លោក កឹម សុខា ស្នើតុលាការឲ្យបន្ធូរការរឹតត្បិតសេរីភាពលោកអំឡុងពេលចូលឆ្នាំខ្មែរ
នៅថ្ងៃទី២១ ខែមីនា ឆ្នាំ២០២៤នេះ សាលាឧទ្ធរណ៍បានបើកសវនាការលើកទី៥ លើសំណុំរឿងសន្ទិដ្ឋិភាពជាមួយបរទេសពាក់ព័ន្ធនឹងលោក កឹម សុខា ប្រធានអតីតគណបក្សសង្គ្រោះជាតិ។ ក្រៅពីបន្តសួរនាំរឿងធ្វើបាតុកម្មដដែលៗ លោក កឹម សុខា បានស្នើក្រុមប្រឹក្សាជំនុំជម្រះឲ្យបន្ធូរការរឹតត្បិតសេរីភាពរបស់លោកនៅអំឡុងចូលឆ្នាំខ្មែរខាងមុខ។ នេះបើតាមអ្នកសង្កេតការណ៍មកពីអង្គការសិទ្ធិមនុស្សអាដហុក។
ចុះផ្សាយនៅថ្ងៃ៖
ស្តាប់ - ០១:៥៥
លោក យី សុខសាន្ត មន្ត្រីជាន់ខ្ពស់នៃអង្គការការពារសិទ្ធិមនុស្សអាដហុក ដែលបានចូលរួមស្តាប់សវនាការនៅសាលាឧទ្ធរណ៍បានប្រាប់អ្នកកាសែតថា សវនាការពេញមួយព្រឹកថ្ងៃទី២១ ខែមីនានេះមិនសូវមានភាពជឿនលឿនទេ ព្រោះចៅក្រមបន្តសួរនាំរឿងដដែលៗពាក់ព័ន្ធនឹងការធ្វើបាតុកម្មនៅផ្លូវវេងស្រេង។ តាមលោក យី សុខសាន្ត ក្រៅពីឆ្លើយនឹងសំណួររបស់ចៅក្រម លោក កឹម សុខា បានស្នើទៅក្រុមប្រឹក្សាជំនុំជម្រះឲ្យផ្តល់សេរីភាពដល់លោកបន្តិច ដើម្បីជួបជុំប្រពន្ធកូន និងក្រុមគ្រួសារនៅរដូវចូលឆ្នាំខ្មែរខាងមុខ។ តែសំណើរបស់លោក កឹម សុខា នៅមិនទាន់មានការឆ្លើយតបយ៉ាងណាពីសាលាឧទ្ធរណ៍នៅឡើយទេ។
ជាមួយគ្នានេះ លោកស្រី ម៉េង សុភារី សហមេធាវីការពារក្តីឲ្យលោក កឹម សុខា ក៏បានប្រាប់អ្នកកាសែតដែរថា ការសួរដេញដោលរបស់ក្រុមប្រឹក្សាជំនុំជម្រះបានផ្តោតលើរឿងបាតុកម្ម ដែលកូនក្តីរបស់លោកស្រីបានឆ្លើយបំភ្លឺអស់ហើយនៅដំណាក់កាលសាលាដំបូង។
តាមសហមេធាវីរូបនេះដដែល លោក កឹម សុខា ទទួលស្គាល់ថា លោកបានធ្វើបាតុកម្មស្របច្បាប់នៅទីលានប្រជាធិបតេយ្យ ដើម្បីទាមទារឲ្យមានការបង្កើតគណៈកម្មការស៊ើបអង្កេតលើភាពមិនប្រក្រតីនៃការបោះឆ្នោតកាលពីអំឡុងឆ្នាំ ២០១៤។ លោកស្រី ម៉េង សុភារី បានបន្ថែមថា លោក កឹម សុខា គ្មានបំណងណាមួយធ្វើបាតុកម្ម ដើម្បីបង្កើតអំពើហិង្សាជាលេសក្នុងការផ្តួលរំលំរដ្ឋាភិបាលឡើយ។
សូមរំលឹកថាកាលពីថ្ងៃទី៣ មីនា ឆ្នាំ២០២៣ សាលាដំបូងរាជធានីភ្នំពេញបានប្រកាសសាលក្រមផ្តន្ទាទោសលោក កឹម សុខា ឲ្យជាប់ពន្ធនាគារចំនួន ២៧ឆ្នាំ នៅក្នុងផ្ទះ ហាមធ្វើនយោបាយអស់មួយជីវិត និងហាមទទួលភ្ញៀវណាមួយលើកលែងតែសាច់ញាតិ។ តែលោកបានបន្តប្តឹងឧទ្ធរណ៍ ហើយសវនាការសាលាឧទ្ធរណ៍បានចាប់ផ្តើមកាលពីថ្ងៃទី៣០ ខែមករា ឆ្នាំ២០២៤ ដោយកំណត់ធ្វើឡើងនៅ ២សប្តាហ៍ម្តង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ