សាលាឧទ្ធរណ៍៖សំណុំរឿងលោក កឹម សុខានឹងត្រូវលើកទៅជំនុំជម្រះនៅដើមឆ្នាំ២០២៤
អ្នកនាំពាក្យសាលាឧទ្ធរណ៍ លោក ឃុន លាងម៉េង បានបញ្ជាក់ប្រាប់វិទ្យុបារាំងអន្តរជាតិ RFI នៅថ្ងៃព្រហស្បតិ៍នេះថា សំណុំរឿងលោក កឹម សុខា នឹងត្រូវលើកមកជំនុំជម្រះនៅដើមឆ្នាំ២០២៤ ខាងមុខនេះ។ លោកអះអាងថា សំណុំរឿងដែលទាក់ទងទៅនឹងលោក កឹម សុខា មានភាពស្មុគ្រស្មាញ និងមានឯកសារច្រើន។ ការពន្យាពេលសវនាការឧទ្ធរណ៍លើសំណុំរឿងលោក កឹម សុខា នេះត្រូវបានក្រុមអ្នកច្បាប់មួយចំនួនលើកឡើងថា វាមានចរិកនយោបាយ និងធ្វើឲ្យប៉ះពាល់ដល់សិទ្ធិទទួលបានការជំនុំជម្រះដោយឆាប់រហ័សរបស់លោក កឹម សុខា ដែលមានចែងនៅក្នុងច្បាប់។ ក៏ប៉ុន្តែមន្ត្រីអ្នកនាំពាក្យសាលាឧទ្ធរណ៍យល់ឃើញថាសំណុំរឿងនេះ មិនមានភាពយឺតយូរនោះទេ ខណៈតុលាការបានផ្តល់អាទិភាពទៅលើសំណុំរឿងអនីតិជនជាបន្តបន្ទាប់។សូមរំលឹកថា លោក កឹម សុខា ប្រធានអតីតគណបក្សសង្គ្រោះជាតិត្រូវបានសាលាដំបូងរាជធានីភ្នំពេញផ្តន្ទាទោសកាលពីថ្ងៃទី៣ ខែមីនា ឆ្នាំ២០២៣ ដាក់ពន្ធនាគាររយៈពេល២៧ឆ្នាំ ពីបទសន្ទិដ្ឋិភាពជាមួយបរទេស តាមមាត្រា៤៣៩ និងមាត្រា៤៤៣ នៃក្រមព្រហ្មទណ្ឌ។ ក៏ប៉ុន្តែលោក កឹម សុខា ត្រូវបានបញ្ជូនទៅឃុំខ្លួននៅក្នុងផ្ទះ។ តុលាការ ក៏បានបង្គាប់ឱ្យដកសិទ្ធិនយោបាយជាអចិន្រ្តៃយ៍ចំពោះលោក កឹម សុខា ក្នុងការឈរឈ្មោះ ឬចូលរួមបោះឆ្នោត ដែលជាទណ្ឌកម្មបន្ថែមតាមមាត្រា៤៥០នៃក្រមព្រហ្មទណ្ឌ។ក៏ប៉ុន្តែចាប់តាំងពីចុងខែមីនា ឆ្នាំ២០២៣មក សំណុំរឿងលោក កឹម សុខា ត្រូវបានអូសបន្លាយជាច្រើនខែរហូតមកដល់បច្ចុប្បន្ននេះ ដែលក្រុមមេធាវីការពារសិទ្ធិលោក កឹម សុខា តែងធ្វើអត្ថាធិប្បាយថាជាការរំលោភលើសិទ្ធិកូនក្តីរបស់ពួកគេ។ សូមស្តាប់ការលើកឡើងរបស់លោក ឃុន លាងម៉េង៖
ចុះផ្សាយនៅថ្ងៃ៖
ស្តាប់ - ០១:១៣