ក្រសួងសុខាភិបាលព្រមានពីការឆ្លងរាលដាលនៃជំងឺផ្តាសាយបក្សី
ក្រសួងសុខាភិបាលព្រមានពីការឆ្លងរាលដាលនៃជំងឺផ្តាសាយបក្សីនៅកម្ពុជា ខណៈជំងឺនេះត្រូវបានរកឃើញឆ្លងទៅលើកូនក្មេងម្នាក់អាយុ៣ឆ្នាំនៅស្រុកកំពង់ត្របែកខេត្តព្រៃវែងនៅថ្ងៃទី២៥មករាឆ្នាំ២០២៤។ បើតាមក្រសួងសុខាភិបាល អំឡុងពេល១០ថ្ងៃមុនពេលមានករណីនេះកើតឡើង គឺមានសត្វមាន់ ទា នៅក្នុងភូមិ និងជុំវិញផ្ទះរបស់កុមាររងគ្រោះបានកើតជំងឺផ្តាសាយបក្សីនេះ។
ចុះផ្សាយនៅថ្ងៃ៖
ស្តាប់ - ០២:០១
នៅក្នុងសេចក្តីប្រកាសនៅថ្ងៃទី២៦មករា ក្រសួងសុខាភិបាលបានរំឭកឲ្យប្រជាពលរដ្ឋមានការប្រុងប្រយ័ត្នជានិច្ចពីជំងឺផ្តាសាយបក្សីនេះ ដោយព្រមានថា ជំងឺH5N1នៅតែបន្តគំរាមកំហែងដល់សុខភាពប្រជាជនកម្ពុជា។
នៅចំពោះមុខនេះ បើតាមក្រសួងដដែល គឺមានមន្ត្រីជំនាញចុះទៅអង្កេតស្រាវជ្រាវ និងបន្តស្វែងរកប្រភពចម្លងទាំងលើសត្វនិង មនុស្ស ដើម្បីទប់ស្កាត់ការចម្លងទៅក្នុងសហគមន៍ រួមទាំងអប់រំផ្សព្វផ្សាយផងដែរ។
សូមបញ្ជាក់ថា ជំងឺផ្តាសាយបក្សី H5N1 គឺជាប្រភេទជំងឺដែលឆ្លងពីសត្វបក្សីឈឺទៅសត្វបក្សីផ្សេងទៀត ប៉ុន្តែជួនកាលវាឆ្លងពីបក្សីឈឺទៅមនុស្សតាមរយៈប៉ះពាល់សត្វដែលឈឺឬងាប់។ ផ្តាសាយបក្សី H5N1 ជាជំងឺធ្ងន់ធ្ងរដែលតម្រូវឲ្យមានការព្យាបាលនៅមន្ទីរពេទ្យទាន់ពេល។
កាលពីដើមខែតុលា ឆ្នាំ ២០២៣ អាជ្ញាធរសុខាភិបាលកម្ពុជាបានរកឃើញថា ជំងឺផ្តាសាយបក្សី បានសម្លាប់ក្មេងស្រីម្នាក់ អាយុ២ឆ្នាំ នៅខេត្តព្រៃវែង និងបុរសម្នាក់អាយុ៥០ឆ្នាំ នៅខេត្តស្វាយរៀង។ បន្ទាប់មកនៅថ្ងៃទី ២៣ ខែវិច្ឆិកា ឆ្នាំ២០២៣ ដដែល ជំងឺនេះបានកើតលើស្រ្តីអាយុ ២១ ឆ្នាំម្នាក់នៅស្រុកដងទង់ ខេត្តកំពត។
បើតាមប្រធាននាយកដ្ឋានជំងឺឆ្លងនៃក្រសួងសុខាភិបាល ចាប់តាំងពីឆ្នាំ២០០៤ រហូតដល់ឆ្នាំ២០២៤ កម្ពុជារកឃើញអ្នកឆ្លងជំងឺផ្តាសាយបក្សី H5N1 ជិត៦០ ករណី ធ្វើឲ្យមានមនុស្សស្លាប់សរុប ៣៨នាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ