាការស្តាប់ភ្លេង ធ្វើកីឡា ហាត់ប្រាណ ធ្វើម្ហូប រៀបចំផ្ទះ លេងប្រលែងជាមួយកូន
ចុះហើយបើត្រូវទៅជួបជុំចូលចំណោមមានកម្មវិធី គេមកជល់កែវ តើត្រូវបដិសេធយ៉ាងណា ? នេះ ជាអ្វីដែលពិបាកប្រឈមនិងជំនះ។ ប៉ុន្តែត្រូវយកឈ្នះឱ្យបាន។ មិនមែនជាការទៅយកឈ្នះយកចាញ់មនុស្សនៅជុំវិញខ្លួនទេ តែជាការឈ្នះសត្រូវខ្លួនឯង ដោយហ៊ាននិងចេះបដិសេធ។ ការជំនះខ្លួនឯងអាចសម្រេចទៅបាន ដោយមានត្រៀមលក្ខណៈជាមុន នូវពាក្យពេជន៍សម្រាប់ឆ្លើយប្រាប់ទៅដៃគូវិញ។ បើជាការបង្ខំខ្លាំង សូមនឹកគិតដល់ពេលវេលាដែលអ្នកស្រវឹងខ្លាំង និងគិតដល់សុខភាពរបស់អ្នក។និងការធ្វើបដិវត្តបានជោគជ័យ។
៤- ធ្វើឱ្យខុសពីគេ
បដិសេធមិនទទួលទានសុរា មិនមែនជាភាពទន់ខ្សោយរបស់អ្នកទេ ! តែបានបង្ហាញថា អ្នកជាអ្នក ! អ្នកខុសពីអ្នកដទៃ។ នៅពេលមានការរីករាយជួបជុំ មានបុណ្យមានទាន មានកម្មវិធីផ្សេង ត្រូវតែមានការស៊ីផឹកគ្រឿងស្រវឹង។ នេះជាទម្លាប់តាំងពីយូរយារមកហើយ មិនមែនទើមកើតឡើងក្នុងសម័យទំនើបនេះទេ។ ហេតុដូច្នេះហើយបានជាខួរក្បាលយើង ផ្តិតជាប់ថា ធ្វើពិធីគ្មានសុរា គ្មានន័យ-មិនសប្បាយទេ។ ដូច្នេះវាជាការធម្មតាដែរ ដែលនៅពេលអ្នកបដិសេធមិនទទួលទានស្រា អ្នកហាក់មានអារម្មណ៍ថាធ្វើខុសពីគេ និងប្លែកពីសង្គមនោះ។ ប៉ុន្តែ ជាការគិតខុស! សុរាអាចនឹងធ្វើឱ្យអ្នកលែងសូវអៀន ហើយចូលចុះក្នុងសង្គមគេ តែអ្នកជាមនុស្សយ៉ាងណានៅតែជាមនុស្សយ៉ាងនោះ។ អ្នកផ្សេងមិនយល់ក៏ហីទៅចុះ សំខាន់ស្អែកឡើងអ្នកមានសុខភាពល្អអារម្មណ៍ភ្លឺថ្លា។ សូមកុំភ្លេចថា ការផឹកស្រាគឺជាការធ្វើឱ្យដូចគេ ចំណែក ការមិនផឹក គឺជាការហ៊ានធ្វើខុសពីគេ។
៥- គិតដល់ពេលក្រោយភ្នាល់
ហ៊ានធ្វើខុសពីគេដើម្បីអ្វីទៅ ? គឺដើម្បីសុខភាពខ្លួនយើងផ្ទាល់ នៅពេលក្រោយទេ។ នេះជាអ្វីដែលអ្នកត្រូវគិត គិតដល់ពេលក្រោយ ពេលអនាគត។ មិនទទួលទានសុរាស្រវឹងក្អាកក្អាយ សោះរយៈពេលមួយខែ ធានាថាអ្នកនឹងមានអារម្មណ៍ល្អ និងមានមោទនភាពខ្លាំង ហើយអ្នកនឹងរកឃើញគុណសម្បត្តិនៃការប្រឹងតបសុរា ដូចដែលមានរៀបរាប់ពីខាងដើម។
មករាគ្មានសុរាមួយដំណក់ក្នុងពោះ អាចជាឱកាសសម្រាប់អ្នកបង្កើតទម្លាប់ថ្មី ! សូមប្រើពេលវេលានេះសម្រាប់ពិចារណា ថាតើការមិនទទួលទានសុរាសោះនឹងប្តូរផ្លាស់ជីវិតអ្នកយ៉ាងណា ? ផ្តល់ផលល្អយ៉ាងណា ? បន្ទាប់ពីផ្អាកសុរាអស់ពេញមួយខែមករា តើអ្នកចង់បន្តឈប់ពិសារសុរារហូតឬ? ឬក៏គិតត្រឹមកំរិតនិងកាត់បន្ថយការទទួលទានស្រា ? ទោះអ្នកសម្រេចចិត្តយ៉ាងណាក៏ដោយ ក៏ការអត់ស្រាមួយខែនេះពិតជានឹងធ្វើឱ្យបានស្រួលខ្លួន ស្រួលហោបៅ ជាប្រាកដ ! នេះជាមោទនភាពពិតរបស់អ្នក !
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ