លោក រ៉ុង ឈុន៖ បើត្រូវការចាប់ខ្លួនខ្ញុំគឺមិនចាំបាច់ប្រើកម្លាំងទៅព័ទ្ធផ្ទះខ្ញុំទៀតទេ
លោក រ៉ុង ឈុន បានអះអាងថា ប្រសិនបើតុលាការចង់ចាប់លោកគឺមិនចាំបាច់ប្រើកម្លាំងសមត្ថិច្ចទៅព័ទ្ធផ្ទះរបស់លោកទាំងយប់ ដូចកាលពីថ្ងៃទី៣១ខែកក្កដាឆ្នាំ២០២០នោះទេ ដោយគ្រាន់តែចេញដីកាមួយសន្លឹក នោះលោកនឹងដើរចូលទៅកាន់ទីកន្លែងណាមួយដែលតុលាការបានកំណត់។ ការថ្លែងបែបនេះរបស់អតីតទណ្ឌិតក្នុងសំណុំរឿងព្រំដែន ដោយសារតែតុលាការបានព្រមានចាប់បង្ខាំងរូបរាងកាយ លោក រ៉ុង ឈុន ប្រសិនមិនព្រមបង់ប្រាក់ពិន័យទៅតាមកាលកំណត់របស់តុលាការ ខណៈលោក រ៉ុង ឈុន អះអាងថា លោកទើបទទួលបានដីកានៅថ្ងៃទី២៨កុម្ភៈ តែត្រូវដល់ឱសានវាទនៅត្រឹមថ្ងៃទី៤មីនា។
ចុះផ្សាយនៅថ្ងៃ៖
ស្តាប់ - ០២:៥០
ការថ្លែងរបស់អតីតប្រធានសមាគមគ្រូបង្រៀនរូបនេះ គឺនៅពេលដែលលោក រ៉ុង ឈុន បាននាំយកក្រដាសប្រាក់៥០០រៀល និង១០០រៀល សរុប២លានរៀល បង់ទៅឲ្យសាលាដំបូងរាជធានីភ្នំពេញនៅថ្ងៃទី១មីនា។
សូមបញ្ជាក់ថា គណបក្សកម្លាំងជាតិ បានរ៉ៃអង្គាសប្រាក់សរុបចំនួន២លានរៀល បង់ទៅឲ្យសាលាដំបូងរាជធានីភ្នំពេញនៅថ្ងៃទី១មីនា ទៅតាមការបង្គាប់របស់តុលាការដែលបញ្ជាឲ្យលោក រ៉ុង ឈុន បង់ប្រាក់ពិន័យក្នុងសំណុំរឿងព្រហ្មទណ្ឌ។ អតីតប្រធានសមាគមគ្រូបង្រៀនរូបនេះ ត្រូវបានតុលាការផ្តន្ទាទោសដាក់ពន្ធនាគារ២ឆ្នាំពីបទ «ញុះញង់បង្កឲ្យមានភាពវឹកវរដល់សន្តិសុខសង្គម» កាលពីឆ្នាំ២០២២ បន្ទាប់ពីលោកនិយាយពីរឿងព្រំដែន។
ការរ៉ៃអង្គាសប្រាក់ជួយ លោក រ៉ុង ឈុន នេះត្រូវបាន លោក ស៊ុន ចន្ធី ប្រធានគណបក្សកម្លាំងជាតិពន្យល់ថា ដោយសារតែទីប្រឹក្សាគណបក្សកម្លាំងជាតិរូបនេះ បានលះលង់គ្រប់បែបយ៉ាងដើម្បីសង្គមជាតិ ប៉ុន្តែលោក រ៉ុង ឈុន នៅសល់តែសម្បកខ្លួនប៉ុណ្ណោះ។
អយ្យការអមសាលាដំបូងរាជធានីភ្នំពេញបានព្រមានថា នឹងចេញដីកាបញ្ជាឲ្យបង្ខំ និងឲ្យឃុំខ្លួនតាមនីតិវិធី ប្រសិនបើលោក រ៉ុង ឈុន មិនបានបង់ប្រាក់ពិន័យចំនួន ២លានរៀលឲ្យបានមុនថ្ងៃទី០៤ ខែមីនា ឆ្នាំ២០២៤ ទេនោះ។
ដីកានេះ ត្រូវបាន លោក រ៉ុង ឈុន យល់ថា តុលាការហាក់មានយុទ្ធសាស្ត្របន្តិចព្រោះបានចេញតាំងពីថ្ងៃទី១៩ កុម្ភៈ តែបែរជាទើបប្រគល់ឲ្យលោកដល់ដៃនៅថ្ងៃទី២៨ កុម្ភៈ។
គួររម្លឹកថា លោក រ៉ុង ឈុន ត្រូវបានសមត្ថកិច្ចចាប់ខ្លួនកាលពីយប់ថ្ងៃទី៣១ខែកក្កដា ឆ្នាំ២០២០ និងឃុំខ្លួនអស់រយៈពេល ១ឆ្នាំ ៣ខែ និង១១ថ្ងៃ ពីបទញុះញង់បង្កឲ្យមានភាពវឹកវរដល់សន្តិសុខសង្គម។
ចំណាត់នេះ គឺក្រោយពីលោកបានចុះទៅកាន់ព្រំដែនកម្ពុជា-វៀតណាម ខេត្តត្បូងឃ្មុំ ដែលពេលនោះ លោក រ៉ុង ឈុន បានចេញសេចក្តីថ្លែងការណ៍ទៅកាន់សាធារណជនថា ការបោះបង្គោលព្រំដែនថ្មី រវាងកម្ពុជា-វៀតណាម បានចូលដីកម្ពុជាប្រហែល៥០០ម៉ែត្រ។ ប៉ុន្តែគណៈកម្មាធិការព្រំដែនកម្ពុជាបានទាត់ចោលការលើកឡើងរបស់លោក រ៉ុង ឈុន នាពេលនោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ