អភិបាលខេត្តកែប៖អភិបាលនិងនាយករដ្ឋបាលក្រុងកែបនៅធ្វើការជាធម្មតា
អភិបាលខេត្តកែប នៅព្រឹកថ្ងៃពុធទី៣ខែមករានេះ បានគូសបញ្ជាក់យ៉ាងខ្លីប្រាប់វិទ្យុបារាំងអន្តរជាតិRFIថា អភិបាលក្រុងកែបនិងនាយករដ្ឋបាលក្រុងកែប កំពុងធ្វើការជាធម្មតានោះទេ។ ការអះអាងពីអភិបាលខេត្តយ៉ាងដូច្នេះ គឺបន្ទាប់ពីការផ្ទុះព័ត៌មានស្ដីពីការឃាត់ខ្លួនមន្រ្តីជាន់ខ្ពស់ក្រុងកែបទាំងពីរ ដោយអង្គភាពប្រឆាំងអំពើពុករលួយ(ACU) នៅព្រឹកថ្ងៃអង្គារ ទី២ មករាម្សិលមិញ។
ចុះផ្សាយនៅថ្ងៃ៖
ស្តាប់ - ០១:១៤
ថ្លែងប្រាប់វិទ្យុបារាំងអន្តរជាតិRFI នៅថ្ងៃពុធទី៣ខែមករានេះ លោក សោម ពិសិដ្ឋ អភិបាលខេត្តកែប សុំមិនអត្ថាធិប្បាយអ្វីឡើយ ចំពោះព័ត៌មានជុំវិញការឃាត់ខ្លួន អភិបាលក្រុងកែប និងនាយករដ្ឋបាលក្រុងកែប។ យ៉ាងណាអភិបាលខេត្តរូបនេះ បានគូសបញ្ជាក់ថា មន្រ្តីទាំងពីរកំពុងតែបម្រើការងារជាធម្មតាទេ នៅព្រឹកថ្ងៃពុធទី៣ខែមករានេះ។
ដោយឡែក បើតាមការស្រង់សម្ដីផ្សាយដោយសារព័ត៌មានផ្សេងទៀត អភិបាលខេត្តរូបនេះ បានគូសបញ្ជាក់ថា ការឃាត់ខ្លួនមន្រ្តីក្រុងកែបទាំងពីរកាលពីថ្ងៃអង្គារទី២ខែមករាគឺគ្រាន់តែជាភាន់ច្រឡំប៉ុណ្ណោះ។
ទន្ទឹមគ្នានេះ អ្នកនាំពាក្យអង្គភាពប្រឆាំងអំពើពុករលួយ(ACU) លោកសយ ច័ន្ទវិចិត្រ បានឱ្យដឹងនៅព្រឹកថ្ងៃពុធទី៣ខែមករានេះថា លោកក៏មិនទាន់មានព័ត៌មានច្បាស់លាស់ស្ដីពីការឃាត់ខ្លួនមន្រ្តីក្រុងកែបទាំងពីរដែរ ព្រោះលោកមិនទាន់ទទួលបានព័ត៌មានផ្លូវការជុំវិញករណីឃាត់ខ្លួនមន្រ្តីក្រុងកែបទាំងពីរនេះ។
សូមបញ្ជាក់ថា យោងតាមប្រភពពីស្នងការខេត្តកែប សារព័ត៌មាននិងប្រព័ន្ធផ្សព្វផ្សាយជាច្រើន បានចុះផ្សាយថា អភិបាលក្រុងកែបនិងនាយករដ្ឋបាលក្រុងកែប ត្រូវបានឃាត់ខ្លួនដោយអង្គភាពប្រឆាំងអំពើពុករលួយ(ACU) នៅថ្ងៃទី២ខែមករាម្សិលមិញ។ សេចក្ដីរាយការណ៍ទាំងនេះ ក៏បានឲ្យដឹងបន្ថែមថា មន្រ្តីក្រុងកែបទាំងពីរត្រូវបានACUឃាត់ខ្លួននៅសាលាក្រុងកែបតែម្ដង ក្រោយមន្រ្តីទាំងពីរចប់កិច្ចប្រជុំនៅវេលាម៉ោងប្រមាណ១១ព្រឹក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ