ប្រធានក្រុមប្រឹក្សាក្រុងប៉ោយប៉ែតសុំទោសលោក ហ៊ុន សែន ក្រោយបរិហារអភិបាលខេត្តបន្ទាយមានជ័យ
ប្រធានក្រុមប្រឹក្សាក្រុងប៉ោយប៉ែត លោក សាន ស៊ាងហូ នៅថ្ងៃទី១៩ ខែធ្នូ ឆ្នាំ២០២៣ បានចេញលិខិតសុំទោស លោក ហ៊ុន សែន ក្រោយលោក សាន ស៊ាងហូ បាននិយាយបរិហារនិងរិះគន់អភិបាលខេត្តបន្ទាយមានជ័យ។ លោក អ៊ុំ រាត្រី អភិបាលខេត្តបន្ទាយមានជ័យ កំពុងត្រូវបានក្រសួងមហាផ្ទៃបន្តការស៊ើបអង្កេត ក្រោយពលរដ្ឋស្នើឱ្យដកលោកចេញពីតំណែង។ អ្នកតាមដានសង្គមចង់ឱ្យមានការដោះស្រាយបញ្ហានេះទៅតាមនិតិវិធី ដោយគ្មានឥទ្ធិពលនយោបាយលូកឡំ។
ចុះផ្សាយនៅថ្ងៃ៖
ស្តាប់ - ០២:៤៥
ដោយដឹងខ្លួនថាបានបំពានលក្ខន្តិកៈ និងបទបញ្ជាផ្ទៃក្នុងបក្ស លោក សាន ស៊ាងហូ ប្រធានក្រុមប្រឹក្សាក្រុងប៉ោយប៉ែត និងជាសមាជិកគណៈកម្មាធិការបក្សប្រជាជនកម្ពុជាខេត្តបន្ទាយមានជ័យ នៅថ្ងៃទី១៩ ខែធ្នូ បានសរសេរលិខិតសុំការអភ័យទោសពី លោក ហ៊ុន សែន ដែលជាប្រធានគណបក្ស។ សម្រាប់លោក សាន ស៊ាងហូ ការនិយាយរិះគន់អភិបាលខេត្តបន្ទាយមានជ័យ គឺជាការបំផ្លាញកិត្តិយសនិងសេចក្តីថ្លៃថ្នូររបស់លោក អ៊ុំ រាត្រី ដែលប៉ះពាល់ដល់ថ្នាក់ដឹកនាំ និងសង្គមជាតិ។
លោក សាន ស៊ាងហូ បានទទួលស្គាល់កំហុសខ្លួន នៅក្រោយនិយាយបរិហារនិងរិះគន់ប្រសិទ្ធភាពការងាររបស់អភិបាលខេត្តបន្ទាយមានជ័យ លោក អ៊ុំ រាត្រី។ តាមរយៈបទសម្ភាសន៍ជាមួយសារព័ត៌មានក្នុងស្រុក និងតាមបណ្តាញសង្គមផ្ទាល់ខ្លួនផង លោក សាន ស៊ាងហូ បានទម្លាយពីភាពមិនចុះសម្រុងគ្នានិងភាពចម្រូងចម្រាស់ជាច្រើនរវាងលោកនិងលោក អ៊ុំ រាត្រី។
គួរជម្រាបជូនថា លោក អ៊ុំ រាត្រី អភិបាលខេត្តបន្ទាយមានជ័យ កំពុងត្រូវក្រសួងមហាផ្ទៃបន្តនិតិវិធីស្រាវជ្រាវ ក្រោយពលរដ្ឋស្នើឱ្យដកលោកចេញពីតំណែង ដោយយោងហេតុផលថាលោកអភិបាលខេត្ត អសមត្ថភាពក្នុងការដោះស្រាយបញ្ហាទំនាស់ដីធ្លីជូនប្រជាពលរដ្ឋ និងឃុបឃិតគ្នាជាប្រព័ន្ធ ធ្វើទុក្ខបុកម្នេញ ចាប់ប្រជាពលរដ្ឋដាក់ពន្ធនាគារ និងធ្វើសកម្មភាពបំពានច្បាប់ជាដើម។ លោក ទូច សុខៈ អ្នកនាំពាក្យរងក្រសួងមហាផ្ទៃនៅថ្ងៃទី២០ធ្នូ លើកឡើងថា ក្រសួងមហាផ្ទៃកំពុងបន្តស៊ើបអង្កេតស្រាវជ្រាវសំណុំរឿងនេះដែលអាចត្រូវការពេលវេលាយូរព្រោះជារឿងស្មុគ្រស្មាញនិងចាក់ស្រេសយូរឆ្នាំ។
អ្នកតាមដានសង្គម លោក យ៉ង់ គឹមអ៊េង ចង់ឱ្យមានការដោះស្រាយបញ្ហានេះទៅតាមនិតិវិធី ដោយគ្មានការលូកឡំជាមួយឥទ្ធិពលនយោបាយ។ ចំពោះលោក យ៉ង់ គឹមអ៊េង ប្រសិនបើការដោះស្រាយសំណុំរឿងនេះ ច្របូកច្របល់ចែកមិនដាច់រវាងការងារបក្សនិងការងារមន្ត្រី នោះបង្ហាញឱ្យឃើញថាការងារបម្រើពលរដ្ឋក៏គ្មានប្រសិទ្ធភាពដែរ។
គួរដឹងដែរថា នៅក្នុងខេត្តបន្ទាយមានជ័យ ករណីស្នើឱ្យដកថ្នាក់ដឹកនាំនៅតាមស្ថាប័នរដ្ឋបានកើតមានផ្ទួនៗក្នុងរយៈពេលចុងក្រោយនេះ។ ក្នុងនោះមានសំណុំររឿងលោក អ៊ុំ រាត្រី អភិបាលខេត្ត និងលោក ង៉ោ ម៉េងជ្រួន អភិបាលរង ដែលត្រូវពលរដ្ឋជាង១០០គ្រួសារស្នើទៅក្រសួងមហាផ្ទៃឱ្យដកលោកទាំងពីរចេញពីតំណែង ដោយឈរលើមូលហេតុភាពអសកម្មបំពេញការងារបម្រើរាស្ត្រ។ ទន្ទឹមគ្នានេះ ប្រធានមន្ទីរសូរិយោដី លោក អាង ណារិទ្ធ ក៏ទើបត្រូវបានមន្ត្រីក្រោមឱវាទប្រមាណ៣០នាក់ ស្នើទៅក្រសួងរៀបចំដែនដី នគរូបនីយកម្ម និងសំណង់ឱ្យផ្លាស់លោកចេញពីតំណែង ព្រោះអនុវត្តការងារមិនប្រក្រតី និងប្រព្រឹត្តអំពើពុករលួយផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ