មន្ត្រីជាន់ខ្ពស់ថារដ្ឋាភិបាលកម្ពុជាមិនបានជ្រៀតជ្រែកកិច្ចការផ្ទៃក្នុងរបស់អូស្ត្រាលីទេ
មន្ត្រីជាន់ខ្ពស់រដ្ឋាភិបាលកម្ពុជាលោក សូ ណារ៉ូ បានថ្លែងថារដ្ឋាភិបាលកម្ពុជាមិនបានជ្រៀតជ្រែកចូលកិច្ចការផ្ទៃក្នុងរបស់ប្រទេសអូស្ត្រាលីទេ គឺគ្រាន់តែធ្វើតាមរដ្ឋធម្មនុញ្ញកម្ពុជាប៉ុណ្ណោះ។ ការលើកឡើងរបស់រដ្ឋមន្ត្រីប្រតិភូអមនាយករដ្ឋមន្ត្រីដូច្នេះ ធ្វើឡើងបន្ទាប់ពីពលរដ្ឋខ្មែរ នៅក្នុងប្រទេសអូស្ត្រាលី ដែលមាននិន្នាការនយោបាយផ្ទុយពីរដ្ឋាភិបាលកម្ពុជា បានលើកឡើងថាមនុស្សរបស់រដ្ឋាភិបាលកម្ពុជា បានធ្វើការជ្រៀតជ្រែកកិច្ចការផ្ទៃក្នុងអូស្ត្រាលី។
ចុះផ្សាយនៅថ្ងៃ៖
ស្តាប់ - ០១:៥៥
ក្នុងសន្និសីទសារព័ត៌មាននៅព្រលានយន្តហោះអន្តរជាតិភ្នំពេញកាលពីយប់ថ្ងៃពុធ ទី០៦ ខែមីនា ឆ្នាំ២០២៤ លោក សូ ណារ៉ូ រដ្ឋមន្ត្រីប្រតិភូអមនាយករដ្ឋមន្ត្រី បានថ្លែងថារដ្ឋាភិបាលកម្ពុជា និងសមាជិកគណបក្សកាន់អំណាចមិនបានជ្រៀតជ្រែកចូលកិច្ចការផ្ទៃក្នុងរបស់អូស្ត្រាលីទេ។
ផ្ទុយទៅវិញរដ្ឋាភិបាលកម្ពុជាគ្រាន់តែអនុវត្តតាមរដ្ឋធម្មនុញ្ញ និងច្បាប់របស់កម្ពុជាតាមថែរក្សា គាំពារពលរដ្ឋខ្មែរទាំងអស់នៅក្រៅប្រទេស។ នេះបើតាមលោក សូ ណារ៉ូ។ ដោយសំដៅទៅលើ លោក តាក់ ម៉េងហ៊ាន តំណាងរាស្ត្រអូស្ត្រាលីដើមកំណើតខ្មែរនៃរដ្ឋវិចតូរីយ៉ា រដ្ឋមន្ត្រីប្រតិភូរូបនេះបញ្ជាក់ថា ការជ្រៀតជ្រែកកិច្ចការផ្ទៃក្នុងអូស្ត្រាលីលុះត្រាតែពលរដ្ឋខ្មែរនៅក្រៅប្រទេសព្រមលះបង់សញ្ជាតិខ្មែរ ហើយនៅតែមានអ្នកតាមទៅទាក់ទងពួកគាត់ទៀត។
នៅក្នុងបទសម្ភាសជាមួយសារព័ត៌មាន ក៏ដូចជាថ្លែងនៅក្នុងបាតុកម្មនានាកន្លងទៅរបស់សហគមន៍ខ្មែរក្នុងប្រទេសអូស្ត្រាលី លោក តាក់ ម៉េងហ៊ាង តែងលើកឡើងថារដ្ឋាភិបាលក្រុងភ្នំពេញបានបញ្ចូនក្រុមមនុស្សរបស់ខ្លួនទៅក្នុងប្រទេសអូស្ត្រាលី ហើយធ្វើសកម្មភាពហួសបន្ទាត់ច្បាប់រដ្ឋាភិបាលសហព័ន្ធ។ ហួសបន្ទាត់ច្បាប់តាមរូបភាពរៀបចំអង្គការចាត់តាំងនៅតាមរដ្ឋនានារបស់អូស្ត្រាលី ដើម្បីរាយការណ៍ពីអ្នករិះគន់រដ្ឋាភិបាលក្រុងភ្នំពេញ។ នេះបើតាមលោក តាក់ ម៉េងហ៊ាង។
សមាជិកសភាអូស្ត្រាលីដើមកំណើតខ្មែររូបនេះលើកឡើងថា រដ្ឋាភិបាលអូស្ត្រាលីក៏បានដាក់កម្ពុជាជាប្រទេសដែលត្រូវពិនិត្យមើលនៅក្នុងបញ្ជីសកម្មភាពរបស់ក្រុមអង្គការចាត់តាំងដែលបានទៅធ្វើសកម្មភាពនៅក្នុងប្រទេសអូស្ត្រាលីផងដែរ។
ក៏ប៉ុន្តែលោក សូ ណារ៉ូ យល់ឃើញថា លោក តាក់ ម៉េងហ៊ាង គឺជាអ្នកនយោបាយជ្រុលនិយមជំនាន់ថ្មី ក្រោយលោក ហុង លីម ចូលនិវត្តន៍ ដែលសូម្បីតែលោក សម រង្ស៊ី ក៏មិនហ៊ានដឹកនាំបាតុកម្មប្រឆាំងលោកនាយករដ្ឋមន្ត្រី ហ៊ុន ម៉ាណែត ដោយផ្ទាល់នៅអូស្ត្រាលីដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ