ព្រឹត្តិការណ៍សំខាន់ៗ ៤កើតឡើងនៅឆ្នាំ២០២៣
នៅឆ្នាំ២០២៣ មានព្រឹត្តិការណ៍សំខាន់ៗយ៉ាងតិច៤ បានកើតឡើង គឺការចាប់ខ្លួន លោក ថាច់ សេដ្ឋា អនុប្រធានគណបក្សភ្លើងទៀន នៅពាក់កណ្តាលខែមករា។ បន្ទាប់មក មានការកាត់ទោស លោក កឹម សុខា ដាក់ឃុំ២៧ឆ្នាំ នៅដើមខែមីនា។ ក្រៅពីរឿងនយោបាយ ក៏មានដែរ ការរៀបចំព្រឹត្តិការណ៍ស៊ីហ្គេមលើកទី៣២ ដែលកម្ពុជាធ្វើជាម្ចាស់ នៅខែឧសភា។ ចំណែកព្រឹត្តិការណ៍ធំមួយទៀត គឺការរៀបចំបោះឆ្នោតថ្នាក់ជាតិកាលពីខែកក្កដា។
ចុះផ្សាយនៅថ្ងៃ៖
ស្តាប់ - ០៥:២០
ដើមឆ្នាំ២០២៣ លោក ថាច់ សេដ្ឋា អនុប្រធានគណបក្សភ្លើងទៀន ត្រូវបានចាប់ខ្លួន
បុរសមកពីខ្មែរកម្ពុជាក្រោមរូបនេះ ត្រូវបានចាប់ខ្លួននៅថ្ងៃទី១៦មករាឆ្នាំ២០២៣ក្រោមបទចោទ«មិនបំពេញកាតព្វកិច្ចចំពោះឧបករណ៍អាចជួញដូរបាន» ឬចេញសែកដោយគ្មានសាច់ប្រាក់កាលពីឆ្នាំ ២០១៩។
ប៉ុន្តែគណបក្សភ្លើងទៀនបានចេញសេចក្តីថ្លែងការណ៍មួយថ្កោលទោស និងស្នើឲ្យដោះលែងលោក ថាច់ សេដ្ឋា អនុប្រធានគណបក្សភ្លើងទៀនដោយឥតលក្ខខណ្ឌ។ ទោះជាយ៉ាងណាមកដល់ពេលនេះ លោក ថាច់ ត្រូវបានតុលាការកាត់ទោសឲ្យជាប់ក្នុងពន្ធនាគារចំនួន ៣ ឆ្នាំ ពីបទញុះញង់ឱ្យមានការអើសរើងតាមសុន្ទរកថារបស់លោកជាមួយអ្នកគាំទ្រអតីតគណបក្សសង្គ្រោះជាតិកាលពីដើមឆ្នាំ២០២៣នៅកូរ៉េខាងត្បូង។ នេះជាការកាត់ទោសបន្ថែមពីលើសំណុំរឿងទី១ ដែល លោក សេដ្ឋា ត្រូវបានជាប់ពន្ធនាគារ មួយឆ្នាំកន្លះ ពីបទទូទាត់សងប្រាក់មិនប្រក្រតី ឬចេញសែកស្អុយ។
នៅខែមីនា តុលាការកាត់ទោស លោក កឹម សុខា ២៧ឆ្នាំ
នៅថ្ងៃទី៣មីនា២០២៣ តុលាការក្រុងភ្នំពេញបានប្រកាសសាលក្រមកាត់ទោស លោក កឹម សុខា អតីតប្រធានគណបក្សសង្រ្គោះជាតិ ដាក់ពន្ធនាគារចំនួន ២៧ឆ្នាំ ពីបទសន្ទិដ្ឋិភាពជាមួយរដ្ឋបរទេស។ ក៏ប៉ុន្តែតុលាការតម្រូវឲ្យសមត្ថកិច្ចឃុំខ្លួនលោក កឹម សុខា នៅក្នុងផ្ទះ ដោយដកហូតសិទ្ធិពលរដ្ឋ សិទ្ធិនយោបាយជាស្ថាពរ។
ការកាត់ទោសមេដឹកនាំបក្សប្រឆាំងរូបនេះ បានទាញការចាប់ពីអារម្មណ៍ពីសារព័ត៌មានធំៗលើពិភពលោក តួយ៉ាង សារព័ត៌មានបារាំង France24 និង កាសែត Le Monde។សារព័ត៌មានរបស់កាតា Al Jazeera សារព័ត៌មានរបស់អង់គ្លេស The Guardian សារព័ត៌មានរបស់អាឡឺម៉ង់ DW សារព័ត៌មានអាមេរិក ABC News CNN International និងសារព័ត៌មានរបស់ឥណ្ឌា India Today សារព័ត៌មានអង់គ្លេស BBC និងសារព័ត៌មានជប៉ុន Kyodo ជាដើម។ ប្រតិកម្មពីសំណាក់ប្រទេសលោកខាងលិច បានហៅការកាត់ទោសនេះថាជារឿងនយោបាយ។
នៅខែឧសភា កម្ពុជារៀបចំព្រឹត្តិការណ៍ស៊ីហ្គេមជាប្រវត្តិសាស្ត្រ
ព្រឹត្តិការណ៍កីឡា អាស៊ី អាគ្នេយ៍ ឬស៊ីហ្គេមលើកទី៣២ ដែលកម្ពុជាជាម្ចាស់ផ្ទះបានបើកជាផ្លូវការនៅថ្ងៃទី៦ឧសភា២០២៣ និងបិទបញ្ចប់នៅថ្ងៃទី១៧ឧសភា។ ព្រឹត្តិការណ៍ជាប្រវត្តិសាស្ត្រនេះ កម្ពុជាទទួលបានមេដាយសរុបចំនួន ២៨២គ្រឿង ក្នុងនោះ មេដាយមាស៨១គ្រឿង ប្រាក់៧៤គ្រឿង និងសំរឹទ្ធ១២៧គ្រឿង។
៦៤ឆ្នាំ ទើបមានឱកាសរៀបចំព្រឹត្តការណ៍អន្តរជាតិបែបនេះបានម្តង រដ្ឋាភិបាលកម្ពុជាបានប្រកាសពីភាពជោគជ័យ និងផ្សព្វផ្សាយកម្ពុជាទៅកាន់ពិភពលោក ខណៈកម្ពុជា ផ្តល់ជូនកន្លែងស្នាក់នៅ អាហារ ដោយមិនគិតថ្លៃដល់ប្រតិភូកីឡាដែលចូលរួមទាំងអស់។
ការរៀបចំព្រឹត្តិការណ៍ ស៊ីហ្គេមលើកទី៣២នេះ កម្ពុជាចំណាយអស់ទឹកប្រាក់ប្រមាណជិត ២០០ លានដុល្លារ។
ព្រឹត្តិការណ៍ស្រដៀងគ្នានេះ ក៏ត្រូវបានកម្ពុជារៀបចំផងដែរ គឺការប្រកួតកីឡា ជនពិការអាស៊ី អាគ្នេយ៍ ឬអាស៊ាន ប៉ារ៉ាហ្គេម។អាស៊ានប៉ារ៉ាហ្គេមលើកទី១២ បានប្រព្រឹត្តទៅចាប់ពីថ្ងៃទី៣ ដល់ថ្ងៃទី៩ ខែមិថុនា ឆ្នាំ២០២៣ ។ អាស៊ានប៉ារ៉ាហ្គេមនេះ កម្ពុជាឈ្នះមេដាយសរុប ៧០ គ្រឿង ក្នុងនោះ មេដាយមាស ៩ គ្រឿង ប្រាក់ ១៨ គ្រឿង និងសំរឹទ្ធ ៤៣ គ្រឿង ។
នៅខែកក្កដា កម្ពុជារៀបចំការបោះឆ្នោតថ្នាក់ដោយគ្មានវត្តមានគណបក្សប្រឆាំង
ការបោះឆ្នោតកាលពីថ្ងៃទី២៣កក្កដា២០២៣ គឺមានគណបក្សចូលរួមចំនួន១៨។ ប៉ុន្តែមិនមានវត្តមានគណបក្សភ្លើងទៀននោះឡើយ។ គណបក្សជំទាស់នេះ ត្រូវបាន គជប បដិសេធមិនឲ្យចូលរួម ក្រោមហេតុផល មិនមានឯកសារដើមបញ្ជាប់សំបុត្រកំណើតរបស់គណបក្ស ខណៈគណបក្សអះអាងថា បានបាត់នៅពេលអាជ្ញាឬចូលទីស្នាក់បក្សប្រឆាំងនៅឆ្នាំ២០១៧។
ជាលទ្ធផលនៃការបោះឆ្នោតនេះ គណបក្សប្រជាជនកម្ពុជាបន្តកាន់អំណាចដោយសំឡេងឆ្នោតច្រើនលើសលប់ ដោយទទួលបានកៅអីតំណាងរាស្ត្រចំនួន១២០ លើ១២៥។ នៅសល់៥កៅអីបានទៅលើគណបក្សហ្វ៊ុនស៊ិនប៉ិច បន្ទាប់ពីគណបក្សរាជានិយមមួយនេះ របូតកៅអីតំណាងរាស្ត្រចំនួន១០ឆ្នាំមកនោះ។
លទ្ធផលនៃការបោះឆ្នោតនៅកម្ពុជានេះ មិនត្រូវបានសារទពីបណ្តាប្រទេសប្រកាន់លទ្ធិប្រជាធិបតេយ្យសេរីនោះឡើយ។ តែសម្រាប់ប្រទេសមួយចំនួនដែលមិនមែនជាប្រទេសប្រជាធិបតេយ្យពួកគេបានមកអបអរសារទ។
បន្ទាប់ពីចេញផលទ្ធផលបោះឆ្នោត លោក ហ៊ុន សែន បានប្រកាសប្រគល់តំណែងជានាយករដ្ឋមន្ត្រីទៅឲ្យលោក ហ៊ុន ម៉ាណែត ជាកូនប្រុសច្បងរបស់លោក ទោះជាពេលឃោសនាបោះឆ្នោត លោក ហ៊ុន សែន គឺជាបេក្ខជននាយករដ្ឋមន្ត្រី។
ជាការកត់សំគាល់ តាំងពីមុនពេលបោះឆ្នោត និងក្រោយការបោះឆ្នោត មានអ្នកនយោបាយបក្សប្រឆាំងជាច្រើនត្រូវបានចាប់ខ្លួន។ ក្រោយមកពួកគេមួយចំនួនបានចុះចូលជាមួយបក្សកាន់អំណាចជាបន្តបន្ទាប់។ ប៉ុន្តែក្នុងនោះក៏មានលោក គង់ រ៉ៃយ៉ា និងលោក គង់ ជិ បានរត់ចេញវិញ ដោយបានសិទ្ធិរស់នៅក្រៅប្រទេស។
ចំណែក លោក គង់ គាំ ជាអតីតទីប្រឹក្សាគណបក្សភ្លើងទៀន ត្រូវបានលោក ហ៊ុន សែន បញ្ជាឲ្យប្រគល់ដីដែលធ្លាប់រស់នៅប្រមាណ៤០ឆ្នាំមកនោះ ទៅឲ្យរដ្ឋវិញ។ ការដកហូតដីធ្លីពីអ្នកនយោបាយប្រឆាំងរូបនេះនេះ ធ្វើឡើងនៅមុនការបោះឆ្នោត ខណៈលោក គង់ គាំ ប្រើវោហាសាសន៍ រិះគន់ខ្លាំងៗលើគណបក្សប្រជាជនកម្ពុជា ដែលលោកធ្លាប់ជាសមាជិក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ