ក្រុមគ្រួសារថា តុលាការបន្តឃុំខ្លួន លោក ថាច់ សេដ្ឋា ទាំងកំពុងមានជំងឺធ្ងន់
ក្រុមគ្រួសារលោក ថាច់ សេដ្ឋា បានសំដែងការខកចិត្ត បន្ទាប់ពីតុលាការកំពូលនៅថ្ងៃទី២២ធ្នូ បានបដិសេធបណ្ដឹងសុំនៅក្រៅឃុំរបស់អនុប្រធានគណបក្សប្រឆាំងរូបនេះ។តាមការអះអាងថា របស់ភរិយាលោក ថាច់ សេដ្ឋា គឺ បុរសមកពីខ្មែរកម្ពុជាក្រោមរូបនេះ កំពុងធ្លាក់ខ្លួនឈឺធ្ងន់និងត្រូវការព្យាបាលជាចាំបាច់។ លោក ថាច់ សេដ្ឋា ត្រូវបានក្រុមគ្រួសារអះអាងថាកំពុងមានជំងឺច្រើនមុខ ដូចជា ជំងឺលើសឈាម ជំងឺបេះដូង លើសជាតិស្ករ និងឡើងជាតិអាស៊ីត។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣២
សាលាដំបូងរាជធានីភ្នំពេញ នៅថ្ងៃទី២១ ខែកញ្ញា បានកាត់ទោស លោក សេដ្ឋា ពីបទទូទាត់សងប្រាក់មិនប្រក្រតី ក្រោមមាត្រា ២៣១ នៃច្បាប់ស្តីពីឧបករណ៍អាចជួញដូរបាន និងប្រតិបត្តិការទូទាត់សងប្រាក់។ ការផ្តន្ទាទោសនេះធ្វើឡើងក្រោយទទួលបានបណ្តឹងរបស់ ឈ្មោះ រិន ឆាយ ម្ចាស់ហាងបញ្ចាំមួយ ដែលបានអះអាងថា លោក សេដ្ឋា បានចេញសែកស្អុយចំនួនប្រាំដើម្បីសងប្រាក់កម្ចីក្នុងឆ្នាំ២០១៩។ សំណុំរឿងនេះ តុលាការក្រុងភ្នំពេញ បានកាត់ទោសលោក សេដ្ឋា ឱ្យជាប់ពន្ធនាគារ មួយឆ្នាំកន្លះ និងពិន័យជាទឹកប្រាក់ចំនួន ៣ លានរៀល ឬប្រហែល ៧៥០ ដុល្លារអាមេរិក។ លោក សេដ្ឋា ក៏ត្រូវបានតុលាការបញ្ជាឱ្យសងប្រាក់ទៅឈ្មោះ រិន ឆាយ ចំនួន ១៣៣.៦ លានរៀល ឬប្រហែល ៣៣,៤០០ ដុល្លារអាមេរិក ជាចំនួនប្រាក់ដែលគាត់ជំពាក់។ ជាមួយគ្នានោះ តុលាការបង្គាប់ឲ្យបង់ចូលរដ្ឋចំនួន ៥ លានរៀនបន្ថែមទៀត។ នេះបើតាមការចុះផ្សាយរបស់អង្គការលីកាដូ។
ប្រធានអង្គជំនុំជម្រះនៃតុលាការកំពូល លោក និល ណុន នៅព្រឹកថ្ងៃទី២២ ធ្នូ សម្រេចតម្កល់សាលដីការបស់សាលាឧទ្ធរណ៍ទុកជាបានការដដែល ហើយអះអាងថា ការសម្រេចរបស់សាលាឧទ្ធរណ៍លើសំណុំរឿងនេះជារឿងត្រឹមត្រូវ។
ក្រៅពីបទចោទប្រកាន់ពាក់ព័ន្ធនឹងការទទូទាត់សងប្រាក់មិនប្រក្រតី អនុប្រធានបក្សប្រឆាំងរូបនេះក៏ត្រូវបានចោទប្រកាន់លើមួយករណីទៀតពាក់ព័ន្ធនឹងបទញុះញង់ឱ្យប្រព្រឹត្តបទឧក្រិដ្ឋ និងបទញុះញុង់ឱ្យមានការអើសរើងតាមសុន្ទរកថារបស់លោកជាមួយអ្នកគាំទ្រអតីតគណបក្សសង្គ្រោះជាតិកាលពីដើមឆ្នាំ២០២៣។ នៅក្នុងសំណុំរឿងនេះ នៅថ្ងៃទី១៨ ខែតុលា សាលាដំបូងរាជធានីភ្នំពេញ បានកាត់ទោសលោក ថាច់ សេដ្ឋា ជាប់ពន្ធនាគារកម្រិតអប្បបរមាចំនួន បីឆ្នាំ និងផាកពិន័យជាទឹកប្រាក់ចំនួន ៤ លានរៀល តាមមាត្រា ៤៩៤ ៤៩៥ និង ៤៩៦ នៃក្រមព្រហ្មទណ្ឌ ។
ទោះជាយ៉ាងណា ក្រុមគ្រួសារ និងអ្នកឃ្លាំមើលមួយចំនួន យល់ថា ការកាត់ទោស លោក ថាច់ សេដ្ឋា លើសំណុំរឿងបន្ថែមទៀតនេះគឹជាប់ទាក់ទងនឹងរឿងនយោបាយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ