មន្ត្រីម្នាក់ប្រឈមនឹងផ្លូវច្បាប់ ករណីយកលុយធ្វើលិខិតឆ្លងដែនខុសច្បាប់
អគ្គនាយកនៃអគ្គនាយដ្ឋានអត្តសញ្ញាណកម្ម ព្រមានចាត់ការតាមផ្លូវច្បាប់លើមន្ត្រីនគរបាលម្នាក់ ដែលត្រូវចោទប្រកាន់ថាបានប្រព្រឹត្តកំហុស ដោយយកលុយពីប្រជាពលរដ្ឋ ហើយមិនព្រមផ្តល់លិខិតឆ្លងដែនជូនប្រជាពលរដ្ឋ។
ចុះផ្សាយនៅថ្ងៃ៖
ស្តាប់ - ០២:០០
បើតាមហ្វេសប៊ុករបស់អគ្គនាយដ្ឋានអត្តសញ្ញាណកម្ម ការព្រមាននេះ គឺបន្ទាប់ពីមានការផ្សព្វផ្សាយព័ត៌មានមួយចំនួនអំពីករណីមន្ត្រីម្នាក់ឈ្មោះ ប៉ាន់ ម៉ាលីស ធ្វើការនៅនាយកដ្ឋានលិខិតឆ្លងដែន ដែលត្រូវចោទប្រកាន់ថាបានប្រព្រឹត្តកំហុស ដោយយកលុយប្រជាពលរដ្ឋ ហើយមិនព្រមផ្តល់លិខិតឆ្លងដែនជូនប្រជាពលរដ្ឋ។
អគ្គនាយកដ្ឋានអត្តសញ្ញាណកម្ម បានអះអាងថា ក្រុមការងារជំនាញ បាននិងកំពុងស្រាវជ្រាវលើករណីនេះយ៉ាងយកចិត្តទុកដាក់។ ក្នុងករណីដែលរកឃើញថា បុគ្គលរូបនះបានប្រព្រឹត្តកំហុសពិតប្រាកដមែន អគ្គនាយកដ្ឋាន នឹងចាត់វិធានការតាមវិន័យរបស់កងកម្លាំងនគរបាលជាតិ ដោយមិនលើកលែងឱ្យឡើយ។
តាមការផ្សាយរបស់អ្នកអត្ថាធិប្បាយលើបណ្តាញសង្គមខ្លះ បានអះអាងថា មានពលរដ្ឋ៤នាក់ បានវេលុយជាង៤០០ដុល្លារចូលទៅគណនីABA របស់លោកស័ក្ត៥ ប៉ាន់ ម៉ាលីស ដែលជាប្រធានការិយាល័យមួយនៅនាយករដ្ឋានលិខិតឆ្លងដែន។ ការផ្តល់លុយជាង៤០០ដុល្លារនេះ ដោយមន្ត្រីរូបនោះសន្យា១ខែ លិខិតឆ្លងដែននឹងធ្វើរួច។ ប៉ុន្តែនៅពេលដល់កំណត់មន្ត្រីរូបនោះ ចេះតែងពន្យាពេលម្តងជាពីរដងដោយថា មិនទាន់រួចរាល់ ទើបពលរដ្ឋដែលត្រូវការលិខិតឆ្លងចាំបាច់ប្តឹងប្រឆាំងមន្ត្រីរូបនោះ។
តាមគោលការណ៍របស់នាយកដ្ឋានលិខិតឆ្លងដែន គឺការធ្វើលិខិតឆ្លងដែនត្រូវបង់សេវាចាប់ពី១០០ដុល្លារឡើងទៅជាសេវាកម្មធម្មតា ហើយបើចង់បានលឿនគឺត្រូវបង់ថ្លៃសេវាកើនឡើងទៅតាមករណីជាក់ស្តែង។
យ៉ាងណាក៏ដោយ អគ្គនាយកដ្ឋានអត្តសញ្ញាណកម្ម បានអះអាងថា ខ្លួនធានារ៉ាប់រងដោះស្រាយជូនប្រជាពលរដ្ឋដែលទទួលរងនូវការខាតបង់ដោយករណីខាងលើនេះ ដោយឲ្យពលរដ្ឋមកកាន់នាយកដ្ឋានលិខិតឆ្លងដែនរៀងរាល់ម៉ោងធ្វើការ ដើម្បីបញ្ជាក់អំពីករណីនីមួយៗ និងទទួលយកនូវដំណោះស្រាយមួយសមស្រប៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ