លោក ហ៊ុន ម៉ាណែត បញ្ជាឲ្យពិនិត្យឡើងវិញលើការផ្សព្វផ្សាយគ្រឿងស្រវឹង
លោកនាយករដ្ឋមន្ត្រី ហ៊ុន ម៉ាណែត បញ្ជាឲ្យអាជ្ញាធរពាក់ព័ន្ធពិនិត្យឡើងវិញ អំពីការផ្សព្វផ្សាយពាណិជ្ជកម្មគ្រឿងស្រវឹង ពិសេសការផ្សាយនៅលើផ្ទាំងប៉ាណូតាមទីសាធារណៈ ដោយត្រូវឲ្យកម្រិតឲ្យបានសមរម្យ។ វិធានការនេះ បើតាមប្រមុខរដ្ឋាភិបាល គឺជាការរួមចំណែកកាត់បន្ថយគ្រោះថ្នាក់ចរាចរណ៍ដែលបណ្តាលមកពីអ្នកបើកបរនៅក្រោមឥទ្ធិពលនៃគ្រឿងស្រវឹង។
ចុះផ្សាយនៅថ្ងៃ៖
ស្តាប់ - ០២:២១
បទបញ្ជាផ្ទាល់មាត់របស់លោក ហ៊ុន ម៉ាណែត គឺធ្វើឡើងនៅក្នុងកិច្ចប្រជុំគណៈរដ្ឋមន្ត្រីនៅថ្ងៃទី២កុម្ភៈឆ្នាំ២០២៤ ដោយប្រមុខរដ្ឋាភិបាលក៏បានណែនាំដល់ក្រសួងព័ត៌មានសហការជាមួយក្រសួងសុខាភិបាល និងក្រសួងពាណិជ្ជកម្ម ដឹកនាំបង្កើតក្រមប្រតិបត្តិមួយជាក់លាក់ដើម្បីអនុវត្តចំពោះការផ្សព្វផ្សាយពាណិជ្ជកម្មគ្រឿងស្រវឹង។
សម្រាប់ លោក យង់ គឹមអេង លើសពីការត្រួតពិនិត្យការផ្សាយពាណិជ្ជកម្ម រដ្ឋាភិបាលគួរតែទម្លាក់ប៉ាណូផ្សាយពាណិជ្ជកម្មគ្រឿងស្រវឹងដែលកំពុងរីកដុះដាលនោះចេញឲ្យអស់ពីទីសាធារណៈ នោះទើបទទួលបានការសារទពីពលរដ្ឋ។
បើតាម នាយកប្រតិបត្តិមជ្ឈមណ្ឌលប្រជាពលរដ្ឋដើម្បីអភិវឌ្ឍន៍ និងសន្តិភាព ការពន្លឿនចេញច្បាប់ស្តីពីការគ្រប់គ្រងគ្រឿងស្រវឹង និងការតម្លើងពន្ធលើគ្រឿងស្រវឹង ក៏ជាកត្តាចាំបាច់ដើម្បីកាត់បន្ថយគ្រោះថ្នាក់ចរាចរណ៍ផងដែរ។
សូមបញ្ជាក់ថា គ្រោះថ្នាក់ចរាចរណ៍បង្កឡើងដោយអ្នកបើកបរស្ថិតក្រោមស្ថានភាពស្រវឹង បានកើនឡើងគួរឲ្យកត់សម្គាល់នាដើមឆ្នាំ២០២៤នេះ។
ករណីថ្មីៗមួយ គឺមានមនុស្ស៤នាក់ស្លាប់ និងរបួសធ្ងន់ស្រាលជាច្រើននាក់ ត្រង់ស្ពានឬស្សីកែវ កាលពីយប់ថ្ងៃទី២០ខែមករា ដែលបង្កឡើងដោយបុរសម្នាក់ជាមន្ត្រីក្រសួងសេដ្ឋកិច្ច។ សមត្ថកិច្ចរកឃើញថា បុរសវ័យ៥៦ឆ្នាំរូបនោះ បើកបរដោយមានជាតិស្រវឹង០.៥៤mg/L។
ករណីនេះត្រូវគេទម្លាក់កំហុសលើកការទឹកចិត្តឲ្យមនុស្សងប់ងល់នឹងការសេពគ្រឿងស្រវឹង តាមរយៈការផ្សាយពាណិជ្ជកម្មគ្រឿងស្រវឹងនៅតាមទីសាធារណៈ។
បើតាម លោក យង់ គឹមអេង ថ្វីបើប្រាក់ចំណូលរបស់ក្រុមហ៊ុនគ្រឿងស្រវឹងមាន ១ ៣៦០ លានដុល្លារក្នុងមួយឆ្នាំ តែចំណូលចូលរដ្ឋបានតែជាង២០០លានដុល្លារប៉ុណ្ណោះ។ លោកថា បើធៀបនឹងការខាតបង់ដោយសារតែគ្រោះថ្នាក់បណ្តាលមកពីគ្រឿងស្រវឹងមានរហូតដល់ជាង៥០០លានដុល្លារឯណោះ។ នេះនៅមិនគិតដល់គ្រោះថ្នាក់ដល់សុខភាព នាំឲ្យកើតជំងឺច្រើនមុខដោយសារតែការសេពគ្រឿងស្រវឹងផងនោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ