ការបរទេស៖ ការឈ្នះពានរង្វាន់នៃសៀវភៅ«កេរដំណែលស្នាដៃម្ហូបខ្មែរ» ជាមោទនភាព និងកិត្តិយសសម្រាប់កម្ពុជា
សៀវភៅ«កេរដំណែលស្នាដៃម្ហូបខ្មែរ» (The Taste of Angkor) កាលពីថ្ងៃទី២៩ ខែវិឆ្ឆិកា ត្រូវបានប្រកាសថាទទួលជ័យលាភីជាថ្មីនៃ«ពានរង្វាន់ទូរទស្សន៍ម្ហូបអាហារល្អដាច់គេលើពិភពលោក»នៅក្នុងកម្មវិធីប្រកួតពានរង្វាន់សៀវភៅមុខម្ហូបពិភពលោកប្រចាំឆ្នាំ២០២៣នេះ នៅទីក្រុងរីយ៉ាត ប្រទេសអារ៉ាប៊ីសាអ៊ូឌីត។ ការទទួលជ័យលាភីនេះ គឺបន្ទាប់ពីវិទ្យាស្ថានការទូតកម្ពុជានៃក្រសួងការបរទេសបានផលិតវីដេអូឃ្លីប ដែលបង្ហាញពីការចម្អិនម្ហូបខ្មែរ៧មុខ និងបង្អែម២មុខ ដកស្រង់ពីសៀវភៅស្នាដៃម្ហូបខ្មែរ។
ចុះផ្សាយនៅថ្ងៃ៖
ស្តាប់ - ០២:០១
ក្រសួងការបរទេសកម្ពុជាបានប្រកាសថាសៀវភៅ«កេរដំណែលស្នាដៃម្ហូបខ្មែរ» ដែលរៀបរៀង និងចងក្រងដោយក្រសួងនេះផ្ទាល់ ពិតជាបានឈ្នះ«ពានរង្វាន់ទូរទស្សន៍ម្ហូបអាហារល្អដាច់គេលើពិភពលោក»នៅក្នុងកម្មវិធីប្រកួតពានរង្វាន់សៀវភៅមុខម្ហូបពិភពលោកប្រចាំឆ្នាំ(The Gourmand World Cookbook Awards) ខណៈដែលកម្មវិធីប្រកួតប្រជែងនេះ បានធ្វើឡើងដំណាលគ្នានឹងបុណ្យអាហារនៅក្នុងប្រទេសអារ៉ាប៊ីសាអ៊ូឌីត។
ការឈ្នះពានរង្វាន់ពិភពលោកនៃសៀវភៅម្ហូបខ្មែរនៅពេលនេះ គឺជាលើកទី៣ហើយ ចាប់តាំងពីឆ្នាំ២០២១មក ដែលកម្ពុជាទទួលបានពាន ពោលគឺនៅឆ្នាំ ២០២១ និងឆ្នាំ២០២២ សៀវភៅ«កេរដំណែលស្នាដៃម្ហូបខ្មែរ»បានទទួលជ័យលាភីជាសៀវភៅមុខម្ហូបអាស៊ីដែលល្អផ្តាច់គេ និងសៀវភៅមុខម្ហូបសម្រាប់ប្រមុខរដ្ឋ។
ក្រសួងការបរទេសកម្ពុជាបានបញ្ជាក់តាមសេចក្តីប្រកាសរបស់ខ្លួនថាការឈ្នះពានរង្វាន់ទូរទស្សន៍ម្ហូបអាហារល្អដាច់គេលើពិភពលោក បានឆ្លុះបញ្ចាំងពីនយោបាយការបរទេសរបស់ក្រសួងនេះ ក្នុងការលើកស្ទួយម្ហូបអាហារខ្មែរដ៏ពិតប្រាកដទៅដល់ពិភពលោក និងជាមោទនភាពផង កិត្តិយសផងសម្រាប់កម្ពុជា ក្នុងការផ្សព្វផ្សាយឲ្យពិភពលោកស្គាល់ និងផ្តល់តម្លៃចំពោះមរតកដ៏មហិមានៃម្ហូបខ្មែរ ដែលមានអាយុកាលរាប់ពាន់ឆ្នាំមកហើយ។
ការទទួលបានពានរង្វាន់នេះ ត្រូវក្រសួងការបរទេសចាត់ទុកថាជាជោគជ័យមួយនៃការទូតអាហារ តាមរយៈយុទ្ធសាស្ត្រការទូតសេដ្ឋកិច្ច ដែលបានចាប់ផ្តើមកាលពីឆ្នាំ២០២១ សំដៅលើកស្ទួយកិត្យានុភាពកម្ពុជានៅលើឆាកអន្តរជាតិ និងជាផ្នែកមួយជួយដល់រដ្ឋាភិបាលក្នុងការសម្រេចចក្ខុវិស័យឆ្នាំ២០៣០ ជាប្រទេសមានប្រាក់ចំណូលមធ្យមកំរិតខ្ពស់ និងជាប្រទេសមានប្រាក់ចំណូលខ្ពស់នៅឆ្នាំ២០៥០។
សូមរំលឹកថាកម្មវិធីប្រកួតពានរង្វាន់សៀភៅមុខម្ហូបពិភពលោក បានបង្កើតឡើងនៅឆ្នាំ ១៩៩៥ ដោយជនជាតិបារាំងមួយរូប គឺលោក Edouard Cointreau ក្នុងគោលបំណងគាំទ្រនូវប្រពៃណីចម្អិនអាហារពីគ្រប់ទិសទីនៃពិភពលោក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ