រយៈពេល៣០ឆ្នាំ កម្ពុជារំដោះដីពីចំការមីនបានជាង៣ពាន់គីឡូម៉ែត្រការ៉េ
ចាប់តាំងពីឆ្នាំ១៩៩២ ដល់ឆ្នាំ២០២៣ ប្រទេសកម្ពុជាបានប្រកាសថា មានផ្ទៃដីចំនួនជាង ៣ពាន់គីឡូម៉ែត្រការ៉េ ត្រូវបានបោសសម្អាតគ្រាប់មីន និងយកទៅប្រើប្រាស់ ដើម្បីបង្កបង្កើនផល។ តែប្រទេសនេះ នៅតែបន្តការងារដោះមីនបន្ថែមទៀត ដើម្បីសម្រេចឲ្យបាននូវចក្ខុវិស័យ «កម្ពុជាគ្មានមីនឆ្នាំ២០២៥»។ នេះបើតាមសារលិខិតរបស់ប្រមុខរដ្ឋាភិបាលកម្ពុជា នៅក្នុងឱកាសខួបលើកទី២៥ នៃទិវាជាតិយល់ដឹងអំពីមីន ២៤ កុម្ភៈ ២០២៤។
ចុះផ្សាយនៅថ្ងៃ៖
ស្តាប់ - ០១:៣៤
ក្នុងចំណោមផ្ទៃដីដែលរំដោះបានពីចំការមីនចំនួនជាង ៣ពាន់គីឡូម៉ែត្រការ៉េ ៧៦% ត្រូវបានយកទៅប្រើប្រាស់នៅក្នុងវិស័យកសិកម្ម។ ផ្ទៃដី៥% ត្រូវបានប្រើប្រាស់សម្រាប់កសាងហេដ្ឋារចនាសម្ព័ន្ធ និងមាន ១៩% ត្រូវបានយកទៅប្រើប្រាស់ក្នុងការសាងសង់លំនៅឋាន ភូមិករ សាលារៀន ឬមណ្ឌលសុខភាពជាដើមដោយប្រជាជនជិត ១២លាននាក់ ទទួលផលពីដីគ្មានមីនទាំងនេះ។
តាមសារលិខិតដែលមានចុះហត្ថលេខាដោយលោកនាយករដ្ឋមន្ត្រី ហ៊ុន ម៉ាណែត គ្រាប់មីន និងគ្រាប់មិនទាន់ផ្ទុះចំនួនជាង ៤លានគ្រាប់ ត្រូវបានរកឃើញ និងបំផ្លាញចោលក្នុងរយៈពេល ៣១ឆ្នាំកន្លងទៅ។ ក្នុងចំណោមគ្រាប់មីនដ៏ច្រើនសន្ធឹកសន្ធាប់នេះ មីនប្រឆាំងមនុស្សមានចំនួនជាង ១,១លានគ្រាប់ មីនប្រឆាំងរថក្រោះមានជាង ២៦ ០០០គ្រាប់ និងគ្រាប់មិនទាន់ផ្ទុះមានជាង ៣លានគ្រាប់។
ដោយឡែកចំនួនជនរងគ្រោះដោយសារគ្រាប់មីនបានថយចុះពី ៤ ៣២០នាក់ ក្នុងឆ្នាំ១៩៩៦ មកនៅត្រឹម ៣២នាក់ ក្នុងឆ្នាំ២០២៣។ ជាមធ្យម ចំនួនអ្នករងគ្រោះដោយគ្រាប់មីនធ្លាក់មកនៅក្រោម ១០០នាក់ ក្នុងរយៈពេល១០ឆ្នាំ និងមកនៅត្រឹម៥០នាក់ ក្នុងរយៈពេល៥ឆ្នាំចុងក្រោយ។
ទោះយ៉ាងណា ដើម្បីសម្រេចឲ្យបាននូវចក្ខុវិស័យ «កម្ពុជាគ្មានមីនឆ្នាំ២០២៥» ប្រទេសដែលញ៉ាំញីដោយសង្គ្រាមជាច្រើនទសវត្សរ៍មួយនេះ ត្រូវការបោសសម្អាតផ្ទៃដី ដែលមានមីនសេសសល់ចំនួន ៥៣៣គីឡូម៉ែត្រការ៉េ និងសំណល់ជាតិផ្ទុះ រួមទាំងគ្រាប់បែកចង្កោមជាង ១៣០០គីឡូម៉ែត្រការ៉េបន្ថែមទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ