កម្ពុជា និងម៉ាឡេស៊ី បង្ហាញសុទិដ្ឋិនិយមពីការរីកចម្រើនទ្វេភាគី
អង្គភាពអ្នកនាំពាក្យរដ្ឋាភិបាលកម្ពុជាបានចេញសេចក្តីប្រកាសព័ត៌មានស្តីពីលទ្ធផលនៃទស្សនកិច្ចរបស់លោកនាយករដ្ឋមន្ត្រី ហ៊ុន ម៉ាណែត នៅប្រទេសម៉ាឡេស៊ីក្នុងថ្ងៃទី២៧ខែកុម្ភៈ។ តាមរយៈទស្សនកិច្ចនេះ កម្ពុជា និងម៉ាឡេស៊ី បានបង្ហាញឲ្យឃើញពីសុទិដ្ឋិនិយមយ៉ាងខ្លាំងចំពោះការរីកចម្រើននៃទំនាក់ទំនងទ្វេភាគី ដើម្បីជំរុញការផ្លាស់ប្តូរពាណិជ្ជកម្មឲ្យធំជាលំដាប់។ មានទំហំពាណិជ្ជកម្មរវាងគ្នាជាង៦០០លានដុល្លារក្នុងមួយឆ្នាំ កម្ពុជា គឺជាដៃគូពាណិជ្ជកម្មលំដាប់ទី៩ របស់ម៉ាឡេស៊ី នៅក្នុងចំណោមប្រទេសសមាជិកអាស៊ាន។
ចុះផ្សាយនៅថ្ងៃ៖
ស្តាប់ - ០២:៤៦
តាមសេចក្តីប្រកាសព័ត៌មាន ប្រធានសភាពាណិជ្ជកម្មម៉ាឡេស៊ី បានលើកឡើងពីគម្រោងចំនួន៣ទៅលោក ហ៊ុន ម៉ាណែត ទី១ បង្កើតតំបន់សេដ្ឋកិច្ចពិសេសកម្ពុជា-ម៉ាឡេស៊ី សម្រាប់វិស័យបច្ចេកវិទ្យាជាន់ខ្ពស់ ទី២ គម្រោងអភិវឌ្ឍន៍ជំនាញផ្នែកបច្ចេកវិទ្យា និងទី៣ គម្រោងរៀបចំប្រព័ន្ធអេកូឡូស៊ីផ្នែកឧស្សាហកម្មអាហារហាឡាស់។
គួរបញ្ជាក់ថា កម្ពុជាជាដៃគូពាណិជ្ជធំទី៩របស់ម៉ាឡេស៊ីនៅក្នុងចំណោមប្រទេសអាស៊ានទាំង១០ ដោយមានទំហំពាណិជ្ជកម្មជាង៦០០លានដុល្លារក្នុងមួយឆ្នាំ។ នេះបើតាមសារព័ត៌មានម៉ាឡេស៊ី The Star។
តែរដ្ឋមន្ត្រីប្រតិភូអមនាយករដ្ឋមន្ត្រីកម្ពុជា លោក តាន់ ហ្សង់ហ្វ្រង់ស័រ បានបញ្ជាក់ថា ទំហំពាណិជ្ជកម្មកម្ពុជា-ម៉ាឡេស៊ីនៅតូចនៅឡើយ បើធៀបនឹងទំហំពាណិជ្ជកម្ពុជា-ថៃ ដែលមានជិត ៨ពាន់លានដុល្លារនៅឆ្នាំ២០២២ ដូចគ្នា។
តាម លោក តាន់ ហ្សង់ហ្វ្រង់ស័រ នេះមកពីកម្លាំងសេដ្ឋកិច្ចកម្ពុជា និងម៉ាឡេស៊ីនៅមិន ទាន់ស៊ីសង្វាក់គ្នាល្អ។ ឧទាហរណ៍ ម៉ាឡេស៊ីពឹងផ្អែកជាពិសេសលើការនាំចេញ ប្រេងដូង និងគ្រឿងអេឡនិកត្រូនិក ខណៈកម្ពុជានៅបន្តពឹងផ្អែកជាពិសេសលើវិស័យកសិកម្ម និងឧស្សាកម្មកាត់ដេរ។
ក្រៅពីទំនាក់ទំនងសេដ្ឋកិច្ច កម្ពុជា និងម៉ាឡេស៊ីក៏បានអះអាងពីការពង្រីកកិច្ចប្រតិបត្តិការលើវិស័យនយោបាយ ការពារជាតិ និងសន្តិសុខផងដែរ។
ទាក់ទងនឹងវិស័យនយោបាយ ម៉ាឡេស៊ីក្នុងអំណាចរបស់លោក វ៉ាន់ អ៊ីប្រាហ៊ីមដែលជាអតីតមេបក្សប្រឆាំងមានការផ្លាស់ប្តូរជំហមកធ្វើកិច្ចសហការជាមួយរដ្ឋាភិបាលកម្ពុជាច្រើនជាងមុន ទោះម៉ាឡេស៊ីធ្លាប់បានអនុញ្ញាតឲ្យអ្នកនយោបាយប្រឆាំងរបស់កម្ពុជាអាចធ្វើសកម្មភាពបាននាពេលកន្លងមកក៏ដោយ។ នេះបើតាម លោក ឯម សុវណ្ណរ៉ា សាស្ត្រាចារ្យផ្នែកនយោបាយ។
ជាការកត់សំគាល់ មិនមានការធ្វើបាតុកម្មណាមួយប្រឆាំងនឹងវត្តមាន លោក ហ៊ុន ម៉ាណែតពីសំណាក់សកម្មជនប្រឆាំងរបស់កម្ពុជានៅម៉ាឡេស៊ីក្នុងអំឡុងពេលបំពេញទស្សនកិច្ចក្នុងថ្ងៃទី២៧ កុម្ភៈទេ។ មិនមានបាតុកម្មដោយសារតែសមាជិកបក្សប្រឆាំងរបស់កម្ពុជាមួយចំនួនដែលភៀសខ្លួននៅប្រទេសនេះត្រូវបានប៉ូលិសម៉ាឡេស៊ី ហៅទៅសួរនាំ និងគំរាមចាប់បញ្ជួនមកកម្ពុជាវិញ នៅមុនទស្សនកិច្ចរបស់ប្រមុខរដ្ឋាភិបាលកម្ពុជា។ នេះបើតាមការអះអាងរបស់សកម្មជនបក្សប្រឆាំង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ