គណបក្សប្រឆាំងស្នើដោះលែងលោក កឹម សុខា និងអ្នកទោសមនសិកា
គណបក្សកម្លាំងជាតិ ដែលជាគណបក្សប្រឆាំងទើបបង្កើតថ្មី បានចេញមុខស្នើឲ្យដោះលែង លោក កឹម សុខា លោក ថាច់ សេដ្ឋា និងអ្នកជាប់ឃុំជាអ្នកការពារសិទ្ធិមនុស្ស និងមេដឹកនាំសហជីពផ្សេងទៀត។ នេះបើតាមលិខិតរបស់គណបក្សកម្លាំងជាតិដាក់ជូនលោកនាយករដ្ឋមន្ត្រី ហ៊ុន ម៉ាណែត ចុះថ្ងៃទី២២ធ្នូ២០២៣។
ចុះផ្សាយនៅថ្ងៃ៖
ស្តាប់ - ០២:៤៦
ក្រៅពី លោក កឹម សុខា និងលោក ថាច់ សេដ្ឋា ជាមេដឹកនាំគណបក្សប្រឆាំងដែលកំពុងជាប់ឃុំ គណបក្សកម្លាំងជាតិក៏ស្នើឲ្យពិនិត្យលទ្ធភាពដោះលែងលោក កាក់ កុម្ភារ លោក សៀម ភ្លុក លោក តូច ថឹង លោក រឿន វីរ៉ាត់ លោកស្រី នូ សុទ្ធារី លោក ចៅ វាសនា កញ្ញា សេង ធារី និងកញ្ញា ឈឹម ស៊ីថរ ជាប្រធានសហជីពក្រុមហ៊ុនណាហ្គាវើលដ៍។ ស្ត្រីជាសកម្មជនសហជីពរូបនេះ ត្រូវបានកាត់ទោសដោយតុលាការក្រុងភ្នំពេញ កាលពីខែឧសភា ឲ្យពន្ធនាគារ២ឆ្នាំពីបទញុះញង់។ ការកាត់ទោសនេះធ្វើឡើង បន្ទាប់ពីកញ្ញា ឈឹម ស៊ីថរ ដឹកនាំសមាជិកសហជីពតវ៉ាប្រឆាំងនឹងការបញ្ឈប់បុគ្គលិកពីសំណាក់ក្រុមហ៊ុនណាហ្គាវើលដ៍។
ចំណែក លោក កឹម សុខា ជាប្រធានអតីតគណបក្សសង្គ្រោះជាតិ ត្រូវបានតុលាការក្រុងភ្នំពេញកាត់ទោសកាលពីថ្ងៃទី៣មីនា២០២៣ ដាក់ឃុំក្នុងផ្ទះ២៧ឆ្នាំពីបទសន្ទិដ្ឋិភាពជាមួយរដ្ឋបរទេសឬឃុបឃិតជាមួយបរទេស។ ដោយឡែក លោក ថាច់ សេដ្ឋា ជាអនុប្រធានគណបក្សភ្លើងទៀន ត្រូវបានតុលាការកាត់ទោស៣ ឆ្នាំ ពីបទញុះញង់ឱ្យមានការអើសរើងតាមសុន្ទរកថារបស់លោកជាមួយអ្នកគាំទ្រអតីតគណបក្សសង្គ្រោះជាតិកាលពីដើមឆ្នាំ២០២៣នៅកូរ៉េខាងត្បូង។ នេះជាការកាត់ទោសបន្ថែមពីលើសំណុំរឿងទី១ ដែល លោក សេដ្ឋា ត្រូវបានជាប់ពន្ធនាគារ មួយឆ្នាំកន្លះ ពីបទទូទាត់សងប្រាក់មិនប្រក្រតី ឬចេញសែកស្អុយ។
ក្រៅពីនោះអ្នកនយោបាយផ្សេងទៀត រួមមាន លោក តូច ថឹង លោក ស្រី នូ សុទ្ធារី លោក ខឿន វីរ៉ាត់ និងលោក សៀម ភ្លុក ជាស្ថាបនិកគណបក្សបេះដូង ត្រូវបានកាត់ទោសកាលពីចុងខែមីនា២០២៣ ដាក់ពន្ធនាគារម្នាក់ៗ២ឆ្នាំ ពីបទក្លែងបន្លំស្នាមមេដៃសុំបង្កើតគណបក្សបេះដូងជាតិ។ រីឯ កញ្ញា សេង ធារី ត្រូវបានកាត់ទោស៦ឆ្នាំពីញុះញង់ទាក់ទងការគាំទ្រដំណើរវិលចូលស្រុកវិញរបស់លោក សម រង្ស៊ី។
បើតាមគណបក្សកម្លាំងជាតិ ការចាប់ខ្លួន និងការកាត់ទោសអ្នកនយោបាយ និងសកម្មជនទាំងនេះគឺធ្វើឲ្យកម្ពុជាត្រូវរងកាត់ផ្តាច់ប្រព័ន្ធអនុគ្រោះពន្ធEBA ២០%ពីសហភាពអឺរ៉ុប និងមិនបន្តផ្តល់GSPរបស់អាមេរិកតាំងពីឆ្នាំ២០២០។ ដើម្បីបានការអនុគ្រោះនេះមកវិញ គណបក្សប្រឆាំងនេះ លើកឡើងថាមានដំណោះស្រាយ ដោះលែងអ្នកដែលជាប់ឃុំទាំងអស់នោះឲ្យមានសេរីភាពវិញ។
ទោះជាយ៉ាងណា លោក ជិន ម៉ាលីន អ្នកនាំពាក្យក្រសួងយុត្តិធម៌ ប្រាប់វិទ្យុបារាំងអន្តរជាតិRFIថា តាមគោលការណ៍នាយករដ្ឋមន្ត្រីមិនអាចលូកដៃចូលកិច្ចការតុលាការដោយបញ្ជាឲ្យដោះលែងអ្នកដែលជាប់ឃុំណាមួយបានឡើយ។ ប៉ុន្តែលោកពន្យល់ថា បើចង់ជួយអ្នកដែលជាប់ទោសទាំងនោះ គឺចូលរួមតាមនីតិវិធីរបស់តុលាការ ដោយប្រើសិទ្ធិតាមផ្លូវច្បាប់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ