តំណាងអយ្យការបង្គាប់ឲ្យលោក រ៉ុង ឈុន បង់ប្រាក់ពិន័យឲ្យបានមុនថ្ងៃទី៤ មីនា
កាលពីថ្ងៃទី១៩ កុម្ភៈ ឆ្នាំ ២០២៤ តំណាងអយ្យការអមសាលាដំបូងរាជធានីភ្នំពេញបានចេញលិខិតជូនដំណឹងមួយដោយបង្គាប់ឲ្យលោក រ៉ុង ឈុន អ្នកនយោបាយជាន់ខ្ពស់បក្សប្រឆាំងបង់ប្រាក់ពិន័យចំនួន ២លានរៀល (៥០០ដុល្លារ) ឲ្យបានមុនថ្ងៃទី៤ ខែមីនា ឆ្នាំ២០២៤។ តែគឺទើបនៅថ្ងៃទី២៨ កុម្ភៈដែលលោក រ៉ុង ឈុន បានទទួលលិខិតនោះ។ ការបង្គាប់ឲ្យលោក រ៉ុង ឈុន បង់ប្រាក់ពិន័យនេះធ្វើឡើង បន្ទាប់ពីតុលាការផ្តន្ទាទោសលោកដាក់ពន្ធនាគារជាង១ឆ្នាំពីបទ «ញុះញង់បង្កឲ្យមានភាពវឹកវរដល់សន្តិសុខសង្គម» កាលពីឆ្នាំ២០២២។
ចុះផ្សាយនៅថ្ងៃ៖
ស្តាប់ - ០១:៥៥
អយ្យការអមសាលាដំបូងរាជធានីភ្នំពេញបានព្រមានថា នឹងចេញដីកាបញ្ជាឲ្យបង្ខំ និងឲ្យឃុំខ្លួនតាមនីតិវិធី ប្រសិនបើលោក រ៉ុង ឈុន ដែលបច្ចុប្បន្នជាទីប្រឹក្សាគណបក្សកម្លាំងជាតិមិនបានបង់ប្រាក់ពិន័យចំនួន ២លានរៀលឲ្យបានមុនថ្ងៃទី០៤ ខែមីនា ឆ្នាំ២០២៤ ទេនោះ។
ឆ្លើយតបទៅនឹងអយ្យការអមសាលាដំបូងរាជធានីភ្នំពេញនេះ លោក រ៉ុង ឈុន បានប្រាប់វិទ្យុបារាំងអន្តរជាតិនៅថ្ងៃព្រហស្បតិ៍ ទី២៩ កុម្ភៈនេះថាលោកមិនទាន់សម្រេចចិត្តយ៉ាងណានៅឡើយ ដោយរង់ចាំពិគ្រោះយោបល់ជាមួយមេធាវី និងក្រុមការងាររបស់លោកសិន។
តាមលោក រ៉ុង ឈុន ដីការបស់តុលាការហាក់មានយុទ្ធសាស្ត្របន្តិចព្រោះបានចេញតាំងពីថ្ងៃទី១៩ កុម្ភៈ តែបែរជាទើបប្រគល់ឲ្យលោកដល់ដៃនៅថ្ងៃទី២៨ កុម្ភៈ។ ទីប្រឹក្សាគណបក្សកម្លាំងជាតិរូបនេះយល់ថា ទង្វើនេះជារូបភាពចាប់បង្ខំ ព្រោះវាកៀកថ្ងៃកំណត់ដែលត្រូវបង់ប្រាក់។ គួររម្លឹកថា ជាប់ចោទពីបទញុះញង់បង្កឲ្យមានភាពវឹកវរដល់សន្តិសុខសង្គម លោក រ៉ុង ឈុន ត្រូវបានសមត្ថកិច្ចចាប់ខ្លួនកាលពីខែកក្កដា ឆ្នាំ២០២០ ក្រោយពីលោកបានចុះទៅកាន់ព្រំដែនកម្ពុជា-វៀតណាម ខេត្តត្បូងឃ្មុំ។
អំឡុងពេលនោះ លោក រ៉ុង ឈុន បានចេញសេចក្តីថ្លែងការណ៍ទៅកាន់សាធារណជនថា ការបោះបង្គោលព្រំដែនថ្មី រវាងកម្ពុជា-វៀតណាម បានចូលដីកម្ពុជាប្រហែល៥០០ម៉ែត្រ។ សំណុំរឿងមួយនេះ បានដំណើរការចាប់ពីសាលាដំបូងរហូតដល់សាលាឧទ្ធរណ៍ដោយសាលាជំរះក្តីទាំងពីរថ្នាក់នេះបានដាក់ទោសលោក រ៉ុង ឈុន ឲ្យជាប់ពន្ធនាគាររយៈពេល២ឆ្នាំ។ ក្រោយមក ទម្ងន់ទោសនេះត្រូវបានកែមកនៅត្រឹម ១ឆ្នាំ ៣ខែ និង១១ថ្ងៃ និងពិន័យជាប្រាក់ចំនួន ២លានរៀលវិញ។
ដូចគ្នាដែរ តុលាការកំពូលនៅខែសីហា ឆ្នាំ២០២២ បានចេញសាលដីកាតម្កល់ការសម្រេចរបស់សាលាឧទ្ធរណ៍ ហើយទោសដែលនៅសល់ត្រូវព្យូរទោសសាកល្បងដោយកំណត់រយៈពេល៣ឆ្នាំ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ