មន្រ្តីជំនាញ៖ជើងមាន់បង្កកនិងបង្គាគីមីជាង១០៦តោនត្រូវបានកម្ទេចចោល
កាលពីថ្ងៃទី៤ខែ កុម្ភៈ ក.ប.ប បានកម្ទេចចោលជើងមាន់បង្កកជាង១០២តោន ដែលពុំមានអនាម័យត្រឹមត្រូវ។ ទន្ទឹមគ្នានេះ បង្គាចាក់ចាហួយជាង ៤តោនក៏ត្រូវបានកម្លាំងជំនាញបង្ក្រាបបាន និងដុតកម្ទេចនៅ ថ្ងៃទី៨ កុម្ភៈម្សិលមិញ។
ចុះផ្សាយនៅថ្ងៃ៖
ស្តាប់ - ០១:៣១
យោងតាមអគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ ហៅកាត់ថា ក.ប.ប មានជើងមាន់បង្កកជាង ១០២តោន ឬ ១០២,៦០០ គីឡូក្រាមត្រូវបានសមត្ថកិច្ចជំនាញឃាត់ចាប់បានលើរថយន្តដឹកកុងទឺនឺ ចំនួន៤គ្រឿង។ តាមក.ប.ប ជើងមាន់បង្កកទាំងនេះដែលគ្មានឯកសារបញ្ជាក់ពីគុណភាព និងគ្មានស្តង់ដារអនាម័យល្អត្រូវបានយកទៅកម្ទេចចោលភ្លាមៗ កាលពីថ្ងៃទី៤ខែកុម្ភៈកន្លងទៅ។
ចំណែកបង្គាចំនួន ២៦៦កេះ ស្មើនឹង ៤២៦៨ គីឡូក្រាម ត្រូវបានសមត្ថកិច្ចបង្ក្រាប បាននៅម្ដុំត្រឡោកបែក និងយកទៅដុតកម្ទេចចោលនៅថ្ងៃទី៨ ខែកុម្ភៈម្សិលមិញ។ ការដុតកម្ទេចចោល បង្គាទាំងនេះ ធ្វើឡើងក្រោយមន្រ្តីជំនាញរកឃើញមាន ផ្ទុកសារធាតុគីមី ដូចជាការចាក់ចាហួយចូលក្នុង បង្គាជាដើម។ នេះបើយោងតាមស្នងការនគរបាលរាជធានីភ្នំពេញ។
តាមការកត់សម្គាល់ បង្គាមានចាក់ចាហួយ ឬមានផ្ទុកសារធាតុគីមីតែងត្រូវបានសមត្ថកិច្ចជំនាញបង្ក្រាបបានក្នុងចំនួនដ៏ច្រើននៅមុនពិធីបុណ្យចូលឆ្នាំចូលមកដល់។ ជាក់ស្តែងកាលពីថ្ងៃទី១៩ មករា ឆ្នាំ២០២៣កន្លងទៅ សមត្ថកិច្ចក៏បានរកឃើញបង្គាចាក់ចាហួយនៅម្ដុំត្រឡោកបែកដូចគ្នានេះដែរ ចំនួន២០០គីឡូក្រាម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ