សហជីពសកលថ្កោលទោសការចាប់ខ្លួនលោក ជា ចាន់ ដែលប្តឹងដោយថៅកែចិន
សហជីពសកល IndustriALL Global Union បានចេញលិខិតថ្កោលទោសការឃុំខ្លួនលោកជា ចាន់ បេក្ខជនជាប់ឆ្នោតជាប្រធានសហជីពនៅរោងចក្រវីងស្តារស៊ូ។ លោកជា ចាន់ ត្រូវ បានថៅកែចិនប្តឹងកាលពីខែមករាកន្លងទៅក្នុង បទ «សមគំនិតក្នុងអំពើលួច» សម្ភារៈរោងចក្រកាលពីឆ្នាំ២០២២។ សហជីពសកល IndustriALL Global Union ច្រានចោលចំពោះបទចោទប្រកាន់នេះ និងថា លោក ជា ចាន់ ត្រូវបានចាប់ខ្លួនព្រោះលោកបានបដិសេធទទួលយកការបញ្ចូលឱ្យបោះបង់ការបង្កើតសហជីពនៅរោងចក្រពីថៅកែចិន។
ចុះផ្សាយនៅថ្ងៃ៖
ស្តាប់ - ០២:៣១
នៅក្នុងលិខិតផ្ញើទៅលោក Chiu Ching TING អគ្គនាយកក្រុមហ៊ុនរោងចក្រវីងស្តារស៊ូ ចុះថ្ងៃទី១៩កុម្ភៈឆ្នាំ២០២៤ សហជីពសកល IndustriALL Global Union ថ្កោលទោសចំពោះការឃុំខ្លួន លោក ជា ចាន់ បេក្ខជនជាប់ឆ្នោតជាប្រធានសហជីពនៅរោងចក្រវីងស្តារ ស៊ូ ពីបទ «សមគំនិតក្នុងអំពើលួច» សម្ភារៈរោងចក្រកាលពីឆ្នាំ២០២២។ សហជីពសកលចាត់ទុកបទចោទនេះ ជាបទចោទក្លែងក្លាយដែលថៅកែរោងចក្រវីងស្តារស៊ូ ប្រើដើម្បី «គាបសង្កត់» ក្នុងគោលបំណងរំសាយសហជីពឯករាជ្យក្នុងរោងចក្រតែប៉ុណ្ណោះ។
គួររម្លឹកថា កាលពីខែមករាឆ្នាំ២០២៤កន្លងទៅ កម្មករនិយោជិតនៅរោងចក្រ វីងស្តារស៊ូដែលស្ថិតក្នុងស្រុកគងពិសី ខេត្តកំពង់ស្ពឺបានបោះឆ្នោតជ្រើសរើសថ្នាក់ដឹកនាំតំណាងសហជីព ដែលមានលោក ជា ចាន់ ជាប្រធានសហជីព និងកម្មករនិយោជិតចំនួន៩នាក់ផ្សេងទៀត។ សហជីពសកលអះអាងថាពេលនោះ ក្រុមហ៊ុន វីងស្តារស៊ូបានបញ្ចុះបញ្ចូល និងផ្ញើសារបំភិតបំភ័យស្ថាបនិកសហជីពទាំង១០នាក់ ឱ្យ បោះបង់ការបង្កើតសហជីពនៅក្នុងរោងចក្រ។ តែសំណើរបស់ក្រុមហ៊ុន កាលណោះត្រូវបានពួកគេបដិសេធ។
តំណាងឱ្យកម្មករ៥០លាននាក់ក្នុងសង្វាក់ផ្គត់ផ្គង់ផលិតកម្មសម្លៀកបំពាក់ វាយនភណ្ឌ ស្បែកជើង និងផលិតផលធ្វើដំណើរនៅទូទាំងពិភពលោក សហជីពសកល IndustriALL Global Union ទាមទារឱ្យរោងចក្រ វីងស្តារស៊ូ ដោះលែងលោក ជា ចាន់ ឱ្យមានសេរីភាពវិញ និងបញ្ឈប់ជាបន្ទាន់នូវរាល់ការរំលោភសិទ្ធិកម្មករជាមូលដ្ឋាននៅក្នុងរោងចក្រវីងស្តារស៊ូ។
តាមរយៈវិទ្យុបារាំងអន្តរជាតិនៅថ្ងៃទី២២ កុម្ភៈ ឆ្នាំ២០២៤ អ្នកស្រី យ៉ាង សោភ័ណ្ឌ ប្រធានសហជីពកម្ពុជារំពឹងថា ការចូលរួមរបស់សហជីពអន្តរជាតិនេះជាការជួយជំរុញដ៏មានប្រសិទ្ធភាពដើម្បីដោះស្រាយអំពើរំលោភសិទ្ធិសេរីភាពសហជីពយ៉ាងច្បាស់។ តាមអ្នកស្រី យ៉ាង សោភ័ណ្ឌ សហជីពកម្ពុជា និងដៃគូពាក់ព័ន្ធកំពុងដាក់ពាក្យបណ្តឹងស្នើសុំអន្តរាគមន៍ទៅអ្នកបញ្ជាទិញទាំងអស់របស់រោងចក្រវីងស្តារស៊ូ ដើម្បីឱ្យមានការដោះលែង លោក ជា ចាន់។
គួរជ្រាបថា លោក ជា ចាន់ កំពុងឃុំខ្លួនជាបណ្តោះអាសន្ននៅពន្ធធនាគារខេត្តកំពង់ស្ពឺចាប់ពីថ្ងៃទី១៤កុម្ភៈ ឆ្នាំ២០២៤។ នៅថ្ងៃបន្ទាប់ សហព័ន្ធសហជីពកម្ពុជា (CATU) ចេញសេចក្តីថ្លែងការណ៍ដោយលើកឡើងថា លោក ជា ចាន់ ត្រូវបានស្នងការនគរបាលខេត្តកំពង់ស្ពឺចាប់ខ្លួនយ៉ាងកំរោល ដោយគ្មានប្រាប់ពីមូលហេតុ និង មិនមានបង្ហាញដីការចាប់ខ្លួន។ គឺទើបនៅថ្ងៃទី១៧ខែកុម្ភៈដែលតុលាការបានចោទលោក ជា ចាន់ ពីបទសមគំនិតក្នុងអំពើលួច សំណុំរឿងព្រហ្មទណ្ឌ ដែលអាចប្រឈមនឹងការជាប់ក្នុងពន្ធនាគារពី៦ខែ ទៅ៣ឆ្នាំ និងពិន័យជាប្រាក់ពី១លានទៅ៦លានរៀល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ