លោក ហ៊ុន ម៉ាណែត ព្រមានដកមន្ត្រីពុករលួយរំលោភយកដីអភិរក្សនៅបឹងទន្លេសាប
នៅថ្ងៃទី៣០មករា លោកនាយករដ្ឋមន្ត្រី ហ៊ុន ម៉ាណែតបានព្រមានដកតំណែងមន្ត្រីពុករលួយណាដែលឃុបឃិតជាមួយជនទុច្ចរិតរំលោភយកដីអភិរក្សនៅបឹងទន្លេសាប។ ទន្ទឹមគ្នានេះ លោកក៏បានបញ្ជាឱ្យអាជ្ញាធរខេត្តទាំង៦នៅតាមបឹងទន្លេសាបពង្រឹងការគ្រប់គ្រងដីអភិរក្សនោះឡើងវិញ ដោយសុក្រិត្យភាពនិងប្រសិទ្ធភាព។
ចុះផ្សាយនៅថ្ងៃ៖
ស្តាប់ - ០២:៣២
ជាថ្មីម្តងទៀត នាយករដ្ឋមន្ត្រីកម្ពុជា លោក ហ៊ុន ម៉ាណែត ព្រមានដកតំណែងមន្ត្រីពុករលួយ ដែលរួមគំនិតទន្ទ្រានយកដីអភិរក្សនៅបឹងទន្លេសាប។ សម្រាប់លោក ហ៊ុន ម៉ាណែត ការប្រើអំណាចចុងប៊ិចជារឿងចាំបាច់ដើម្បីទប់ស្កាត់ការរំលោភទន្ទ្រានយកដី ដែលមិនត្រឹមតែបំផ្លាញជីវៈចម្រុះ និងបង្រួញផ្ទៃដីបឹងទន្លេសាបប៉ុណ្ណោះទេ តែវាក៏បំផ្លាញមុខមាត់កម្ពុជាទាំងមូលដែរ។ ការថ្លែងរបស់លោកបានធ្វើឡើង នៅក្នុងវេទិកាសារធារណៈមួយនៅថ្ងៃទី៣០ មករា ឆ្នាំ២០២៤។
នៅចំពោះមុខនៃការទន្ទ្រានដីអភិរក្សបឹងទន្លេសាបឥតឈប់ឈរ លោក ហ៊ុន ម៉ាណែត ក៏បានបញ្ជាឱ្យអាជ្ញាធរខេត្តនៅតាមបឹងទន្លេសាបទាំងអស់ ពង្រឹងការគ្រប់គ្រងដីអភិរក្សនោះឡើងវិញដោយសុក្រិត្យភាពនិងប្រសិទ្ធភាព។ តាមការអះអាងរបស់លោក ហ៊ុន ម៉ាណែត វិធានការកាត់ឆ្វៀលដីបឹងទន្លេសាបរបស់រដ្ឋាភិបាលកម្ពុជាកន្លងមកមិនមែនសម្រាប់ប្រយោជន៍បុគ្គលកាងដោយមន្ត្រីពុករលួយទេ តែសម្រាប់ឱ្យពលរដ្ឋមួយចំនួនក្នុងការអាស្រ័យផលនៅលើដីនោះឡើងវិញ។
បន្ថែមពីនេះ នាយករដ្ឋមន្ត្រីក៏បានបញ្ជាឱ្យគូសផែនទីតំបន់ការពារបឹងទន្លេសាបនិងបោះបង្គោលការពារនៅតំបន់នោះឡើងវិញផងដែរ។ ដោយឡែកក្នុងថ្ងៃទី៣០មករាដដែល គណៈកម្មការសុរិយោដីថ្នាក់ជាតិ អាជ្ញាធរទន្លេសាប អាជ្ញាធរមូលដ្ឋាន និងក្រសួងស្ថាប័នពាក់ព័ន្ធ ដែលដឹកនាំដោយរដ្ឋមន្ត្រីក្រសួងដែនដី លោក សាយ សំអាល់ បានបើកកិច្ចប្រជុំមួយ ដើម្បីកំណត់យកតំបន់បឹងទន្លេសាបទាំងមូលដើម្បីធ្វើការចុះបញ្ជីដីធ្លីឲ្យមានលក្ខណៈជាប្រព័ន្ធ។
សូមជម្រាបជូនថា រដ្ឋាភិបាលកម្ពុជាកាលពីឆ្នាំ២០២១ បានដាក់ចេញវិធានការក្តៅទប់ស្កាត់ការទន្ទ្រានដីរដ្ឋក្នុងដែនព្រៃលិចទឹកតំបន់បឹងទន្លេសាបនៃខេត្តទាំង៦ គឺខេត្តពោធិ៍សាត់ កំពង់ធំ បាត់ដំបង បន្ទាយមានជ័យ និងសៀមរាប។ តាមរបាយការណ៍របស់ក្រសួងដែនដី គិតត្រឹមដំណាច់ខែកក្កដាឆ្នាំ២០២៣ រដ្ឋាភិបាលកម្ពុជាបានសម្រេចកែប្រែទំហំដីបឹងទន្លេសាបប្រមាណជិត ៥៥០ ០០០ហិកតា និងផ្តល់ជាកម្មសិទ្ធិជូនប្រជាពលរដ្ឋចំនួនសរុប៩២៧៨៩ គ្រួសារ។
តាមរយៈវិធានការនេះដែរ រដ្ឋាភិបាលកម្ពុជាបានរកឃើញករណីរំលោភបំពានដីព្រៃលិចទឹកក្នុងបឹងទន្លេសាបជាច្រើនហិកតា។ ជាក់ស្តែង ក្នុងឆ្នាំ២០២១នោះ អង្គភាពប្រឆាំងអំពើពុករលួយបានធ្វើការស៊ើបអង្កេតស្រាវជ្រាវ និងចាត់វិធានការច្បាប់ចំពោះអតីតអភិបាលខេត្តកំពង់ឆ្នាំង លោក ឈួរ ច័ន្ទឌឿន និងដកហូតដីជាង២ ០០០ហិកតាទុកជាសម្បត្តិរដ្ឋវិញ រួមទាំងមន្ត្រីដែលពាក់ព័ន្ធផ្សេងទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ