អ្នកឧកញ៉ា គួច ម៉េងលី ស្នើស៊ើបអង្កេតលើក្រុមហ៊ុន CIC រឿងលុយរាប់សិបលានដុល្លារ
អ្នកឧកញ៉ា គួច ម៉េងលី បានចេញមុខទាមទារឲ្យមានការស៊ើបអង្កេតលើក្រុមហ៊ុន CIC Plc ដែលរងការចោទប្រកាន់ថា ក្លែងបន្លំប្រាក់វិនិយោគរួមគ្នារាប់សិបលានដុល្លារនៅពេលកន្លងមកនេះ។ បើតាមអ្នកឧកញ៉ារូបនេះ គឺមានគ្រួសារ និងជីវិតមនុស្សជាច្រើននាក់បានរងនូវផលប៉ះពាល់ និងការឈឺចាប់ដោយសារតែការក្លែងបន្លំរបស់ក្រុមហ៊ុននេះ។
ចុះផ្សាយនៅថ្ងៃ៖
ស្តាប់ - ០២:៤៥
ការចេញមុខរបស់អ្នកឧកញ៉ា គួច ម៉េងលី គឺស្របពេលដែលក្រុមអ្នកដាក់ប្រាក់វិនិយោគជាមួយក្រុមហ៊ុន CIC Plc បាននាំគ្នាតវ៉ាតាមបណ្តាញសង្គមជាយូរមកហើយ ប៉ុន្តែហាក់ដូចជាមិនទាន់មានដំណោះស្រាយ ខណៈ លោក ព្រាប កុល កន្លងមក បានចេញមុខបដិសេធថា លោកមិនបានពាក់ព័ន្ធក្នុងរឿងនេះទេ។
នៅក្នុងសំណេរទាំងភាសាខ្មែរ និងភាសាអង់គ្លេសនៅលើហ្វេសប៊ុក នៅថ្ងសទី២៣ខែមីនា ឆ្នាំ២០២៤ អ្នកឧកញ៉ា គួច ម៉េងលី បានគូសបញ្ជាក់ថា សំណុំរឿងព្រហ្មទណ្ឌ គួរតែត្រូវចាប់ផ្ដើម ស៊ើបអង្កេត និងដោយបើកចំហរ ហើយជនល្មើសត្រូវតែទទួលខុសត្រូវ ដោយកាត់ទោសតាមផ្លូវច្បាប់។
លោកវេជ្ជបណ្ឌិត គួច ម៉េងលី អះអាងថា ប្រជាជនស្លូតត្រង់ជាច្រើនកំពុងរងទុក្ខវេទនា ខូចចិត្ត និងទទួលរងនូវផលអវិជ្ជមានដោយសារតែគម្រោងកេងបន្លំស្រដៀងគ្នានឹង Ponzi ដែលកំពុងតែកើតឡើងនៅគ្រប់ទីកន្លែងក្នុងប្រទេសកម្ពុជា ខណៈ ឧក្រិដ្ឋជននៅតែមានសេរីភាព ហើយពួកគេកំពុងរស់នៅក្នុងជីវិតដ៏ឡូយឆាយ។
លោក គួច ម៉េងលី យល់ថា ប្រសិនបើរឿងនេះនៅតែបន្តកើតមាន ហើយឧក្រិដ្ឋជនមិនត្រូវបាននាំមកកាត់ទោសតាមផ្លូវច្បាប់ទេ នោះវានឹងបង្កឱ្យកាន់តែមានភាពច្របូកច្របល់នៅក្នុងសង្គម ដែលនាំឱ្យឈានទៅរកការបំផ្លិចបំផ្លាញនូវសក្ដានុពលផ្នែកមីក្រូ និងប្រព័ន្ធម៉ាក្រូសេដ្ឋកិច្ចរបស់កម្ពុជា និងថាការវិនិយោគផ្ទាល់ពីបរទេសក៏រងផលប៉ះពាល់កាន់តែខ្លាំង។
កាលពីថ្ងៃទី១៥មករា ម្ចាស់គណនីហ្វេសប៊ុកឈ្មោះ Chivann Pen បានសរសេរថា លោក ព្រាប កុល ត្រូវបានគេសង្ស័យជាអ្នកទទួលខុសត្រូវធំបំផុត និងជាមេគំនិតនៃប្រតិបត្តិការ យកលុយចេញពីក្រុមហ៊ុន CIC ប្រមាណ ៨០លានដុល្លារ ក្នុងចំនួនទឹកប្រាក់សរុបប្រមាណ ១៣០លានដុល្លា។
ប៉ុន្តែ ២ថ្ងៃក្រោយមក លោក ព្រាប កុល រដ្ឋមន្ត្រីប្រតិភូអមនាយករដ្ឋមន្ត្រី បានចេញមុខបដិសេធការចោទប្រកាន់នេះ និងឲ្យម្ចាស់ហ្វេសប៊ុក Chivann Pen សុំទោសជាសាធារណៈ។ តែម្ចាស់គណនីរូបនេះបានអះអាងថា ខ្លួនមានភស្តុតាងគ្រប់គ្រាន់ដែលបញ្ជាក់ពីការជាប់ពាក់ព័ន្ធក្នុងការកិបកេងលុយជាង៨០លានដុល្លារដោយ លោក ព្រាប កុល។
ប៉ុន្មានថ្ងៃក្រោយមក ម្ចាស់គណនីហ្វេសប៊ុកឈ្មោះ Chivann Pen ដែលមានឈ្មោះពិត យ៉ង់ ប៉ាក់ ត្រូវបានចាប់ខ្លួន គឺបទបរិហារកេរ្តិ៍ជាសាធារណៈ និងញុះញង់ឱ្យមានការរើសអើង តាមពាក្យបណ្តឹងរបស់លោក ព្រាប កុល ហើយពេលនេះជនជាប់ចោទកំពុងស្ថិតក្នុងការឃុំខ្លួនរង់ចាំសវនាការ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ