សង្គមស៊ីវិលនៅកម្ពុជា៖ ថៃផ្តល់ទីតាំងឲ្យក្រុមប្រឆាំងរបស់កម្ពុជាធ្វើសកម្មភាព
សង្គមស៊ីវិលនៅកម្ពុជាចោទប្រកាន់គណបក្សប្រឆាំងថៃថា ផ្តល់ទឹកដីរបស់ខ្លួនឲ្យក្រុមប្រឆាំងរបស់កម្ពុជាធ្វើសកម្មភាពប្រឆាំងនឹងរដ្ឋាភិបាលកម្ពុជា។ ការចោទប្រកាន់នេះធ្វើឡើងតាមរយៈលិខិតក្នុងទម្រង់ដូចៗគ្នា ដែលចេញផ្សាយនៅថ្ងៃទី២៥ធ្នូ២០២៣ ដោយ សមាគម សហជីព និងអង្គការមួយចំនួន ដែលត្រូវបានគេស្គាល់ថា មានទំនោរទៅរករដ្ឋាភិបាលកម្ពុជា។
ចុះផ្សាយនៅថ្ងៃ៖
ស្តាប់ - ០២:២៧
ក្រុមអង្គការសង្គមស៊ីវិលទាំងនេះ បានស្នើឲ្យ លោក សេដ្ឋា ថាវីស៊ីន នាយករដ្ឋមន្រ្តីថៃ ត្រួតពិនិត្យមើលសកម្មភាពរបស់ គណបក្ស Move Forward (គណបក្សកៅក្លៃ) របស់ថៃ ដែលកំពុងធ្វើសកម្មភាពគាំទ្រ និងបណ្តុះបណ្តាលដល់ ក្រុមអ្នកយោបាយប្រឆាំងរបស់កម្ពុជា។
ក្នុងលិខិតតវ៉ានោះ ក្រុមអង្គការសង្គមស៊ីវិលទាំងនេះ បានលើកឡើងដោយយោងតាមច្បាប់ស្តីពីកិច្ចព្រមព្រៀងទ្វេភាគីរវាងប្រទេសទាំងពីរ និងលក្ខន្តិកៈរបស់សមាគមអាស៊ាន ។ លក្ខន្តិកៈរបស់សមាគមអាស៊ានដែលចែងថា ប្រទេសជាសមាជិកអាស៊ានទាំងអស់ មិនអាចជ្រែតជ្រែកកិច្ចការផ្ទៃក្នុង ឬធ្វើសកម្មភាពណាមួយប៉ះពាល់ដល់អធិបតេយ្យភាពរបស់ប្រទេសសមាជិកមួយទៀតបានឡើយ។ ជាងនេះទៅទៀត ច្បាប់នៅក្នុងអង្គការសហប្រជាជាតិ ក៏បានបញ្ជាក់ផងដែរថា ប្រទេសមួយមិនអាចធ្វើនយោបាយរំលោភ ឬបំផ្លាញប្រទេសមួយដែលប្រជាពលរដ្ឋកំពុងរស់នៅប្រកបរបរចិញ្ចឹមជីវិតយ៉ាងសុខដុមរមនា និងប្រកបដោយសុខសន្តិភាព និងប្រជាធិបតេយ្យនោះទេ។
ក្រុមអង្គការសង្គមស៊ីវិលទាំងនេះ បានចាត់ទុកថា សកម្មភាពនយោបាយរបស់ គណបក្សកាវក្លៃ ហាក់បីដូចជាកំពុងធ្វើសកម្មភាពឲ្យប៉ះពាល់ដល់នយោបាយការទូតរវាង ប្រទេសកម្ពុជា-ថៃ និងព្រមានថា សកម្មភាពនេះក៏ប៉ះពាល់ផងដែរ ទាំងវិស័យសេដ្ឋកិច្ច និងនយោបាយ ពិសេសធ្វើឲ្យប៉ះពាល់ច្បាប់ប្រទេសថៃ ដែលមិនអនុញ្ញាតឲ្យបរទេសណាមួយយកទឹកដីខ្លួន ធ្វើសកម្មភាពប្រឆាំងនឹងរដ្ឋាភិបាលស្របច្បាប់ប្រទេសផ្សេងៗ ពិសេសប្រទេសអាស៊ាន។
អ្នកតាមដានសភាពការណ៍បារម្ភថា ការដាក់លិខិតតវ៉ាបែបនេះ អាចជាការបង្កើតព្រឹត្តិការណ៍ដើម្បីកម្ទេចគណបក្សនយោបាយណាមួយនៅកម្ពុជា ខណៈដែលរូបភាពនៃគណបក្សភ្លើងទៀន ក៏ត្រូវបានភ្ជាប់ទៅនឹងសកម្មភាពនៅទឹកដីថៃដែរ។ នេះបើតាម លោក មាជ សុវណ្ណរ៉ា ប្រធានបេសកម្មនៃវិទ្យាស្ថានស្រាវជ្រាវគោលនយោបាយ។
តាមអតីតជនភៀសខ្លួនរូបនេះ ប្រទេសថៃធ្លាប់បានជួលទឹកដីខ្លួនឲ្យអង្គការសហប្រជាជាតិដើម្បីផ្តល់ទីតាំងស្នាក់នៅដល់ជនភៀសខ្លួនខ្មែរកាលពីសម័យសង្គ្រាម។ ចំណែកការផ្តល់ទឹកដីថៃឲ្យអ្នកនយោបាយកម្ពុជាដែលភៀសខ្លួនពេលនេះធ្វើសកម្មភាពនយោបាយត្រូវបានលោកមាជ សុវណ្ណរ៉ាបញ្ជាក់ពីការត្រូវរង់ចាំមើលបន្តទៀត។ ប៉ុន្តែលោកយល់ថា រដ្ឋាភិបាលថៃនឹងមិនល្ងង់ឲ្យអ្នកនយោបាយខ្មែរប្រើប្រាស់ទឹកដីខ្លួន ធ្វើសកម្មភាពណាមួយដែលនាំឲ្យខាតប្រយោជន៍របស់ប្រទេសថៃនោះឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ