លោក អំ សំអាត៖ការធ្វើវិសោធនកម្មច្បាប់ស្ដីពីការបង្ក្រាបល្បែងស៊ីសងស្របនឹងបរិបទបច្ចុប្បន្ន
នៅថ្ងៃទី២៦ ខែមករានេះ លោក អំ សំអាត នាយកទទួលបន្ទុកកិច្ចការទូទៅនៃអង្គការសិទ្ធិមនុស្សលីកាដូបានលើកឡើងថា ការធ្វើវិសោធនកម្មច្បាប់ស្ដីពីការបង្ក្រាបល្បែងស៊ីសងឆ្នាំ១៩៩៦ គឺសមស្របនឹងស្ថានការណ៍បច្ចុប្បន្ន។ ស្ថានការណ៍បច្ចុប្បន្នដែលមន្ត្រីអង្គការសង្គមស៊ីវិលរូបនេះមើលឃើញថា ការលេងល្បែងស៊ីសង់និងល្បែងតាមអនឡាញកំពុងក្លាយជារូបភាពអនាធិបតេយ្យនៅក្នុងសង្គម។
ចុះផ្សាយនៅថ្ងៃ៖
ស្តាប់ - ០២:១៧
ការលើកឡើងរបស់ លោក អំ សំអាត ធ្វើឡើងស្របពេលដែលក្រសួងមហាផ្ទៃ កំពុងរៀបចំធ្វើវិសោធនកម្មច្បាប់ស្ដីពីការបង្ក្រាបល្បែងស៊ីសងឆ្នាំ១៩៩៦។ ក្រសួងមហាផ្ទៃបានអះអាងថា ការរៀបចំធ្វើវិសោធនកម្មច្បាប់មួយ នេះមានកម្មវត្ថុធ្វើ ឲ្យស៊ីចង្វាក់ជាមួយច្បាប់ស្ដីពីការគ្រប់គ្រងល្បែងពាណិជ្ជកម្មឆ្នាំ២០២០ក្នុង ការធានាឱ្យមានការបង្ក្រាប និងការលុបបំបាត់ល្បែងស៊ីសងខុសច្បាប់គ្រប់ប្រភេទឱ្យមានប្រសិទ្ធភាព។ តាមក្រសួងមហាផ្ទៃ ច្បាប់ស្ដីពីការបង្ក្រាបល្បែងស៊ីសងឆ្នាំ ១៩៩៦ មិនអាចឆ្លើយតបទៅនឹងបរិបទនៃការរីកចម្រើនបច្ចេកវិទ្យាក្នុងសម័យឌីជីថលបានទេ។
គួរបញ្ជាក់ថា ច្បាប់ស្ដីពីការបង្ក្រាបល្បែងស៊ីសងឆ្នាំ១៩៩៦ មាន៤ជំពូកនិង១៣មាត្រា។ មាត្រាទី ៥ បានបញ្ជាក់ថា អ្នកបើកកន្លែងលេងល្បែងស៊ីសង អ្នកកាន់កាប់ល្បែងស៊ីសង អ្នកចាត់ចែង និងភ្នាក់ងារលេងល្បែងស៊ីសងនឹងត្រូវផ្ដន្ទាទោសពិន័យជាប្រាក់ពី ៥ លានរៀល ទៅ ២០ លានរៀល និងដាក់គុកពី ១ ឆ្នាំ ទៅ ៥ ឆ្នាំ។
ចំណែកមាត្រាទី ១០ បានបញ្ជាក់ថា ក្រៅពីរដ្ឋាភិបាល អាជ្ញាធរណាក៏ដោយក៏គ្មានសិទ្ធិចេញលិខិតអនុញ្ញាតឱ្យបើកលេងល្បែងស៊ីសងនៅកន្លែងណាជាដាច់ខាត។ ចំពោះមន្ត្រី ឬភ្នាក់ងាររាជការណាដែលនៅតែចេញលិខិតអនុញ្ញាតឱ្យបើកល្បែងស៊ីសង នឹងត្រូវផ្តន្ទាទោសដាក់ពន្ធនាគារពី ១ ឆ្នាំ ទៅ ៥ ឆ្នាំ។
លោក អំ សំអាត នាយកទទួលបន្ទុកកិច្ចការទូទៅនៃអង្គការសិទ្ធិមនុស្សលីកាដូយល់ស្របថា ល្បែងស៊ីសង់នាពេល បច្ចុប្បន្នកាន់តែមានលក្ខណៈទំនើប និងសម្បូរបែបដែលទាមទារឲ្យធ្វើវិសោធនកម្មច្បាប់សព្វថ្ងៃដើម្បីដាក់បន្ទុកលើជនប្រព្រឹត្ត។ តែលោក អំ សំអាត ក្រើនរំឮកថា បើមានច្បាប់ល្អ តែការអនុវត្ត ច្បាប់គ្មានប្រសិទ្ធិភាពក៏មិនអាចទប់ស្កាត់បទល្មើសបានដែរ។
គួររម្លឹកថា ក្នុងរយៈពេល ៣សប្ដាហ៍នៃខែមករានេះ សមត្ថកិច្ចបង្ក្រាបបានទីតាំងល្បែងស៊ីសងខុសច្បាប់រហូតដល់ ៤៣ទីតាំងក្នុងភូមិសាស្រ្តរាជធានីភ្នំពេញ និងចាប់ជនសង្ស័យសរុប ៧២នាក់បញ្ជូនទៅ តុលាការ នេះបើតាមរបាយការណ៍របស់ក្រសួងមហាផ្ទៃ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ