វៀតណាមស្នើប្រធានរដ្ឋសភាកម្ពុជាថ្មី ជួយមើលថែពលរដ្ឋវៀតណាមដែលរស់នៅកម្ពុជា
មិនខុសពីរាល់ដង នៅរៀងរាល់ជំនួបរវាងមេដឹកនាំវៀតណាម និងមេដឹកនាំកម្ពុជា គឺភាគីវៀតណាមតែងតែផ្តាំផ្ញើឲ្យមេដឹកនាំកម្ពុជា ធ្វើយ៉ាងណាជួយមើលថែ និងយកចិត្តទុកដាក់ចំពោះពលរដ្ឋវៀតណាម ដែលកំពុងរស់នៅ និងធ្វើការក្នុងប្រទេសកម្ពុជា។ ការផ្តាំផ្ញើជាថ្មីម្តងទៀតនេះ ធ្វើឡើងតាមរយៈជំនួបរវាង លោក វឿង ឌិញហ្វេ ប្រធានរដ្ឋសភាវៀតណាម និងលោកស្រី ឃួន សុដារី ដែលជាប្រធានរដ្ឋសភាថ្មីកម្ពុជា នៅទីក្រុងហាណូយ ប្រទេសវៀតណាម នាថ្ងៃសុក្រនេះ។
ចុះផ្សាយនៅថ្ងៃ៖
ស្តាប់ - ០២:២៧
ការមើលថែ ការយកចិត្តទុកចំពោះពលរដ្ឋវៀតណាម ដែលរស់នៅកម្ពុជា ជារបៀបវារៈមួយ ដែលត្រូវលើកមកនិយាយដោយមិនប្រកែកបាន នៅរៀងរាល់ជំនួបរវាងថ្នាក់ដឹកនាំកំពូលរបស់កម្ពុជានិងវៀតណាម។ តាមរយៈការចុះផ្សាយរបស់សារព័ត៌មាន Vietnam Plus គឺប្រធានរដ្ឋសភាវៀតណាម លោក វឿង ឌិញហ្វេ បានស្នើដោយផ្ទាល់ចំពោះប្រធានរដ្ឋសភាកម្ពុជា លោកស្រី ឃួន សុដារី ដោយបន្តផ្តល់បរិយាកាសអំណោយផល សម្រាប់សហគមន៍វៀតណាមដែលកំពុងរស់នៅ និងធ្វើការក្នុងប្រទេស។
សម្រាប់ការឆ្លើយតបរបស់ប្រធានរដ្ឋសភាថ្មីកម្ពុជា ដែលជាស្រី្តវិញ គឺបានអះអាងប្រាប់ថ្នាក់ដឹកនាំវៀតណាម ថា កម្ពុជាតែងតែយកចិត្តទុកដាក់ និងផ្តល់ការគាំទ្រដល់ជនបរទេសដែលរស់នៅក្នុងប្រទេសកម្ពុជា រួមទាំងប្រជាជនវៀតណាមផងដែរ។ បើតាមសារព័ត៌មាន Vietnam Plus លោកស្រី ឃួន សុដារី បានគូសបញ្ជាក់ពីជំហររបស់កម្ពុជាចំពោះពលរដ្ឋវៀតណាមទៀតថា សម្រាប់ពលរដ្ឋខ្មែរដើមកំណើតវៀតណាម ដែលនៅខ្វះឯកសារផ្លូវច្បាប់ កម្ពុជានឹងបន្តជួយពួកគេតាមរយៈច្បាប់ពាក់ព័ន្ធនឹងកិច្ចការរដ្ឋប្បវេណីជាបន្ត។
ក្រៅពីនេះ ភាគីវៀតណាម ក៏បានអបអរចំពោះជោគជ័យរបស់គណបក្សកាន់អំណាច ដោយរំពឹងថា ទំនាក់ទំនងបែបប្រពៃណីរបស់កម្ពុជា និងវៀតណាម នឹងកាន់តែល្អប្រសើរ។
គួរបញ្ជាក់ថា ការស្នើសុំរបស់ភាគីវៀតណាមយ៉ាងដូច្នេះ គឺធ្វើឡើងនាគ្រា ដែលលោកស្រី ឃួន សុដារី ប្រធានរដ្ឋសភាកម្ពុជា បានទៅបំពេញទស្សនកិច្ចជាផ្លូវការ និងចូលរួមកិច្ចប្រជុំកំពូលសភាកម្ពុជា-ឡាវ-វៀតណាម នៅទីក្រុងហាណូយ ពីថ្ងៃទី៣០វិច្ឆិកា ដល់ថ្ងៃទី២ធ្នូ។
គួរកត់សម្គាល់ថា សម្រាប់របៀបវារៈនៃការស្នើសុំរបស់វៀតណាម អំពីការមើលថែពលរដ្ឋវៀតណាមរស់នៅកម្ពុជា គឺតែងតែកើតមានឡើង នៅរៀងរាល់ជំនួបនៃមេដឹកនាំកំពូលទាំងផ្នែកនីតិប្រតិបត្តិ និងផ្នែកនីតិបញ្ញត្តិ កម្ពុជានិងវៀតណាម។ ជាក់ស្តែង កាលពីលោក ហ៊ុន សែន នៅជានាយករដ្ឋមន្ត្រី ភាគីវៀតណាមក៏តែងតែផ្តាំផ្ញើ ធ្វើយ៉ាងណាជួយយកចិត្តទុកដាក់ចំពោះពលរដ្ឋវៀតណាមដែលរស់នៅកម្ពុជា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ