អង្គការសហប្រជាជាតិ នឹងបើកកិច្ចប្រជុំស្ដីពីការបាត់ខ្លួននៅកម្ពុជា
គណៈកម្មាធិការប្រឆាំងការបាត់ខ្លួនដោយបង្ខំរបស់អង្គការសហប្រជាជាតិ នឹងបើកសម័យប្រជុំលើកទី២៦ របស់ខ្លួនចាប់ពីថ្ងៃទី១៩ កុម្ភៈ ដល់ថ្ងៃទី១ ខែមីនា ឆ្នាំ២០២៤ នៅទីក្រុងហ្សឺណែវ ប្រទេសស្វីស ដើម្បីពិនិត្យករណីបាត់ខ្លួននៅកម្ពុជា និងករណីបាត់ខ្លួននៅប្រទេសចំនួនពីរទៀត។ នេះបើតាមសេចក្តីប្រកាសព័ត៌មានរបស់អង្គការសហប្រជាជាតិផ្នែកសិទ្ធិមនុស្ស នៅថ្ងៃទី១៦ ខែកុម្ភៈ។
ចុះផ្សាយនៅថ្ងៃ៖
ស្តាប់ - ០២:៥១
ទោះជាក្នុងសេចក្តីប្រកាសព័ត៌មានមិនបានលំអិតពីករណីបាត់ខ្លួននៅកម្ពុជា ប៉ុន្តែអ្នកការពារសិទ្ធិមនុស្សជឿថា នៅក្នុងសម័យប្រជុំលើកទី២៦នេះ អង្គការសហប្រជាជាតិ នឹងពិនិត្យលើករណីបាត់ខ្លួនសកម្មជនសិទ្ធិមនុស្សថៃ លោក វ៉ាន់ឆាឡឺម សាតស័ក្តិសិទ្ធ។ សកម្មប្រឆាំងថៃរូបនេះបានបាត់ខ្លួននៅកម្ពុជាកាលពីថ្ងៃទី៤ ខែមិថុនា ឆ្នាំ២០២០ បន្ទាប់ពីជនមួយក្រុមបានចាប់បង្ខំឲ្យ ចូលក្នុងរថយន្តមួយដឹកយកទៅបាត់ នៅមុខអគារខុនដូ មេគង្គ ហ្គាដីនក្នុងខណ្ឌជ្រោយចង្វារ។
បើតាមសេចក្តីប្រកាសដដែល អ្នកជំនាញការអន្តរជាតិឯករាជ្យចំនួន ១០នាក់ នៃគណៈកម្មាធិការប្រឆាំងការបាត់ខ្លួនដោយបង្ខំ នឹងពិនិត្យករណីបាត់ខ្លួននោះ ដោយអនុវត្តទៅតាមអនុសញ្ញា និងអនុសាសន៍ដែលបានផ្តល់ដោយគណៈកម្មាធិការ ក្នុងសម័យប្រជុំកាលពីឆ្នាំមុន។ គណៈកម្មាធិការនេះបានទទួលរបាយការណ៍ ដែលបានដាក់ជូនដោយគណៈប្រតិភូមកពីបីប្រទេសគឺកម្ពុជា បូគីណា ហ្វាសូ និងហុងឌុយរ៉ាស់។ សម្រាប់ប្រទេសកម្ពុជានឹងចាប់ផ្តើមប្រជុំមុនគេ នៅថ្ងៃទី១៩ និង២០ ខែកុម្ភៈ នៅប្រទេសស្វីស។
កាលពីរំឭកខួប៣ឆ្នាំនៃការបាត់ខ្លួនសកម្មជនថៃអាវក្រហម កាលពីថ្ងៃទី៤មិថុនាឆ្នាំ២០២៣ ក្រុមសកម្មជនចំនួន២១នាក់ដែលពាក់ស្រោមមុខរូបវ៉ាន់ឆាឡឺម នៅតែបន្តស្នើអាជ្ញាធរកម្ពុជាបន្តការស៊ើបអង្គេតពីការបាត់ខ្លួននេះ និងផ្តល់យុត្តិធម៌នៅក្នុងករណីនេះ។
ជាការឆ្លើយតបអ្នកនាំពាក្យក្រសួងមហាផ្ទៃកម្ពុជា បានអះអាងថា សមត្ថកិច្ចកម្ពុជានៅមិនបិទការស៊ើបអង្កេតលើសំណុំរឿងនេះនៅឡើយ ខណៈអាជ្ញាធរក៏យល់ថា ការបាត់ខ្លួននេះអាចជារឿងនយោបាយ។
សូមបញ្ជាក់ថា វ៉ាន់ឆាលឺម ដែលបាត់ខ្លួននៅអាយុ៣៧ឆ្នាំ ត្រូវគេស្គាល់ថាជាសកម្មជនប្រជាធិបតេយ្យមួយរូប ដែលហ៊ានរិះគន់វាយប្រហារដោយចំៗទៅលើរដ្ឋាភិបាលថៃដឹកនាំដោយលោក ប្រាយុទ្ធ ចាន់អូឆារ។ ក្រោយរដ្ឋប្រហារថ្ងៃទី២២ឧសភាឆ្នាំ២០១៤នៅប្រទេសថៃ លោកវ៉ាន់ឆាលឺមបានភៀសខ្លួនទៅកាន់ប្រទេសឡាវ និងក្រោយមកមកកាន់កម្ពុជា ដើម្បីគេចពីរឿងក្ដីក្ដាំ ក្រោម ការចោទប្រកាន់ដោយរដ្ឋាភិបាលថៃ ទាក់ទងនឹងបទល្មើសប្រមាថព្រះមហាក្សត្រ និងបទឧក្រិដ្ឋតាមប្រព័ន្ធកុំព្យូទ័រ។
មួយថ្ងៃមុនពេលត្រូវចាប់ពង្រត់ ពោលគឺនៅថ្ងៃទី០៣ខែមិថុនា លោកវ៉ាន់ឆាលឺម បានបង្ហោះនូវវីដេអូដ៏ខ្លីមួយលើបណ្ដាញសង្គមហ្វេសប៊ុក ដែលមានខ្លឹមសារជេរប្រមាថអតីតនាយករដ្ឋមន្ដ្រីថៃ ប្រាយុទ្ធ ចាន់អូឆារ ថាជាមេដឹកនាំដែលល្ងង់ខ្លៅ បានតែនិយាយ តែដឹកនាំប្រទេសមិនកើត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ