លោក ហ៊ុន សែន៖ ការជួយសិស្សនិទ្ទេសA ម្នាក់គឺជាករណីពិសេស
អតីតនាយករដ្ឋមន្ត្រីកម្ពុជា លោក ហ៊ុន សែន បានអះអាងថា ការជួយសិស្សនិទ្ទេសA ម្នាក់មកពីខេត្តកំពតគឺជាករណីពិសេសដែលលោកត្រូវជួយឲ្យយុវសិស្ស អន ផានិត ទទួលបានការរៀនសូត្រនៅភ្នំពេញ និង ជួយដល់ជីវភាពឪពុកម្តាយរបស់គេនៅឯស្រុកកំណើតផង។ ការគូសបញ្ជាក់យ៉ាងដូច្នេះ របស់ប្រមុខបក្សកាន់អំណាច គឺបន្ទាប់ពីលោកបានអនុញ្ញាតឲ្យឪពុក ម្តាយរបស់ អន ផានិតដែលជាជនពិការទាំងពីរនាក់ និងកូនស្រីម្នាក់ បានចូលជួបលោក ហ៊ុន សែន ដល់គេហដ្ឋានរបស់លោកនៅថ្ងៃទី២៥ខែធ្នូ។
ចុះផ្សាយនៅថ្ងៃ៖
ស្តាប់ - ០២:៤២
បើតាមលោក ហ៊ុន សែន ឆ្លងកាត់ការសន្ទនារវាងលោក និងក្រុមគ្រួសារ អន ផានិត លោកពិនិត្យឃើញថាឪពុក ម្តាយរបស់ផានិតដែលជាជនពិការទាំងពីរនាក់ពិតជាមនុស្សគួរឱ្យគោរពសម្រាប់ការលះបង់ដើម្បីកូននិងក្រុមគ្រួសារ។
កាលពីថ្ងៃទី២៩វិច្ឆិកា លោក ហ៊ុន សែន បានប្រាប់ឲ្យមន្ត្រីរបស់លោកយកសិស្សនិទ្ទេស A អន ផានិត ពីខេត្តកំពតឲ្យស្នាក់នៅជាមួយទីតាំងអង្គរក្ស ដោយផ្គត់ផ្គង់ការរៀនសូត្របន្ត មធ្យោបាយធ្វើដំណើរ ផ្តល់ថវិកា១លានរៀលប្រចាំខែដល់គ្រួសារ និងជួយបង់សងប្រាក់ជំពាក់ធនាគារផងដែរ។
ការជួយរបស់លោក ហ៊ុន សែន បន្ទាប់ពីមានប្រព័ន្ធផ្សព្វផ្សាយ និងបណ្តាញសង្គមនានា ធ្វើការផ្សព្វផ្សាយយ៉ាងព្រោងព្រាធពីការតស៊ូរៀនសូត្ររបស់យុវសិស្សរូបនេះ ដោយបង្ហាញពីការខ្វះខាតសព្វបែបយ៉ាង។
សូមបញ្ជាក់ថា សិស្សជាប់បាក់ឌុបទទួលបាននិទ្ទេសAនៅឆ្នាំ២០២៣នេះ គឺមានចំនួន១៦៧៣នាក់ ក្នុងនោះក៏មានសិស្សនិទ្ទេសAមួយចំនួនជាកូនកំព្រា និងមានជីវភាពក្រីក្រផង តួយ៉ាង យុវនារី សាំ ស្រីថន នៅខេត្តព្រៃវែង។
អ្នកតាមសង្គម យល់ថា ការជួយដល់សិស្សពូកែគួរតែធ្វើឡើងជាប្រព័ន្ធ ជាជាងជួយតែមួយ ឬពីរករណី ពីព្រោះក្រសួងអប់រំនៅឆ្នាំនេះទទួលបានថវិកាជាតិ កើនដល់ជិត១ពាន់លានដុល្លារគឺច្រើនជាងគេបង្អស់ក្នុងចំណោមក្រសួងនិងស្ថាបនរដ្ឋ។
ទោះជាយ៉ាងណា អ្នកនាំពាក្យក្រសួងអប់រំ លោកស្រី ឃួន វិច្ឆិកា ធ្លាប់ប្រាប់វិទ្យុបារាំងអន្តរជាតិRFIថា ក្រសួងបានផ្តល់អាហារូបករណ៍ដល់សិស្សដែលទើបជាប់បាក់ឌុបនៅឆ្នាំ២០២៣ ជាង៨៨០០កន្លែង សម្រាប់ការសិក្សានៅឧត្តមសិក្សាដើម្បីជ្រើសជំនាញរបស់ពួកគេទៅអនាគត។
សូមបញ្ជាក់ថា នៅឆ្នាំ២០២៣នេះ គឺសិស្សប្រឡងជាប់មានចំនួន ៩៨ ៤៦០នាក់ ឬស្មើនឹង៧២.៨៩ភាគរយ។ អ្នកជាប់និទ្ទេសAមានចំនួន១៦៧៣នាក់ និទ្ទេសB ចំនួន៦៩៦៤នាក់ និទ្ទេសC ចំនួន១៨៣០៨នាក់ និទ្ទេសD ចំនួន៣៤២៤៦នាក់ និងនិទ្ទេសEមានចំនួន៣៧២៦៩នាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ