សង្គមស៊ីវិល ៥៥អង្គការស្នើសុំលោក ហ៊ុន ម៉ាណែតកសាងស្តូបបញ្ចប់វប្បធម៌និទណ្ឌភាព
នៅថ្ងៃទី២២ ខែមករានេះ ក្រុមអង្គការសង្គមស៊ីវិល សហជីពចំនួន ៥៥ស្ថាប័ន បានដាក់ញត្តិមួយជូនលោកនាយករដ្ឋមន្ត្រី ហ៊ុន ម៉ាណែត ដើម្បីស្នើសុំកសាងស្តូប«បញ្ឈប់វប្បធម៌និទណ្ឌភាព»នៅរាជធានីភ្នំពេញ។ សំណើសុំរបស់អង្គការសង្គមស៊ីវិលទាំងនេះ ធ្វើឡើងនៅក្នុងឱកាសប្រារព្ធខួប ២០ឆ្នាំ នៃឃាតកម្មលើលោក ជា វិជ្ជា មេដឹកនាំសហជីពដ៏ល្បីល្បាញនៅក្នុងប្រទេសកម្ពុជា។
ចុះផ្សាយនៅថ្ងៃ៖
ស្តាប់ - ០២:០៨
ញត្តិដែលមានរាយឈ្មោះអង្គការក្រៅរដ្ឋាភិបាល សហជីព សហគមន៍ដីធ្លីចំនួន៥៥ បានសរសេរត្រង់ទៅកាន់លោកនាយករដ្ឋមន្ត្រី ហ៊ុន ម៉ាណែត ថា ការដែលមានស្តូប «បញ្ឈប់វប្បធម៌និទណ្ឌភាព» ពិតជាមានសារៈសំខាន់យ៉ាងខ្លាំង ដើម្បីជាការដាស់តឿន និងក្រើនរំលឹកដល់ភាគីពាក់ព័ន្ធឲ្យនាំគ្នាលុបបំបាត់វប្បធម៌និទណ្ឌភាព លើកកម្ពស់យុត្តិធម៌សង្គម គោរពសិទ្ធិមនុស្ស និងលទ្ធិប្រជាធិបតេយ្យនៅប្រទេសកម្ពុជា។
ដោយលើកឡើងពីសំដីលោក ជា វិជ្ជា ដែលថា «យុត្តិធម៌សង្គមគឺជាមូលដ្ឋានគ្រឹះនៃសន្តិភាព» ក្រុមអង្គការសង្គមស៊ីវិលបានរំលឹកដល់រដ្ឋាភិបាលឲ្យបំពេញកាតព្វកិច្ចលុបបំបាត់វប្បធម៌និទណ្ឌភាព និងត្រូវមានភាពឯករាជ្យនៃប្រព័ន្ធយុត្តិធម៌។
ញត្តិសង្គមស៊ីវិលក៏បានរៀបរាប់ផងដែរពីឃាតកម្មលើអ្នកកាសែតចំនួន ១៥នាក់ ចាប់តាំងពីឆ្នាំ១៩៩៤ ក្នុងនោះមាន ១២នាក់ បានបាត់បង់ជីវិត ដោយសារតែការរាយការណ៍ព័ត៌មានរសើបនៅក្នុងប្រទេសកម្ពុជា និងដែលរហូតមកទល់ពេលនេះ ពុំមានជនល្មើសណាម្នាក់ត្រូវបាននាំយកមកកាត់ទោសតាមច្បាប់ឡើយ។
បញ្ហានិទណ្ឌភាពផ្សេងទៀតក៏ត្រូវបានរាប់បញ្ចូលនៅក្នុងញត្តិផ្ញើទៅប្រមុខរដ្ឋាភិបាលដែរ ដូចជាអតីតអភិបាលក្រុងបាវិតលោក ឈូក បណ្ឌិត បានបាញ់ទៅលើកម្មការិនីកាត់ដេរ៣នាក់ឲ្យរងរបួស ឃាតកម្មលើលោកបណ្ឌិត កែម ឡី រួមនឹងឃាតកម្មលើមេដឹកនាំសហជីព លោក ជា វិជ្ជា ជាដើម។ មន្ត្រីរដ្ឋាភិបាល និងខុទ្ទកាល័យនាយករដ្ឋមន្ត្រីនៅមិនទាន់មានការឆ្លើយតបយ៉ាងណានៅឡើយទៅនឹងសំណើររបស់ក្រុមអង្គការសង្គមស៊ីវិលពេលនេះ។
សូមរំលឹកថាលោក ជា វិជ្ជា អតីតប្រធានសហជីពសេរីកម្មករនៃព្រះរាជាណាចក្រកម្ពុជា ត្រូវបានជនមិនស្គាល់មុខបាញ់ប្រហារឲ្យស្លាប់ភ្លាមៗនៅខាងមុខតូបលក់កាសែតមួយក្បែរវត្តលង្កា នៅថ្ងៃទី២២ ខែមករា ឆ្នាំ២០០៤។
ចាប់តាំងពីថ្ងៃនោះមក មេដឹកនាំ និងសកម្មជនសហជីព សង្គមស៊ីវិលតែងនាំគ្នាធ្វើពិធីរំលឹកវិញ្ញាណក្ខន្ធជារៀងរាល់ឆ្នាំដោយមិនដែលខកខាននៅមុខតូបលក់កាសែត និងនៅមុខរូបសំណាកលោក ជា វិជ្ជា ធ្វើអំពីថ្ម។ ជាមួយគ្នានោះ សម្រែករកយុត្តិធម៌ក៏បន្លឺឡើងគ្រប់ពេលវេលាដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ