ក្រសួងមហាផ្ទៃប្រគល់បណ្ដឹងលោកគឹមជាតិទៅអគ្គស្នងការដោយថាជារឿងព្រហ្មទណ្ឌ
អ្នកនាំពាក្យរងក្រសួងមហាផ្ទៃនៅថ្ងៃទី៨ខែធ្នូ បានឲ្យដឹងថា ពាក្យបណ្ដឹងទៅលើលោកគឹម ជាតិ ត្រូវបានបញ្ជូនទៅអគ្គស្នងការនគរបាលជាតិដើម្បីស៊ើបអង្កេតវិញ ដោយសារជាសំណុំរឿងកម្រិតព្រហ្មទណ្ឌ។ ការបង្វែរនេះ គឺបន្ទាប់ពីអគ្គាធិការដ្ឋានក្រសួងមហាផ្ទៃ បានទទួលពាក្យបណ្ដឹងមួយ ដែលចោទថា ក្រុមលោក គឹម ជាតិ អនុប្រធានគណៈកម្មាធិការ ប្រឆាំងផលិតផលក្លែងក្លាយ បានជំរិតប្រាក់១០ម៉ឺនដុល្លារ ក្នុងពេលចុះត្រួតពិនិត្យឃ្លាំងស្រាមួយកន្លែងកាលពីខែវិច្ឆិកា ជាថ្នូរនឹងការមិនបិទផ្អាកអាជីវកម្ម។ ដោយឡែក ការចុះត្រួតពិនិត្យផលិតផលក្លែងក្លាយរបស់គណៈកម្មាធិការនេះ ត្រូវបានក្រសួងមហាផ្ទៃសម្រេចឲ្យផ្អាកតាំងពីខែកញ្ញាមកម្ល៉េះ។
ចុះផ្សាយនៅថ្ងៃ៖
ស្តាប់ - ០១:៤៣
ក្រសួងមហាផ្ទៃ តាមរយៈអ្នកនាំពាក្យរងលោក ទូច សុខៈ នៅថ្ងៃទី៨ខែធ្នូបានឲ្យដឹងថា ក្រសួងបានសម្រេចប្រគល់ឲ្យអគ្គស្នងការនគរបាលជាតិ ស៊ើបអង្កេតពាក្យបណ្ដឹងទៅលើលោកគឹមជាតិវិញ ព្រោះជាសំណុំរឿងមួយក្នុងកម្រិតព្រហ្មទណ្ឌ។ បើតាមលោក ទូច សុខៈជាដំណើររឿងក្នុងកម្រិតព្រហ្មទណ្ឌ គឺដោយសារមានការពាក់ព័ន្ធនឹងការជំរិតទារប្រាក់ ដែលអគ្គស្នងការមានដែនសមត្ថកិច្ចគ្រប់គ្រាន់ក្នុងការអន្តរាគមន៍ ។
បណ្ដឹងនេះ ធ្វើឡើងដោយលោកមេធាវី អ៊ូច សុភត្រា ដែលបានចោទក្រុមលោក គឹម ជាតិ បានទារប្រាក់កូនក្ដី១០ម៉ឺនដុល្លារ ជាថ្នូរនឹងការមិនបិទផ្អាកអាជីវកម្ម ក្នុងពេលចុះត្រួតពិនិត្យក្រុមហ៊ុនស្រាកូនក្ដីរបស់ខ្លួនដែលលោកអះអាងថាជាក្រុមហ៊ុនស្របច្បាប់។ ក្រៅពីនេះ ក្នុងពាក្យបណ្ដឹង មេធាវីរូបនេះក៏បានចោទក្រុមលោកគឹម ជាតិ ពីការដកហូតស្រាចំនួន៤៨ដប យកទៅត្រួតពិនិត្យផងដែរ។
មិនតែប៉ុណ្ណោះ លោកមេធាវី អ៊ូច សុភត្រា បន្ថែមថា បន្ទាប់ពីប្រគល់ប្រាក់រួច ក្រុមលោកគឹម ជាតិ ក៏បង្គាប់ឲ្យអ្នកតំណាងក្រុមហ៊ុនផ្ដិតមេដៃលើកិច្ចសន្យាកែប្រែកំហុសថែមទៀត។
ក្រោយទទួលបានពាក្យបណ្ដឹងនេះ អ្នកនាំពាក្យរងក្រសួងមហាផ្ទៃ បានគូសបញ្ជាក់ថា តើលោកគឹម ជាតិ ពិតជាបានប្រព្រឹត្តដូចមានរៀបរាប់ក្នុងពាក្យបណ្ដឹងនេះ មែនឬក៏យ៉ាងណានោះ គឺត្រូវរង់ចាំលទ្ធផលស៊ើបអង្កេតពីអគ្គស្នងការដ្ឋាននគរបាលជាតិជាមុនសិន។ គួរបញ្ជាក់ដែរថា ក្រសួងមហាផ្ទៃបានសម្រេចឲ្យគណៈកម្មាធិការប្រយុទ្ធប្រឆាំងផលិតផលក្លែងក្លាយនេះ ផ្អាកធ្វើសកម្មភាពចុះបង្ក្រាប តាំងពីខែកញ្ញាមកម្ល៉េះ។
ទន្ទឹមគ្នានេះ ក្រសួងមហាផ្ទៃបានអំពាវនាវឲ្យម្ចាស់ក្រុមហ៊ុនឬឃ្លាំងដែលរងអំពើ អយុត្តិធម៌ពីការចុះត្រួតពិនិត្យផលិតផលក្លែងក្លាយនេះ មកដាក់ពាក្យបណ្ដឹងទៅកាន់អគ្គាធិការដ្ឋាន។ តាមលោកទូច សុខៈ គិតត្រឹមថ្ងៃទី៨ខែធ្នូ ក្រសួងមហាផ្ទៃ បានទទួលពាក្យបណ្ដឹងពាក់ព័ន្ធនឹងបញ្ហានេះចំនួន២ច្បាប់ជាលាយលក្ខណ៍អក្សរ ខណៈបណ្ដឹងចំនួន២ទៀតធ្វើឡើងតាមទូរសព្ទដៃ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ