លោករ៉ុង ឈុនថានឹងស្នើទៅរដ្ឋាភិបាលឲ្យចេញប័ណ្ណកម្មសិទ្ធិដីជូនពលរដ្ឋបឹងតាមោក
លោក រ៉ុង ឈុន ទីប្រឹក្សាគណបក្សកម្លាំងជាតិ នឹងដាក់សំណើរទៅរដ្ឋាភិបាលដើម្បីឲ្យចេញប័ណ្ណកម្មសិទ្ធិជូនប្រជាពលរដ្ឋរស់នៅក្នុងសហគមន៍សំរោងខាងត្បូងជាប់បឹងតាមមោក។ ការអះអាងបែបនេះរបស់លោក រ៉ុង ឈុន ធ្វើឡើងក្រោយពីលោកចុះសួរសុខទុក្ខជួបសំណេះសំណាលជាមួយពលរដ្ឋរស់នៅក្នុងសហគមន៍សំរោងខាងត្បូងដែលកំពុងមានបញ្ហាដីធ្លី។
ចុះផ្សាយនៅថ្ងៃ៖
ស្តាប់ - ០២:៣៦
ថ្លែងប្រាប់វិទ្យុបារាំងអន្តរជាតិ RFI នៅថ្ងៃទី០៥ ខែមីនា ឆ្នាំ២០២៤ លោក រ៉ុង ឈុន ដែលជាទីប្រឹក្សាគណបក្សកម្លាំងជាតិបានបញ្ជាក់ថា ពេលលោកចុះសួរសុខទុក្ខពលរដ្ឋរស់សហគមន៍សំរោងខាងត្បូង ពួកគាត់បានត្អូញត្អែរពីផលលំបាកប្រាប់រូបលោកអំពីជីវភាពប្រចាំថ្ងៃ ជាពិសេសគឺការរំលោភបំពានដីធ្លី និងការរស់នៅរបស់ពួកគាត់សព្វថ្ងៃ។ តាមលោក រ៉ុង ឈុន ផលលំបាកនេះ រាលដាលទៅដល់ក្មេងៗដែលជាកូនៗរបស់ពួកគាត់ ហើយធ្វើឲ្យកុមារទាំងនេះបាត់បង់ការសិក្សាជាដើម។
នៅចំពោះមុខ ទីប្រឹក្សាគណបក្សកម្លាំងជាតិរូបនេះដដែលបានអះអាងថា បាននិងកំពុងរៀបចំដាក់សំណើទៅរដ្ឋាភិបាល ដើម្បីស្នើសុំឲ្យចេញប័ណ្ណកម្មសិទ្ធិជូនប្រជាពលរដ្ឋ អមដោយឯកសារ និងទុក្ខកង្វល់ផ្សេងៗរបស់ពួកគាត់ផងដែរ។
ជាកត់សម្គាល់ ការចុះសួរសុខទុក្ខពលរដ្ឋខាងលើពីសំណាក់លោក រ៉ុង ឈុននេះ ធ្វើឡើងក្រោយពីមានផ្ទុះហេតុការណ៍ប្រតាយប្រតប់គ្នារវាងកងកម្លាំងសន្តិសុខខណ្ឌព្រែកព្នៅ និងសហគមន៍សំរោងខាងត្បូងដែលនៅជាប់បឹងតាមោកកាលពីថ្ងៃទី២៧ ខែកុម្ភៈ។ ហេតុការណ៍នេះ បន្ទាប់ពីពលរដ្ឋចុះទៅហាមឃាត់អេស្កាវ៉ាទ័រឲ្យបញ្ឈប់សកម្មភាពកាយដីរបស់ពលរដ្ឋដើម្បីធ្វើប្រឡាយបង្ហូរទឹក។
កាលពីថ្ងៃទី២៥ ខែមករា ឆ្នាំ២០២៤ ក្រុមសង្គមស៊ីវិលដែលរួមមានសមាគម អង្គការក្រៅរដ្ឋាភិបាល និងសហគមន៍មូលដ្ឋានចំនួន ៣៨ស្ថាប័នបានចេញសេចក្តីថ្លែងការណ៍រួមមួយដោយសម្ដែងការព្រួយបារម្ភចំពោះសន្តិសុខ និងសុវត្ថិភាពដីធ្លីរបស់សហគមន៍សំរោងត្បូង។ តាមសង្គមស៊ីវិល ប្រជាសហគមន៍សំរោងត្បូងបានតាំងទីលំនៅ ស្ថិតនៅភូមិសំរោងត្បូង សង្កាត់សំរោង ខណ្ឌព្រែកព្នៅ រាជធានីភ្នំពេញ តាំងពីឆ្នាំ១៩៩៦ និងដែលបច្ចុប្បន្នមានផ្ទះ៧៦ខ្នង។
ប៉ុន្តែរឿងរ៉ាវពលរដ្ឋរស់សហគមន៍សំរោងខាងត្បូងដដែលនេះ អ្នកនាំពាក្យសាលារាជធានីភ្នំពេញ លោកម៉េត មាសភក្ដី ធ្លាប់បានបញ្ជាក់ប្រាប់វិទ្យុបារាំងអន្តរជាតិថា ពលរដ្ឋរស់នៅសហគមន៍សំរោងត្បូងកំពុងរស់នៅលើសំណង់មិនរៀបរយ ទើបអាជ្ញាធររកទីតាំងថ្មីដើម្បីឲ្យពួកគាត់រស់នៅសមរម្យ។ តាមលោក ម៉េត មាសភក្ដី ទីតាំងថ្មីនោះនៅមិនឆ្ងាយប៉ុន្មានពីទីតាំងចាស់ ពោលស្ថិតនៅបណ្ដោយផ្លូវ១៥១ដដែល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ