ពលរដ្ឋខ្មែរនៅម៉ាឡេស៊ីចេញសារស្វាគមន៍លោក ហ៊ុន ម៉ាណែត ខណៈក្រុមប្រឆាំងត្រៀមបាតុកម្ម
ដូចរាល់ដងដែរ ពលរដ្ឋខ្មែរនៅឯនាយសមុទ្រតែងចេញសារស្វាគមន៍ប្រមុខរដ្ឋាភិបាលកម្ពុជា នៅមុនពេលដំណើរទស្សនកិច្ចផ្លូវការមកដល់។ នៅប៉ុន្មានថ្ងៃមកនេះ ពលរដ្ឋខ្មែរនៅប្រទេសម៉ាឡេស៊ី បានចេញសារជាបន្តបន្ទាប់ ស្វាគមន៍លោក ហ៊ុន ម៉ាណែត ដែលនឹងទៅម៉ាឡេស៊ី នៅថ្ងៃទី២៧ខែកុម្ភៈ សប្តាហ៍ក្រោយនេះ។ ពីខាងក្រុមប្រឆាំងវិញ អះអាងថា ពួកគេកំពុងប្រឈមមុខនឹងសមត្ថកិច្ចម៉ាឡេស៊ី បន្ទាប់ពីបានប្រកាសធ្វើបាតុកម្មប្រឆាំងនឹងវត្តមានមេដឹកនាំវ័យក្មេងរបស់កម្ពុជារូបនេះ។
ចុះផ្សាយនៅថ្ងៃ៖
ស្តាប់ - ០៣:០៥
លោក ហ៊ុន សែន ប្រធានគណបក្សប្រជាជនកម្ពុជា បានបង្ហោះសាររបស់ពលរដ្ឋខ្មែរនៅប្រទេសម៉ាឡេស៊ីដែលប្រកាសស្វាគមន៍ដំណើរទស្សនកិច្ចរបស់លោក ហ៊ុន ម៉ាណែត នៅតាមតេឡេក្រាមជាច្រើនថ្ងៃមកហើយ។ ពលរដ្ឋខ្មែរទាំងនោះ មានភាគច្រើនជា និស្សិត ជាអ្នករកស៊ី និងខ្លះជាពលករទៅបម្រើការនៅម៉ាឡេស៊ី។ ពួកគេចេញសារខ្លីៗក្នុងទម្រង់ស្រដៀងគ្នា ដោយប្រកាសស្វាគមន៍វត្តមានលោក ហ៊ុន ម៉ាណែត និងគណៈប្រតិភូរបស់កម្ពុជាដែលនឹងទៅម៉ាឡេស៊ីនៅថ្ងៃទី២៧ខែកុម្ភៈឆ្នាំ២០២៤។
ជាការកត់សំគាល់ សកម្មជនគណបក្សប្រឆាំងដែលកំពុងភៀសខ្លួននៅប្រទេសម៉ាឡេស៊ី អះអាងថាពួកគេប្រឈមនឹងការចាប់ខ្លួនបញ្ជូនទៅកម្ពុជាវិញ បន្ទាប់ពីសមត្ថកិច្ចប្រទេសនេះកោះហៅទៅសាកសួរទាក់ទងគម្រោងធ្វើបាតុកម្មប្រឆាំងវត្តមានលោកនាយករដ្ឋមន្ត្រី ហ៊ុន ម៉ាណែត។
បើតាមសមាជិកបក្សប្រឆាំងរបស់កម្ពុជានៅប្រទេសម៉ាឡេស៊ី គឺប៉ូលិសម៉ាឡេស៊ីបានតាមដានសកម្មភាព និងកំណត់មុខសញ្ញា ដើម្បីធ្វើទុក្ខបុកម្នេញលើជនភៀសខ្លួន និងពលករខ្មែរដែលគ្រោងប្រមូលគ្នាចេញតវ៉ា និងដាក់ញត្តិប្រឆាំងវត្តមានលោក ហ៊ុន ម៉ាណែត។
ជាមួយគ្នានោះ ពួកគេអះអាងថា ប៉ូលិសម៉ាឡេស៊ីក៏បានគំរាមឱ្យពួកគេលុបសារប្រឆាំងនឹងរដ្ឋាភិបាលកម្ពុជានៅលើហ្វេសប៊ុកទាំងអស់។ គឺជាសារដែលសកម្មជនទាំងនោះ ប្រកាសមិនទទួលស្គាល់រដ្ឋាភិបាលលោក ហ៊ុន ម៉ាណែត សារទាមទារឲ្យរដ្ឋាភិបាលកម្ពុជា បញ្ឈប់ការធ្វើទុក្ខបុកម្នេញគ្រប់ទម្រង់មកលើអ្នកមាននិន្នាការប្រឆាំង។
សកម្មជនប្រឆាំងរបស់កម្ពុជា ក៏បានអំពាវនាវដល់ប្រទេសម៉ាឡេស៊ី ដែលម្ចាស់ហត្ថលេខីនៃកិច្ចព្រមព្រៀងសន្តិភាពទីក្រុងប៉ារីស ជួយជំរុញឲ្យប្រទេសកម្ពុជាប្រជាធិបតេយ្យពិតប្រាកដ គោរពសិទ្ធិមនុស្ស និងដោះលែងថ្នាក់ដឹកនាំ និងសកម្មជនសហជីពជាបន្ទាន់ និងឥតលក្ខខណ្ឌ។
ក្រុមអ្នកតាមដានសង្គម មើលឃើញថា ចំណាត់ការទប់ស្កាត់របស់ម៉ាឡេស៊ីមិនឲ្យសកម្មជនប្រឆាំងរបស់កម្ពុជាធ្វើសកម្មភាពនៅពេលនេះ គឺដូចនឹងអ្វីដែល លោក ហ៊ុន សែន កន្លងមកអះអាងថា ម៉ាឡេស៊ីបានសន្យាជាមួយលោកថា មិនឱ្យក្រុមប្រឆាំងរបស់កម្ពុជាប្រើប្រាស់ទឹកប្រទេសនេះ ដើម្បីប្រឆាំងនឹងរដ្ឋាភិបាលកម្ពុជាឡើយ។
បច្ចុប្បន្នមានជនភៀសខ្លួនខ្មែរប្រមាណ ៣០នាក់កំពុងភៀសខ្លួននៅប្រទេសម៉ាឡេស៊ី ក្នុងនោះមានពីរនាក់ត្រូវបានម៉ាឡេស៊ីចាប់ខ្លួនបម្រុងបញ្ជូនទៅឱ្យរដ្ឋាភិបាលកម្ពុជា គឺលោក សេង សៀងលាង និងកញ្ញា ងឹម គាថា។ តែត្រូវបានឧត្ដមស្នងការអង្គការសហប្រជាជាតិទទួលបន្ទុកជនភៀសខ្លួននៅប្រទេសម៉ាឡេស៊ី អន្តរាគមន៍នឹងបានបញ្ជូនអ្នកទាំងពីរទៅប្រទេសកាណាដា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ