លោកហ៊ុន ម៉ាណែត ហួសចិត្តក្រោយលោក សម រង្ស៊ី ប្រាប់លោក ម៉ាក្រុង កុំឲ្យចាញ់បោកត្រកូល«ហ៊ុន»
នៅក្នុងជំនួបជាមួយពលរដ្ឋខ្មែរនៅទីក្រុងប៉ារីសប្រទេសបារាំង កាលពីថ្ងៃអាទិត្យម្សិលមិញ ប្រមុខរដ្ឋាភិបាលកម្ពុជាលោក ហ៊ុន ម៉ាណែត បានថ្លែងថាអ្នកនយោបាយខ្មែរវ័យចំណាស់ នៅក្នុងប្រទេសបារាំងបានចេញទៅពន្យល់ប្រធានាធិបតីបារាំងកុំឲ្យចាញ់បោករូបលោក។ អ្នកនយោបាយវ័យចំណាស់នោះ ត្រូវគេគិតថាលោក សម រង្ស៊ី ដោយសារលោក សម រង្ស៊ី បានបញ្ចេញទស្សនៈជាសំណេរទៅកាន់កាសែតជាភាសាបារាំងផ្សាយនៅក្នុងប្រទេសថៃឈ្មោះ Gavroche កាលពីថ្ងៃទី១៣ ខែមករា ឆ្នាំ២០២៤។
ចុះផ្សាយនៅថ្ងៃ៖
ស្តាប់ - ០១:៤៥
នៅចំពោះមុខពលរដ្ឋខ្មែរជាង២ពាន់នាក់ នាទីក្រុងប៉ារីសប្រទេសបារាំង លោកនាយករដ្ឋមន្ត្រី ហ៊ុន ម៉ាណែត បានសម្តែងការហួសចិត្តចំពោះការលើកឡើងរបស់លោក សម រង្ស៊ី ទាក់ទងទៅនឹងទស្សនកិច្ចផ្លូវការរបស់លោកនៅប្រទេសបារាំងនាសប្តាហ៍នេះ។
ប្រតិកម្មរបស់លោក ហ៊ុន ម៉ាណែត ដូចនេះគឺបន្ទាប់ពីលោក សម រង្ស៊ី បានបញ្ចេញជាទស្សនៈទៅកាន់កាសែតបារាំង Gavroche Hebdo ដែលមានមូលដ្ឋាននៅប្រទេសថៃ ដោយបានរៀបរាប់ពីការសរសេរលិខិតទៅកាន់ប្រធានាធិបតីបារាំងលោក អេម៉ានុយអែល ម៉ាក្រុង ដើម្បីកុំឲ្យចាញ់បោកត្រកូល«ហ៊ុន»។ តាមលោក ហ៊ុន ម៉ាណែត បើប្រធានាធិបតីប្រទេសមហាអំណាចមួយដូចជាបារាំងឲ្យលោកបោកបានគឺចប់ហើយ។
កាសែត Gavroche បានចុះផ្សាយសំណេររបស់លោក សម រង្ស៊ី ប្រធានស្តីទីអតីតគណបក្សសង្គ្រោះជាតិ ដោយវាយប្រហារទៅលើលោក ហ៊ុន សែន អតីតនាយករដ្ឋមន្ត្រីកម្ពុជាទាក់ទងទៅនឹងការរំលោភសិទ្ធិមនុស្ស និងការធ្វើទុក្ខបុកម្នេញសម្លេងប្រឆាំងនៅកម្ពុជា។
ក៏ប៉ុន្តែ លោក ហ៊ុន ម៉ាណែត បានលើកឡើងថាលោកប្រធានាធិបតីបារាំងបានសម្រេចចិត្តផ្ញើលិខិតកំរិតខ្ពស់បំផុតអញ្ជើញលោកធ្វើទស្សនកិច្ចនៅបារាំងថ្ងៃទី១៨ និងទី១៩ ខែមករានេះ គឺប្រាកដជាមានការវាយតម្លៃគ្រប់ជ្រុងជ្រោយពីទីប្រឹក្សា និងពីគ្រប់អ្នកជំនាញទាំងអស់របស់បារាំង។
លោក ហ៊ុន ម៉ាណែត សម្តែងការសោកស្តាយ ដែលអ្នកនយោបាយវ័យចំណាស់កម្ពុជាចេញសារបែបរារាំងទំនាក់ទំនងរវាងមេដឹកនាំបារាំង-កម្ពុជា ដែលគិតពីផលប្រយោជន៍របស់ប្រទេស និងប្រជាជនទាំងពីរ។ លោកនាយករដ្ឋមន្ត្រីក៏បានរិះគន់ត្រលប់ទៅលោក សម រង្ស៊ី វិញដែរ ដោយលើកឡើងថាលោក សម រង្ស៊ី យកនយោបាយដាក់មុខគ្រប់ពេលវេលា និងគួរតែផ្តល់តម្លៃទៅលើអ្វីដែលជាប្រយោជន៍សម្រាប់ប្រទេសជាតិ និងប្រជាជនក្នុងនាមជាអ្នកនយោបាយដែលមានសញ្ជាតិបារាំង និងខ្មែរផងនោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ