កម្ពុជាប្រកាសត្រៀមខ្លួនធ្វើការជិតស្និទ្ធជាមួយលោកពូទីន
ប្រមុខគណបក្សកាន់អំណាចនៅកម្ពុជាលោក ហ៊ុន សែន និងប្រមុខរដ្ឋាភិបាលលោកហ៊ុន ម៉ាណែតបានប្រកាសត្រៀមខ្លួនធ្វើការយ៉ាងជិតស្និទ្ធជាមួយលោក វ៉្លាឌីមៀ ពូទីនដែលទើបជាប់ឆ្នោតអាណត្តិថ្មីជាប្រធានាធិបតីរុស្ស៊ី នាការបោះឆ្នោតរយៈពេល៣ថ្ងៃ កន្លងទៅ។ តែ អ្នកវិភាគ លោក ឯម សុវណ្ណារ៉ា ហាក់មិនបានភ្ញាក់ផ្អើលនឹងលិខិតអបអរលោកពូទីនរបស់កម្ពុជាពេលនេះទេ។
ចុះផ្សាយនៅថ្ងៃ៖
ស្តាប់ - ០១:៥៤
នៅក្នុងលិខិតចុះថ្ងៃទី១៩ ខែមីនា លោកហ៊ុន សែន ក្នុងនាមគណបក្សប្រជាជនកម្ពុជាបានគូសបញ្ជាក់ថា អស់រយៈពេលជិត ៧ទសវត្សរ៍ កន្លងមកដែលកម្ពុជា និងរុស្ស៊ីបានរក្សាទំនុក ចិត្តនយោបាយគ្នាទៅវិញទៅមក។ នេះហើយជាអ្វីដែលប្រមុខគណបក្សកាន់អំណាចនៅកម្ពុជាចាត់ទុកជាមូលដ្ឋានគ្រឹះនៃទំនាក់ទំនងរវាងរដ្ឋទាំងពីរ និងបានសាយភាយនៅលើគ្រប់ វិស័យនៃកិច្ចសហប្រតិបត្តិការ។
ក្នុងនាមគណបក្សកាន់អំណាច លោក ហ៊ុន សែន ប្រកាសត្រៀមខ្លួនធ្វើការយ៉ាងជិតស្និទ្ធជាមួយ លោកពូទីនដែលទើបជាប់ឆ្នោតអាណត្តិថ្មីជាប្រធានាធិបតីរុស្ស៊ី។ ចំណែកនាយករដ្ឋមន្រ្តីកម្ពុជា លោក ហ៊ុន ម៉ាណែត ក៏បានប្រកាសដូចគ្នាតាមរយៈលិខិតជាភាសាអង់គ្លេស ចេញថ្ងៃទី២០ ខែមីនា។
លោក ហ៊ុន ម៉ាណែត មានការជឿជាក់ថា ប្រទេសទាំងពីរនឹងធ្វើកិច្ចសហប្រតិបត្តិការជាមួយគ្នាកាន់តែស៊ីជម្រៅដើម្បីផលប្រយោជន៍ របស់ប្រជាជននៃប្រទេសទាំងពីរ។
គួរកត់សំគាល់ថា ក្រៅពីកម្ពុជា ការសាទរជ័យជម្នះរបស់លោកពូទីនក៏មានពីប្រទេសផ្សេងដែរ ពិសេស វៀតណាម និងចិនដែលជាប្រទេសកុម្មុយនិស្តដូចគ្នា។
ទោះយ៉ាងណា ការចេញលិខិតអបអររបស់កម្ពុជាទៅកាន់លោកពូទីនត្រូវបានសាស្ត្រាចារ្យនយោបាយលោក ឯម សុវណ្ណារ៉ា យល់ថា ជាការគាំទ្រគ្នាទៅ វិញទៅមករបស់អ្នកកុម្មុយនីស្ត និងអតីតអ្នកកុម្មុយនីស្ត។ តាមអ្នកវិភាគរូបនេះ កម្ពុជាក៏ត្រូវការឱ្យមានការគាំទ្រពីរុស្ស៊ីនៅលើឆាកអន្តរជាតិដែរ គ្រាន់តែថា កម្ពុជានឹងមិនបានផលចំណេញអ្វីទេក្នុងពេលដែលបស្ចិមលោកមិនដែលគាំទ្ររុស្ស៊ីនោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ