ក្រសួងសុខាភិបាល៖ជំងឺផ្តាសាយបក្សីប្រភេទ H5N1 សម្លាប់ក្មេងប្រុសម្នាក់អាយុ៩ឆ្នាំ
ក្រសួងសុខាភិបាលបានប្រាប់ឲ្យដឹងនៅថ្ងៃទី៩ ខែកុម្ភៈនេះថា មានស្លាប់ក្មេងប្រុសម្នាក់អាយុ៩ឆ្នាំដោយសារជំងឺផ្ដាសាយបក្សីប្រភេទ(H5N1) កាលពីថ្ងៃទី៨ ខែកុម្ភៈ។ មរណៈភាពក្មេងប្រុសម្នាក់នេះកើតឡើងបន្ទាប់អ្នកផ្ទះបានយកមាន់ ទាងាប់ចំនួន៨ក្បាលទៅធ្វើម្ហូប។ នេះជាករណីគ្រោះថ្នាក់លើកទី១ ក្នុងឆ្នាំ ២០២៤ តែបើរាប់តាំងពីឆ្នាំ ២០២៣ ក្មេងប្រុសម្នាក់នេះជាមនុស្សទី៤ ដែលបានស្លាប់ដោយជំងឺផ្លូវដង្ហើម H5N1។
ចុះផ្សាយនៅថ្ងៃ៖
ស្តាប់ - ០២:២៧
ក្រសួងសុខាភិបាលបានអះអាងថា ទោះមានការយកចិត្តទុកដាក់ថែទាំ និងជួយសង្គ្រោះពីសំណាក់ក្រុមគ្រូពេទ្យយ៉ាងណាក៏ដោយ ក៏មិនអាចជួយក្មេងប្រុសម្នាក់នេះបានដែរ។ មិនអាចជួយបានព្រោះស្ថានភាពរបស់គេធ្ងន់ធ្ងរខ្លាំងពិបាកដកដង្ហើម ហត់ ក្អក សន្លប់រហូតដល់ស្លាប់។ ក្រោយពីការស្លាប់ក្មេងប្រុសម្នាក់នេះ ក្រសួងសុខាភិបាល ក្រសួងកសិកម្ម រុក្ខាប្រមាញ់ និងក្រសួងបរិស្ថានកំពុងធ្វើការរួមគ្នាយ៉ាងសកម្មស្រាវជ្រាវស្វែងរកអ្នកពាក់ព័ន្ធផ្សេងទៀតដើម្បីទប់ស្កាត់ការឆ្លងបន្តក្នុងសហគមន៍។
នៅចំពោះមុខការស្លាប់ជាបន្តបន្ទាប់នេះ ក្រសួងសុខាភិបាលបានអំពាវនាវឲ្យពលរដ្ឋយកចិត្តទុកដាក់ប្រុងប្រយ័ត្នជានិច្ចព្រោះជំងឺផ្ដាសាយបក្សី(H5N1)នៅតែបន្តគំរាមកំហែងដល់សុខភាពប្រជាជន។ ប្រសិនបើមានអាការៈក្ដៅខ្លួន ក្អកហៀរសំបោរ ពិបាកដកដង្ហើម ឬមានប្រវត្តិធ្លាប់ប៉ះពាល់ជាមួយទាមាន់ឈឺ ឬងាប់ គឺ កុំចេញទៅទីប្រជុំជនដែលមានមនុស្សច្រើន។
ក្រសួងលើកឡើងថា តាមធម្មតា ជំងឺផ្តាសាយបក្សី H5N1បានចម្លងរវាងសត្វបក្សីឈឺទៅបក្សីផ្សេងទៀត។ តែពេលខ្លះ វាអាចចម្លងពីបក្សីទៅមនុស្សតាមការប៉ះពាល់ជិតស្និទ្ធជាមួយបក្សីដែលឈឺ ឬស្លាប់។ ជំងឺផ្តាសាយបក្សីលើមនុស្សជាជំងឺធ្ងន់ធ្ងរដែលតម្រូវឱ្យព្យាបាលនៅមន្ទីរពេទ្យទាន់ពេលវេលា។
គួររម្លឹកថាចាប់តាំងពីដើមឆ្នាំ២០២៣ មក អាជ្ញាធរសុខាភិបាលកម្ពុជាបានរកឃើញករណីស្លាប់ដោយសារជំងឺផ្តាសាយបក្សីចំនួន៤ករណី ក្នុងនោះ ករណីទីមួយកើតលើក្មេងស្រីអាយុ១១ឆ្នាំក្នុងខេត្តកណ្តាល ករណីទីពីរកើតលើក្មេងស្រីអាយុ ២ឆ្នាំក្នុងខេត្តព្រៃវែង ករណីទីបីកើតលើបុរសអាយុ ៥០ឆ្នាំក្នុងខេត្តព្រៃវែងដដែល និងករណីចុងក្រោយកើតលើក្មេងប្រុសអាយុ៩ឆ្នាំក្នុងខេត្តក្រចេះ។
បើគិតក្នុងករណីស្លាប់ចុងក្រោយនេះ កម្ពុជាបានរកឃើញករណីជំងឺផ្តាសាយបក្សី H5N1សរុបចំនួន៥៩ករណីឆ្លងលើមនុស្ស ក្នុងនោះមានស្លាប់ចំនួន៤០នាក់គិតតាំងពីឆ្នាំ២០០៥ ដែលកម្ពុជារកឃើញករណីឆ្លងដំបូង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ