កម្ពុជានិងម៉ាឡេស៊ីព្រមព្រៀងគ្នាពិនិត្យឡើងវិញនូវសហប្រតិបត្តិការទ្វេភាគីលើវិស័យសំខាន់ៗ
កម្ពុជា និងម៉ាឡេស៊ី បានព្រមព្រៀងគ្នាក្នុងការពន្លឿនដំណើរការពិនិត្យឡើងវិញនូវកិច្ចសហប្រតិបត្តិការទ្វេភាគីលើវិស័យសំខាន់ៗមួយចំនួនតាមរយៈគណៈកម្មការចម្រុះមួយហៅកាត់ថា(JCBC)។ ការព្រមព្រៀងនេះបានធ្វើឡើងនៅក្នុងជំនួបទ្វេភាគីរវាងលោកនាយករដ្ឋមន្ត្រីកម្ពុជា ហ៊ុន ម៉ាណែត និងនាយករដ្ឋមន្ត្រីម៉ាឡេស៊ីលោក អាន់វ៉ា អ៊ីប្រាហ៊ីម អំឡុងពេលលោក ហ៊ុន ម៉ាណែត ធ្វើទស្សនកិច្ចនៅម៉ាឡេស៊ីរយៈពេល១ថ្ងៃក្នុងថ្ងៃអង្គារទី២៧ ខែកុម្ភៈ ឆ្នាំ២០២៤នេះ។
ចុះផ្សាយនៅថ្ងៃ៖
ស្តាប់ - ០១:៣៦
បន្ទាប់ពីបានឡើងកាន់អំណាចកាលពីខែសីហា ឆ្នាំ២០២៣ នេះជាលើកទី១ ដែលនាយករដ្ឋមន្រ្តីកម្ពុជាលោក ហ៊ុន ម៉ាណែតបានទៅបំពេញទស្សនកិច្ចនៅក្នុងប្រទេសម៉ាឡេស៊ី។ នៅក្នុងដំណើរទស្សនកិច្ចជាលើកដំបូងនេះ លោក ហ៊ុន ម៉ាណែត និងនាយករដ្ឋមន្ត្រីម៉ាឡេស៊ី លោក អាន់ វ៉ាអ៊ីប្រាហ៊ីម បានផ្តោតសំខាន់ទៅលើការពិនិត្យមើលឡើងវិញនូវកិច្ចសហប្រតិបត្តិការទ្វេភាគីដែលមានកន្លងមក។
វិស័យសំខាន់ៗ ដែលលោក អាន់វ៉ា អ៊ីប្រាហ៊ីម បានលើកឡើងរួមមានបញ្ហាសន្តិសុខស្បៀង កិច្ចសហការក្នុងការស្រាវជ្រាវពាណិជ្ជកម្ម និងវិនិយោគ ឧស្សាហកម្មអាហារហាឡាល់ សន្តិសុខថាមពល និងបច្ចេកវិទ្យាសិប្បនិម្មិត(AI)ជាដើម។
នាយករដ្ឋមន្ត្រីម៉ាឡេស៊ី បានបញ្ជាក់នៅក្នុងសន្និសីទសារព័ត៌មានក្រោយជំនួបទ្វេភាគីថា រដ្ឋមន្ត្រីការបរទេសប្រទេសទាំងពីរ ត្រូវបានណែនាំឲ្យកំណត់ពេលវេលាសម្រាប់កិច្ចប្រជុំ JCBC ឲ្យបានលឿនជាងការរំពឹងទុក។
ជាមួយគ្នានេះ ការចុះអនុស្សារណៈយោគយល់គ្នាស្តីពី កិច្ចសហប្រតិបត្តិការជំរុញនវានុវត្តន៍ហិរញ្ញវត្ថុ និងប្រព័ន្ធទូទាត់សងប្រាក់ រវាងធនាគារជាតិនៃកម្ពុជា និងធនាគាកណ្ដាលម៉ាឡេស៊ី ដែលអាចជួយកាត់បន្ថយបន្ទុកនៃការពឹងផ្អែកតែលើប្រាក់ដុល្លារអាមេរិក ក៏ត្រូវបានធ្វើឡើងនៅក្នុងដំណើរទស្សនកិច្ចរបស់មេដឹកនាំកម្ពុជា នៅម៉ាឡេស៊ីពេលនេះដែរ។
សូមបញ្ជាក់ថាទំហំពាណិជ្ជកម្មរវាងកម្ពុជា និងម៉ាឡេស៊ីនៅឆ្នាំ២០២៣ មានប្រមាណជាង ៦៣០លានដុល្លារ ហើយកម្ពុជាជាប់ចំណាត់ថ្នាក់ជាដៃគូពាណិជ្ជកម្មធំជាងគេទី៩ របស់ម៉ាឡេស៊ីនៅក្នុងតំបន់អាស៊ាន។ នេះបើតាមស្ថិតិនៃអគ្គនាយកដ្ឋានគយ និងរដ្ឋករកម្ពុជា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ